Yoshiya uvua munange mikenji ya Nzambi

Yoshiya wakalua mukalenge wa Yuda pavuaye ne bidimu muanda mukulu. Tshikondo atshi, bantu bavua benza malu a majimbu ne batendelela mpingu. Pavua Yoshiya ne bidimu 16, wakabanga kulonga bua kumanya mushindu muimpe wa kutendelela Yehowa. Pavuaye mukumbaje bidimu 20, wakabanga kubutula mpingu ne bioshelu mu buloba buonso bua Yuda. Pavua Yoshiya mukumbaje kabidi bidimu 26, wakalongolola malu bua bakaje ntempelo wa Yehowa.

Muakuidi munene Hilekiya wakapeta muvungu wa mikenji ya Nzambi mu ntempelo. Muvungu au uvua mua kuikala uvua Mose mudifundile ku tshianza tshiende. Shafana mufundi wa mukalenge wakalua ne muvungu au kudi Yoshiya, kutuadijaye kubala mikenji ne dîyi dikole. Pavua Yoshiya wenda uteleja, wakajingulula ne: bantu kabavua batumikile Yehowa munkatshi mua bidimu bia bungi to. Mukalenge Yoshiya wakambila Hilekiya ne: ‘Yehowa mmutufiikile munda bikole. Ndaku uyukile nende. Yehowa neatuambile tshitudi ne bua kuenza.’ Yehowa wakabandamuna ku diambuluisha dia muprofete mukaji Huleda. Wakamba ne: ‘Bantu ba mu Yuda mbandekele. Nebapete dinyoka, kadi kabakudipeta patshidi Yoshiya mukalenge to, bualu yeye mmudipuekeshe.’

Pavua mukalenge Yoshiya mumvue bualu buvua Yehowa muambe abu, wakaya ku ntempelo, kubikidishaye bantu bonso ba mu Yuda bua kudisangisha. Pashishe wakabadila tshisamba tshijima mikenji ya Yehowa ne dîyi dikole. Yoshiya ne tshisamba tshijima bakalaya bua kutumikila Yehowa ne muoyo wabu mujima.

Kukavua kupite bidimu bia bungi bivua tshisamba tshia Yuda katshiyi tshienze Pasaka to. Kadi pavua Yoshiya mubale mu mikenji ne: Pasaka uvua wa kuenza tshidimu tshionso, wakambila bena mu tshisamba ne: ‘Netuenzele Yehowa Pasaka.’ Pashishe Yoshiya wakalongolola bua kufila milambu ya bungi ne bua kuikale tshisumbu tshia bimbi ba misambu ku ntempelo. Pashishe tshisamba tshijima tshiakenza Pasaka, wakaluabu kulonda kudi Tshibilu tshia Mampa kaayi mela Luevene tshivuabu benze munkatshi mua matuku muanda mutekete. Kakuvua kuenzeke Pasaka wa buena au katshia ku tshikondo tshia Samuele to. Bushuwa, Yoshiya uvua munange mikenji ya Nzambi. Utu musue pebe kulonga malu a Yehowa anyi?