Badi babutula Yelushalema

Misangu ya bungi bantu ba mu Yuda bavua balekela Yehowa ne batendelela nzambi ya dishima. Munkatshi mua bidimu bia bungi Yehowa uvua anu uteta bua kubambuluisha. Uvua utuma baprofete ba bungi bua kubadimuija, kadi kabavua bumvua to. Pamutu pa kuteleja baprofete, bavua bobu babaseka. Mmushindu kayi uvua Yehowa mujikije ditendelela diabu dia mpingu?

Nebukadenesâ mukalenge wa Babilona uvua wenda utshimuna bisamba ku tshimue ku tshimue. Musangu wa kumpala uvuaye mukuate Yelushalema, wakakuata mukalenge Yehoyakina, ne bakokeshi, ne baluanganyi ba mvita, ne bansenda, kuyaye nabu ku Babilona. Wakangata kabidi bintu bia mushinga bionso bivua mu ntempelo wa Yehowa. Pashishe Nebukadenesâ wakateka Sedekiya bua ikale mukalenge wa Yuda.

Kumpala Sedekiya uvua wenza tshivua Nebukadenesâ wamba. Kadi baprofete ba dishima ne bena mu bisamba bivua pabuipi bakambila Sedekiya bua kutombokela Babilona. Yelemiya wakamudimuija wamba ne: ‘Wewe mutombokele Babilona, nebashipe bantu mu Yuda, nemuikale tshiyole tshia nzala ne masama.’

Sedekiya mumane kukokesha bidimu muanda mukulu, wakangata dipangadika dia kutombokela Babilona. Wakalomba basalayi ba bena Ejipitu bua bamuambuluishe. Pashishe Nebukadenesâ wakatuma basalayi bende bua kuluisha Yelushalema, bobu kuasa tshitudilu tshinyunguluke tshimenga. Yelemiya wakambila Sedekiya ne: ‘Yehowa udi wamba ne: wewe mudifile kudi bena Babilona, wewe ne tshimenga tshia Yelushalema nenupanduke. Kadi wewe mubenge, bena Babilona neboshe Yelushalema ne nebaye nebe bu muena buloko.’ Sedekiya wakamba ne: ‘Meme tshiakudifila to!’

Tshidimu tshimue ne tshitupa pashishe, basalayi ba bena Babilona bakatubula bimanu bia Yelushalema, kutuabu tshimenga kapia. Bakosha ntempelo yonso, kushipabu bantu ba bungi, ne kukuatabu bantu ba bungi bu bena buloko.

Sedekiya wakanyema Yelushalema, kadi bena Babilona bakamulonda. Bakamukuatshila pabuipi ne Yeliko, kuyabu nende kudi Nebukadenesâ. Mukalenge wa Babilona wakenza bua bashipe bana ba Sedekiya mu mêsu muende. Pashishe Nebukadenesâ wakashipa Sedekiya mêsu, kumuelaye mu buloko muakaluaye kufuila. Kadi Yehowa wakalaya bena Yuda ne: ‘Nennupingaje kuenu ku Yelushalema panyima pa bidimu 70.’

Ntshinyi tshivua ne bua kufikila bansonga bavuabu bakuate baye nabu ku Babilona? Bavuaku mua kushala ne lulamatu kudi Yehowa anyi?