Yezu udi wondopangana dituku dia Nsabatu

Bafalese bavua bakine Yezu ne bavua bakeba kaba ka kubuelela bua kumukuata. Bavua bamba ne: kavua ne bua kuondopa bantu dia Nsabatu to. Dituku kampanda dia Nsabatu, Yezu wakamona mpofo mukuabu ulomba ka pa luse mu njila. Ke yeye kuambila bayidi bende ne: ‘Nenumone mudi bukole bua Nzambi buambuluisha muntu eu.’ Yezu kusambakaja mata ende ne buloba, kuenzaye bitotshi, kubilamikaye pa mêsu a muntu au. Yeye kuambila muntu au ne: ‘Ndaku wowe mâyi ku mêsu ku dijiba dia Siloama.’ Muntu au wakenza nanku, ne bua musangu wa kumpala katshia bamulela, wakamona.

Bantu bakakema bikole. Bakamba ne: ‘Muntu eu ki nguvua usomba ulomba ka pa luse anyi? Peshi mmuntu mukuabu udi mufuanangane nende?’ Ke muntu au kuamba ne: ‘Mmeme uvua muledibue mpofo au!’ Bantu kumuebejabu ne: ‘Kadi bua tshinyi kutshiena kabidi mpofo?’ Pakabambilaye tshivua tshienzeke, bakaya nende kudi Bafalese.

Muntu au wakambila Bafalese ne: ‘Yezu uvua mundamike bitotshi pa mêsu, kungambilaye bua nye kuowa mâyi bua kubiumbusha. Ke tshimvua muenze, ne mpindieu ndi mmona.’ Bafalese bakamba ne: ‘Bikala Yezu wondopangana dia Nsabatu, bukole buende ki mbua kudi Nzambi to.’ Kadi bantu bakuabu bakamba bobu ne: ‘Bukole buende bobu kabuyi bua kudi Nzambi, kavua mua kuondopangana nansha kakese.’

Bafalese bakabikidisha baledi ba muntu au, kubebejabu ne: ‘Mbienzeke bishi bua muanenu ikale umona mpindieu?’ Baledi bende bavua ne buôwa bualu Bafalese bavua bambe ne: muntu yonso uvua witabuja Yezu, bavua bamuipata mu nsunagoga. Ke bobu kuamba ne: ‘Katuena bamanye to. Muebejayi yeye nkayende.’ Bafalese bakela muntu au nkonko mikuabu ya bungi too ne pakambaye ne: ‘Ndi munuambile bionso bindi mumanye. Bua tshinyi nutshidi anu nungela nkonko?’ Bafalese bakumvua tshiji, bobu kumuipata.

Yezu wakaya kumonangana ne muntu au, kumuebejaye ne: ‘Udi witabuja Masiya anyi?’ Muntu au kuamba ne: ‘Mvua mua kumuitabuja bu meme mumumanye.’ Ke Yezu kumuambila ne: ‘Meme ke Masiya.’ Yezu kavuaku muenze bualu buimpe muaba eu anyi? Kavua anu muondope muntu au to, kadi wakamuambuluisha kabidi bua kuikala ne ditabuja.