Diumvuija dia mêyi a buprofete a Yehezekele

MÊYI A BUPROFETE NTSHINYI?

Mu Bible, muaku wa pa muanda nava wa mu tshiena Ebelu bua “kuamba mêyi a buprofete,” udi umvuija tshia kumpala kumanyisha mukenji, dilumbuluisha, dilongesha dia bikadilu bilenga, anyi dîyi dituma dia Nzambi ku bukole bua nyuma. Udi kabidi umvuija kumanyisha malu atshilualua. Mu mêyi a buprofete a Yehezekele mudi kabidi malu onso avua Nzambi mumuleje mu bikena kumona.​—Yeh. 3:10, 11; 11:4-8; 14:6, 7; 37:9, 10; 38:1-4.

MUVUAYE MUAMANYISHE BANTU

• 

  BIKENA KUMONA

• 

  BILEJILU

• 

  DILEJA MU TSHIENZEDI

Mu mukanda wa Yehezekele mudi bikena kumona, bilejilu, nsumuinu, ne dileja mu tshienzedi muvua mêyi a buprofete au ne bua kukumbana.

DIKUMBANA DIAWU

Kudi misangu itu mêyi a buprofete a Yehezekele akumbana misangu ya bungi. Tshilejilu, mêyi ende a buprofete a dijadikulula dia ntendelelu akakumbana musangu wa kumpala pavua bena Isalele bapingane mu Buloba Bulaya. Anu mudi nshapita wa 9 wa mukanda eu uleja, mêyi a buprofete a bungi a dijadikulula dia ntendelelu adi enda akumbana lelu, ne neakumbane kabidi mu matuku atshilualua.

Ku kale, tuvua tumona ne: malu a bungi a mu mêyi a buprofete a Yehezekele avua mundidimbi wa malu kampanda mena dîna. Kadi mu mukanda eu, kabena bakula bua muntu, tshintu, anyi muaba kampanda bu mundidimbi wa bualu budi ne bua kukumbana matuku etu aa to, anu kuoku mvese udi uleja nanku.a Newutambe kuimanyina pa dikumbana dinene dia mêyi a buprofete a bungi a Yehezekele. Newutuleje kabidi malongesha atudi tupetela ku mukenji wa Yehezekele eu, ne kudi bantu badiye utela, ne miaba, ne malu makuabu.