KAZUBU KA 19B
Kasulu kakese kalua mâyi a nkuaka mukole!
Tshishima tshia dikema! Yehezekele udi umona kasulu kafumina mu muaba munsantu wa Yehowa, kalua nkuaka mukole padiku kapueka ntanta wa kilometre mitue ku 2 patupu. Umona kabidi mitshi misampile bikole idi ifila biakudia ne yondapa mikale ku mielelu ya musulu au. Bidi bileja tshinyi?
Musulu udi ufila mabenesha
KU KALE: Diakamue pakapingana bena Yuda kuabu, Yehowa wakababenesha pakadituabu mu diakajilula ntendelelu mukezuke ku ntempelo
LELU: Bakakajilula ntendelelu mukezuke mu 1919, ke Yehowa kutuadijaye kutupesha bintu bitudi nabi bidi bienza bua tumutendelele mudiye musue ne bitupetesha mpunga wa kutekemena muoyo wa tshiendelele
KUMPALA EKU: Panyima pa Armagedone, Yehowa neatubeneshe bikole. Netulue bapuangane ne neatulongeshe malu mapiamapia a bungi
Mâyi adi afila muoyo
KU KALE: Nansha muvua bantu ba Yehowa benda bavula, wakababenesha bikole bua muvuabu bamutumikila, kuenzaye bua bakole mu nyuma
LELU: Bu mudi ba bungi benda babuela mu Mparadizu wa mu nyuma, badi balonga malu a bungi a mu Bible, ne mbafike ku dimanya Yehowa ne ku didisangisha ne bantu badi bamutendelela mudiye musue
KUMPALA EKU: Bantu bapanduka ku Armagedone nebapetangane ne ba bungi baluabu kubisha ku lufu, Yehowa neababeneshe bikole
Mitshi bua biakudia ne luondapu
KU KALE: Yehowa wakalongesha bantu bende malu a bungi, kubapeteshaye mushindu wa kumutendelela muvuaye musue; kubambuluishaye kabidi bua balekele mpingu anyi tshintu tshionso tshivua tshibabueja mu ntendelelu wa dishima
LELU: Mumvuija a bulelela bua mu Bible adi ambuluisha bantu ba Nzambi bua kuepuka masama a mu nyuma ne ngelelu wa meji mubi wa bena panu
KUMPALA EKU: Kristo ne bantu 144 000 bakokeshaye nabu nebambuluishe bantu ba Nzambi ba lulamatu bua balue bapuangane kashidi ne bapete makanda a mubidi ne bukole!