Mukanda wa kudi Kasumbu kaludiki

‘Nudi ne bua kuikala balongeshi.’ (Eb. 5:12) Elabi meji, Yehowa (Mulongeshi mutambe buimpe wa diulu ne buloba) utulomba tuetu bua tulongeshe bantu bakuabu malu ende! Mudimu wonso udibu batupesha bua kulongesha malu malelela a Yehowa (mu dîku, mu tshisumbu, anyi mu buambi) ndiakalenga dinene ne bujitu bunene. Ntshinyi tshitudi mua kuenza bua kuwukumbaja bimpe?

Diandamuna didi mu mêyi avua mupostolo Paulo mufundile Timote a ne: “Tungunuka ne kudifila ku dibala kumpala kua bantu, ku didimuijangana ne ku dilongesha.” Paulo wakasakidila kabidi wamba ne: “Paudi wenza nanku neudipandishe wewe muine ne bantu badi bakuteleja.” (1 Tim. 4:13, 16) Udi ne mukenji udi usungila bantu wa kubambila. Nunku mbimpe wakaje mushindu uutu ubala ne ulongesha. Broshire eu mmuenza bua kukuambuluisha bua kubala ne kulongesha nanku. Mona amue a ku malu adimu.

Kudi mvese mu dibeji dionso muikale dîyi dinene dia mu Bible didi dipetangana ne dilonga dia mu dibeji adi anyi tshilejilu tshidi tshipetangana ne dilonga adi

Yehowa ke ‘Mulongeshi Munene.’ (Yesh. 30:20) Nansha mudi broshire eu mua kukuambuluisha bua kulengeja mushindu uudi ubala ne ulongesha, kupu muoyo ne: Yehowa ke Muena mukenji utudi nawu ne yeye ke udi ukoka bantu kudiye. (Yone 6:44) Ke bualu kayi ikala ne tshibidilu tshia kumulomba nyuma muimpe. Ikala ulongesha ne Bible bikole. Koka ntema ya bantu kudi Yehowa, kuyikoki kuudi wewe to. Dienzeja bua kusaka mioyo ya bantu badi bakuteleja bua kunanga Yehowa bikole.

Mbakupeshe mudimu wa kulongesha bantu mukenji mutambe bunene wa katshia ne katshia. Tudi batuishibue ne: bu muudi weyemena “bukole budi Nzambi ufila,” neukumbaje mudimu eu bimpe.—1 Pet. 4:11.

Balongeshi nebe,

Kasumbu kaludiki ka Bantemu ba Yehowa