Bible utu utamba kuakula bua Bukalenge bua Nzambi. Ku diambuluisha dia Bukalenge ebu, Yehowa neakumbaje tshivuaye mulongolole pakafukaye buloba. Bukalenge ntshinyi? Tshidi tshitujadikila ne: bukadi bukokesha mpindieu ntshinyi? Tshikadibu buenze ntshinyi? Ntshinyi tshienzabu kumpala eku? Dilongesha edi ne abidi adi alonda neandamune nkonko eyi.

1. Bukalenge bua Nzambi ntshinyi? Mukalenge wabu nnganyi?

Bukalenge bua Nzambi mmbulamatadi udi Yehowa Nzambi mujadike. Yezu Kristo Mukalenge wabu, udi ukokeshila mu diulu. (Matayi 4:17; Yone 18:36) Bible udi wamba ne: Yezu “neakokeshe bu Mukalenge . . . bua kashidi.” (Luka 1:32, 33) Bu mudi Yezu Mukalenge wa Bukalenge bua Nzambi, neakokeshe bantu bonso pa buloba.

2. Mbanganyi badi bakokesha ne Yezu?

Yezu kena ukokesha nkayende to. Bantu ba mu “tshisa tshionso ne mu muakulu wonso ne mu tshisamba tshionso ne mu ditunga dionso . . . badi ne bua kukokesha bu bakalenge pa buloba.” (Buakabuluibua 5:9, 10) Badi bakokesha ne Kristo nebikale bungi kayi? Katshia Yezu walua pa buloba, bena Kristo miliyo ya bungi mbalue bayidi bende. Kadi anu bena Kristo 144 000 ke badi baya mu diulu bua kukokesha nende. (Balayi Buakabuluibua 14:1-4.) Bakuabu bonso bashala pa buloba nebabakokeshe kudi Bukalenge ebu.​—Misambu 37:29.

3. Bua tshinyi Bukalenge bua Nzambi mbuimpe bupite mbulamatadi ya bantu?

Nansha padi bakokeshi ba panu badienzeja bua kuenza malu mimpe, kabatu ne bukole bua kuenza malu onso adibu bajinga to. Pashishe bakokeshi bakuabu badi pamuapa kabayi basue kuambuluisha bantu badi babapingana mu nkuasa. Kadi Yezu, Mukokeshi wa Bukalenge bua Nzambi, yeye kabakumupingana kudi muntu nansha umue to. Nzambi ‘mmujadike bukalenge buikala kabuyi mua kubutudibua nansha kakese.’ (Danyele 2:44) Yezu neakokeshe buloba bujima kayi ne kansungansunga to. Udi ne dinanga, bulenga, ne buakane. Nealongeshe bantu bua bikale pabu ne dinanga, bulenga, ne buakane.​—Balayi Yeshaya 11:9.

4. Mbulamatadi wa bukole bua bungi neakokeshe buloba bujima

Yezu Kristo udi ne bukokeshi bunene kupita bantu bonso bakadi bakokeshe. Balayi Matayi 28:18, pashishe nuandamune lukonko elu:

• Nku tshinyi kudi bukokeshi bua Yezu bupite bua bakokeshi bonso?

Mbulamatadi ya bantu itu ishintuluka misangu ya bungi, ne muntu utu ukokesha anu tshitupa kampanda tshia buloba. Ke muikalabi kabidi bua Bukalenge bua Nzambi anyi? Balayi Danyele 7:14, pashishe nuandamune nkonko eyi:

• Bua tshinyi mbimpe mudi Bukalenge bua Nzambi ‘kabuyi bubutudibua’?

• Bua tshinyi mbimpe bukokeshe buloba bujima?

5. Bidi bikengela bumbushe makokeshi a bantu

Bua tshinyi Bukalenge bua Nzambi budi ne bua kupingana pa muaba wa mbulamatadi ya bantu? Tangilayi FILME, pashishe nuandamune lukonko ludi lulonda.

FILME: Katupa ka filme wa Bukalenge bua Nzambi ntshinyi? (1:41)

• Makokeshi a bantu mmakebeshe tshinyi?

Balayi Muambi 8:9, pashishe nuandamune nkonko eyi:

• Buebe wewe, mbimpe Bukalenge bua Nzambi bupingane pa muaba wa mbulamatadi ya bantu anyi? Bua tshinyi?

6. Bakokeshi ba mu Bukalenge bua Nzambi badi batumvuila

Bu muvua Mukalenge wetu Yezu musombe panu apa bu muntu, udi mua “kutumvuila mu matekete etu.” (Ebelu 4:15) Balume ne bakaji ba lulamatu 144 000 bakokesha ne Yezu mbasungula kudi Yehowa “mu tshisa tshionso ne mu muakulu wonso ne mu tshisamba tshionso ne mu ditunga dionso.”​—Buakabuluibua 5:9.

• Bidiku bikukolesha bua mudi Yezu ne bonso bakokeshaye nabu bamanye tshidi kuikala muntu anyi? Bua tshinyi?

7. Mikenji ya Bukalenge bua Nzambi mmimpe mipite ya mbulamatadi ya bantu

Mbulamatadi ya bantu mmiele mikenji bua kuambuluisha bantu bayi ne kubakuba. Bukalenge bua Nzambi budi pabu ne mikenji idi bantu badibu bukokesha ne bua kutumikila. Balayi 1 Kolinto 6:9-11, pashishe nuandamune nkonko eyi:

• Buebe wewe, buloba nebuikale mushindu kayi patumikila bantu bonso mikenji ya Nzambi ya malu a bikadilu?a

• Mbia meji bua mudi Yehowa ulomba bantu bakokeshabu kudi Bukalenge bua batumikile mikenji eyi anyi? Bua tshinyi?

• Tshidi tshileja ne: bantu badi kabayi batumikila mikenji eyi badi mua kushintuluka ntshinyi?​—Tangila mvese wa 11.

TSHIA KUKUATA

Bukalenge bua Nzambi mmbulamatadi mulelela udi mu diulu wakokesha buloba bujima.

Diambulula

• Mbanganyi bakokesha mu Bukalenge bua Nzambi?

• Bua tshinyi Bukalenge bua Nzambi mbuimpe bupite mbulamatadi yonso ya bantu?

• Mmalu kayi adi Yehowa ulomba bantu bakokeshabu kudi Bukalenge?

BIA KUTANGILA KABIDI

Mona tshivua Yezu mulongeshe bua muaba udi Bukalenge.

“Bukalenge bua Nzambi budi mu muoyo wa muntu anyi?” (Tshiena-bualu tshia mu jw.org)

Bua tshinyi Bantemu ba Yehowa batu basungula bua kulamata anu Bukalenge bua Nzambi pamutu pa mbulamatadi ya bantu?

Balamate anu ku Bukalenge bua Nzambi (1:43)

Longa tshidi Bible wamba bua bantu 144 000 badi Yehowa usungula bua kukokesha ne Yezu.

“Mbanganyi badi baya mu diulu?” (Tshiena-bualu tshia mu jw.org)

Ntshinyi tshiakajadikila mamu uvua mu buloko ne: anu Nzambi ke udi mua kututuadila buakane pa buloba?

“Mungakamanya tshiafikila malu mabi” (Tabulukayi! 11/2011)

Bukalenge bua Nzambi buakatuadija kukokesha mu diulu mu 1914. Ke tshidimu tshiakatuadija kabidi matuku a ku nshikidilu a bukokeshi bua bantu. Bua tshinyi tudi tuamba nanku? Tuakulabi bua mêyi a buprofete a mu Bible, bua malu adi enzeka pa buloba, ne bua bikadilu bidi nabi bantu katshia ku 1914.

1. Mêyi a buprofete a mu Bible adi amba tshinyi?

Mukanda wa Danyele uvua muleje ne: Bukalenge bua Nzambi buvua ne bua kutuadija kukokesha ku ndekelu kua tshikondo tshidibu babikila bu: “bikondo muanda mutekete.” (Danyele 4:16, 17) Bidimu nkama ya bungi pashishe, Yezu wakabikila tshikondo atshi bu: “bikondo bisungula bia bisamba,” kuambaye kabidi ne: kabivua bianji kujika to. (Luka 21:24) Anu mutuabimona, bikondo 7 abi biakajika mu 1914.

2. Mmalu kayi adi enzeka pa buloba katshia ku 1914?

Bayidi ba Yezu bakamuebeja ne: “Ntshinyi tshikale tshimanyinu tshia dikalaku diebe ne tshia nshikidilu wa ndongoluelu wa malu eu?” (Matayi 24:3) Yezu wakabandamuna, kubalejaye malu a bungi avua ne bua kuenzeka pavuaye ulua Mukalenge wa Bukalenge bua Nzambi mu diulu. Mu malu au mudi mvita, biyole bia nzala, ne dikanka dia buloba. (Balayi Matayi 24:7.) Bible ukavua muambe pende ne: bikadilu bia bantu mu “matuku a ku nshikidilu” nebivuije nsombelu ‘mukole mua kupita nende.’ (2 Timote 3:1-5) Malu aa adi enzeka bikole katshia ku 1914.

3. Bua tshinyi malu mmanyanguke katshia Bukalenge bua Nzambi buatuadija kukokesha?

Katupa kîpi Yezu mumane kulua Mukalenge wa Bukalenge bua Nzambi, wakela Satana ne bademon bende mvita mu diulu. Kutshimunaye Satana. Bible udi wamba ne: Satana “wakedibua panshi pa buloba, ne banjelu bende bakedibua nende panshi.” (Buakabuluibua 12:9, 10, 12) Satana udi ne tshiji tshikole bualu mmumanye ne: nebamubutule. Nunku udi ukebesha makenga ne ntatu pa buloba bujima. Ke bualu kayi malu mmanyanguke bikole! Bukalenge bua Nzambi nebujikije ntatu yonso eyi.

BUELA MU BUONDOKE

4. Dilondangana dia bidimu bia mu Bible didi difikisha mu 1914

FILME: Bukalenge bua Nzambi buakatuadija kukokesha mu 1914 (5:02)

Nzambi wakalotesha mukalenge Nebukadenesâ wa mu Babilona wa kale tshilota tshia buprofete. Tshilota atshi ne diumvuija divua Danyele mufile bidi bileja muditshi tshitangila bukokeshi bua Nebukadenesâ ne Bukalenge bua Nzambi.​—Balayi Danyele 4:17.a

Balayi Danyele 4:20-26, pashishe nubale malu adi mu kazubu bua nuandamune nkonko eyi:

• A) Nebukadenesâ wakamona tshinyi mu tshilota tshiende?​—Tangila mvese wa 20 ne wa 21.

• B) Ntshinyi tshivua ne bua kufikila mutshi au?​—Tangila mvese wa 23.

• C) Ntshinyi tshivua ne bua kuenzeka ku ndekelu kua ‘bikondo 7’?​—Tangila mvese wa 26.

Mudi mutshi wa mu tshilota upetangana ne Bukalenge bua Nzambi

MÊYI A BUPROFETE (Danyele 4:20-36)

Bukokeshi

A) Mutshi munene

Bimanyika bukokeshi

B) “Upulayi mutshi au,” nuwushiye too ne ‘papita bikondo 7’

Dijadikulula dia bukokeshi

C) “Bukalenge buebe nebuikale buebe kabidi”

Mu dikumbana dia kumpala dia mêyi a buprofete au . . .

• D) Mutshi au uvua nganyi?​—Tangila mvese wa 22.

• E) Mmunyi muakimanyikabu bukokeshi buende?​—Balayi Danyele 4:29-33.

• F) Ntshinyi tshiakafikila Nebukadenesâ ku ndekelu kua ‘bikondo 7’?​—Balayi Danyele 4:34-36.

DIKUMBANA DIA KUMPALA

Bukokeshi

D) Nebukadenesâ, mukalenge wa Babilona

Bimanyika bukokeshi

E) Panyima pa 606 K.Y., Nebukadenesâ wakapala, kupangilaye kukokesha munkatshi mua bidimu 7

Dijadikulula dia bukokeshi

F) Nebukadenesâ wakapetulula lungenyi, kutuadijaye kukokesha kabidi

Mu dikumbana dibidi dia mêyi a buprofete au . . .

• G) Mutshi au uvua banganyi?​—Balayi 1 Kulondolola 29:23.

• H) Mmunyi muakimanyikabu bukokeshi buabu? Bua tshinyi tudi tuamba ne: too ne patshivua Yezu pa buloba kabavua anu bakokesha to?​—Balayi Luka 21:24.

• I) Bakajadikulula bukokeshi abu dîba kayi ne penyi?

DIKUMBANA DIBIDI

Bukokeshi

G) Bakalenge ba mu Isalele bavua baleji mpala ba bukokeshi bua Nzambi

Bimanyika bukokeshi

H) Bakabutula Yelushalema, kuimanyikabu dilondangana dia bakalenge ba mu Isalele munkatshi mua bidimu 2 520

Dijadikulula dia bukokeshi

I) Yezu ubanga kukokesha bu Mukalenge wa Bukalenge bua Nzambi mu diulu

5. Malu a panu mmashintuluke katshia ku 1914

Tangilayi FILME.

FILME: Malu a panu mmashintuluke katshia ku 1914 (1:10)

Yezu ukavua mumanyishe malu avua ne bua kuenzeka pavuaye ulua Mukalenge. Balayi Luka 21:9-11, pashishe nuandamune lukonko elu:

• Mmalu kayi adi mu mvese eu aukadi mudimuenene anyi aukadi mumvue menzeke?

Mupostolo Paulo wakumvuija muvua bantu ne bua kuikala mu matuku a ku nshikidilu a bukokeshi bua bantu. Balayi 2 Timote 3:1-5, pashishe nuandamune lukonko elu:

• Mbikadilu kayi biudi umona mu bantu lelu?

6. Bukokeshi bua Bukalenge bua Nzambi budi butusaka ku tshienzedi

Balayi Matayi 24:3, 14, pashishe nuandamune nkonko eyi:

• Mmudimu kayi wa mushinga udi uleja ne: Bukalenge bua Nzambi bukadi bukokesha mpindieu?

• Mmunyi muudi pebe mua kuenza mudimu au?

Bukalenge bua Nzambi bukadi bukokesha mpindieu, dituku dikalabu mua kukokesha buloba bujima dikadi pabuipi. Balayi Ebelu 10:24, 25, pashishe nuandamune lukonko elu:

• Bu mutudi ‘tumona dituku adi dienda disemena pabuipi,’ ntshinyi tshidi yonso wa kutudi ne bua kuenza?

TSHIA KUKUATA

Mêyi a buprofete, dilondangana dia bidimu bia mu Bible, ne malu adi enzeka pa buloba bidi bijadika ne: Bukalenge bua Nzambi bukadi bukokesha mpindieu. Tudi tuleja mutudi tuitabuja bualu ebu patudi tuyisha ne tubuela mu bisangilu.

Diambulula

• Ntshinyi tshiakenzeka ku ndekelu kua bikondo 7 bikavua mukanda wa Danyele mumanyishe?

• Ntshinyi tshidi tshikujadikila ne: Bukalenge bua Nzambi buakatuadija kukokesha mu 1914?

• Tshiudi mua kuenza bua kuleja ditabuja diudi nadi ne: Bukalenge ebu bukadi bukokesha mpindieu ntshinyi?

BIA KUTANGILA KABIDI

Mona tshidi bamanyi ba malu a kale ne bantu bakuabu bamba bua malu adi mashintuluke pa buloba katshia ku 1914.

“Dîba diakabanga bikadilu kunyanguka bikole menemene” (Tabulukayi! 4/2007)

Bala umone muvua mêyi a buprofete adi mu Matayi 24:14 mashintulule nsombelu wa muntu.

“Mvua munange kunaya base-ball kupita tshintu kayi tshionso!” (Tshibumba tshia Nsentedi No. 3 2017)

Bua tshinyi tudi tuamba ne: mêyi a buprofete adi mu Danyele nshapita 4 adi atangila Bukalenge bua Nzambi?

“Bukalenge bua Nzambi mbutuadije kukokesha tshidimu kayi? (Tshitupa 1)” (Tshibumba tshia Nsentedi 1/10/2014)

Tshidi tshileja ne: ‘bikondo 7’ bidi mu Danyele nshapita 4 biakajika mu 1914 ntshinyi?

“Bukalenge bua Nzambi mbutuadije kukokesha tshidimu kayi? (Tshitupa 2)” (Tshibumba tshia Nsentedi 1/11/2014)

Bukalenge bua Nzambi bukadi bukokesha. Mu katupa kîpi emu, nebushintulule malu a bungi pa buloba. Tumonayi malu mimpe aluabu kuenza.

1. Mmunyi muateka Bukalenge bua Nzambi buakane ne ditalala pa buloba?

Yezu, Mukalenge wa Bukalenge bua Nzambi, neabutule bantu babi ne mbulamatadi yabu mu mvita ya Armagedone. (Buakabuluibua 16:14, 16) Dîba adi, mulayi wa mu Bible wa ne: “Mu katupa kîpi patupu, bantu babi kabakuikalaku kabidi to,” newukumbane wonso. (Misambu 37:10) Ku diambuluisha dia Bukalenge ebu, Yezu neateke buakane ne ditalala pa buloba bujima.​—Balayi Yeshaya 11:4.

2. Nsombelu neikale mushindu kayi pikala disua dia Nzambi dienzeka pa buloba?

Pakokesha Bukalenge bua Nzambi, “bantu bakane nebapiane buloba, nebasombapu bua kashidi.” (Misambu 37:29) Anji elabi meji: bantu bonso bikale bakane, banange Yehowa, ne banange bantu nabu! Muntu nansha umue kakusama to, ne bantu bonso nebashale ne muoyo kashidi.

3. Bukalenge bua Nzambi nebuenze malu kayi pabutulabu bantu babi?

Pabutulabu bantu babi, Yezu neakokeshe munkatshi mua bidimu 1 000. Tshikondo atshi, yeye ne bantu 144 000 bakokeshaye nabu nebambuluishe bantu bua balue bapuangane, kabayi mpekatu. Pajika bidimu 1 000, buloba nebulue Mparadizu mulenga muwule ne bantu badi ne disanka bua ditumikila mikenji ya Yehowa. Pashishe Yezu neapingajile Tatuende Yehowa bukokeshi, ne ‘dîna dia Yehowa nedijidibue’ kupita kuonso eku. (Matayi 6:9, 10) Nebimueneke patoke ne: Yehowa mMukokeshi muimpe udi utabalela bantu. Pashishe, Yehowa neabutule Satana, bademon, ne bonso badi basungula bua kutombokela bukokeshi buende. (Buakabuluibua 20:7-10) Nsombelu mulenga watutuadila Bukalenge bua Nzambi neashalaku kashidi.

BUELA MU BUONDOKE

4. Bukalenge bua Nzambi nebubutule mbulamatadi ya bantu

‘Muntu udi ukokesha muntu mukuabu bua kumukengesha.’ (Muambi 8:9) Yehowa neajikije bualu ebu ku diambuluisha dia Bukalenge buende.

Balayi Danyele 2:44 ne 2 Tesalonike 1:6-8, pashishe nuandamune nkonko eyi:

• Yehowa ne Muanende Yezu nebenzele mbulamatadi ya bantu ne bonso badi bayitua mpanda tshinyi?

• Bilondeshile malu audi mulonge adi atangila Yehowa ne Yezu, bua tshinyi udi mutuishibue ne: tshienzabu netshikale tshimpe ne tshikumbane?

5. Yezu mMukalenge muimpe mutambe

Bu mudi Yezu Mukalenge wa Bukalenge bua Nzambi, neenzele bantu malu mimpe a bungi. Tangilayi FILME bua kumona mukadi Yezu muleje ne: mmusue kuambuluisha bantu, ne Nzambi mmumupeshe bukole bua kubambuluisha.

FILME: Yezu wakaleja malu ikala Bukalenge ne bua kukumbaja (1:13)

Pavua Yezu pa buloba wakalabuija bantu malu enza Bukalenge bua Nzambi. Mu mabenesha adi alonda aa, nngepi audi mutekemene ne muoyo mujima? Balayi mvese idi mielamu idi itangila dibenesha dionso.

6. Bukalenge bua Nzambi nebututuadile nsombelu mulenga

FILME: Kadiosha ka masanka a dikema alua kumpala eku (4:38)

Balayi Misambu 145:16, pashishe nuandamune lukonko elu:

• Mmunyi muudi umvua padibu bamba ne: Yehowa ‘neakumbaje dijinga dia tshintu tshionso tshidi ne muoyo?’

TSHIA KUKUATA

Bukalenge bua Nzambi nebukumbaje tshipatshila tshiabu. Nebuvuije buloba bujima Mparadizu wasamba batendeledi ba Yehowa ne muoyo kashidi.

Diambulula

• Bukalenge bua Nzambi nebujidile dîna dia Yehowa mushindu kayi?

• Bua tshinyi mbimpe kuitaba ne: Bukalenge bua Nzambi nebukumbaje milayi ya mu Bible?

• Mu malu onso enza Bukalenge bua Nzambi, ngepi audi muindile ne muoyo mujima?

BIA KUTANGILA KABIDI

Mona tshidi Armagedone umvuija.

“Mvita ya Armagedone ntshinyi?” (Tshiena-bualu tshia mu jw.org)

Mona malu enzeka mu bukokeshi bua bidimu 1 000 bua Yezu ne ku ndekelu kuabu.

“Ntshinyi tshienzeka mu Dituku dia dilumbuluisha?” (Tshibumba tshia Nsentedi 1/9/2012)

Mona mudi bena mu dîku mua kudimona mu Mparadizu.

Fuanyikija wewe mu Mparadizu (1:50)

Bala tshiena-bualu tshia “Mvua ne nkonko ya bungi ivua insamisha mutu,” umone muvua ntomboji muena tshididi mupete mandamuna a nkonko ivuaye udiela.

“Bible utu ushintulula bantu” (Tshibumba tshia Nsentedi 1/1/2012)