DILONGESHA DIA 29

Ntshinyi tshitu tshienzekela muntu padiye ufua?

Bia pa mabeji

Ukadi mufuishaku muntu uuvua munange anyi? Mu tshikondo tshia buena atshi, udi mua kumvua nkonko ikuluila mu mutu ne: ‘Ntshinyi tshitu tshienzekela muntu padiye ufua? Netumonanganaku kabidi ne betu bakadi bafue anyi?’ Mu dilongesha edi ne mu dialonda, netupete mandamuna a nkonko eyi mu Bible ikala mua kutukolesha.

1. Ntshinyi tshitu tshienzekela muntu padiye ufua?

Yezu wakafuanyikija lufu ne tulu tukole. Muntu udi mulale tulu tukole kena mua kumanya malu adi enzeka muaba udiye to. Kadi lufu ndufuanangane ne tulu ku tshinyi? Padi muntu ufua, kena umvua tshintu tshimusama, kena utata ne bunkaya to, nansha muvuaye mua kuikala munange balunda bende ne ba mu dîku diabu bikole kumpala. Bible udi wamba ne: “Bafue ki mbamanye bualu nansha bumue.”—Balayi Muambi 9:5.

2. Kumanya bulelela bua tshidi lufu kudi kutuambuluisha mushindu kayi?

Bantu ba bungi batu batshina lufu, batshina mene ne bafue! Kadi tshidi Bible wamba bua lufu tshidi mua kukukolesha. Yezu wakamba ne: “Bulelela nebunupeshe budikadidi.” (Yone 8:32) Nansha mudiku bitendelelu bidi bilongesha ne: padi muntu ufua, anyima wende utu kayi ufua udi ushala ne muoyo, Bible yeye katu wamba nanku to. Nanku, padi muntu ufua kena mua kukenga to. Kabidi, bu mudi bafue kabayi bamanye bualu nansha bumue, kabena mua kutuenzela bibi to. Ke bualu kayi katuena ne bua kubenzela mikiya ya dibalengelela anyi kubatendelela to; kabidi katuena nansha ne bualu bua kubenzela milombu to.

Kudi bantu batu bamba ne: badi mua kuyukila ne bafue. Kadi kabiena mua kuenzeka nanku to. Anu mutudi bafume ku dimona, bafue “ki mbamanye bualu nansha bumue” to. Bua badi bela meji ne: badi bayukila ne bafue babu, badibu mua kuikala bayukila nabu menemene mbademon badi badivuija bu bafue. Nanku, kumanya bulelela bua tshidi lufu kudi kutukuba kudi bademon. Yehowa mmutukandike bua kuteta mua kuyukila ne bafue, bualu mmumanye ne: kubuelakana ne bademon kudi ne njiwu.—Balayi Dutelonome 18:10-12.

BUELA MU BUONDOKE

Mona malu makuabu adi Bible ulongesha bua lufu, ukoleshe kabidi ditabuja diebe kudi Nzambi wa dinanga utu kayi ukengesha bantu bakadi bafue.

Muntu ne bana bende babidi bakese basombe pa tshibasa mu madilu a mukajende (mamuende wa bana abu) udi mufue. Balunda ne bena mu dîku diabu balue kubasamba ne kubakolesha.

3. Mona tshidi bafue menemene

Pa buloba bujima, bantu batu bamba malu mashilangane bikole a tshidi tshienzekela bantu padibu bafua. Mmuomu, malu adibu bamba au kaena anu onso malelela to.

Bantu ba muaba unudi batu bambaku ne: bafue badi mushindu kayi?

Bua kumanya tshidi Bible wamba, tangilayi FILME.

FILME: Katupa ka filme wa Ntshinyi tshitu tshienzekela muntu padiye ufua? (1:19)

Bimfuanyi bilamakaja: Bimfuanyi bia mu katupa ka filme wa ‘Ntshinyi tshitu tshienzekela muntu padiye ufua?’ 1. Tshitalu tshiladika pa bulalu mu lupitadi. 2. Muntu mulale pankatshi pa bantu babidi mu kawulu kadi mu lubilu.

Balayi Muambi 3:20, pashishe nuandamune nkonko eyi:

Bilondeshile mvese eu, padi muntu ufua tshidi tshimuenzekela ntshinyi?
Kudiku tshitupa tshia muntu tshidi tshishala ne muoyo padiye ufua anyi?

Bible udi utuambila bualu bua lufu lua Lazalo, mulunda munene wa Yezu. Panudi nubala Yone 11:11-14, nuende nutangila tshivua Yezu muambe bua lufu lua Lazalo. Pashishe nuandamune nkonko eyi:

Yezu uvua mufuanyikije lufu ne tshinyi?
Difuanyikija adi didi ditulongesha tshinyi bua tshidi tshienzekela muntu padiye ufua?
Buebe wewe, tshidi Bible wamba bua bafue etshi tshidi tshiumvuika anyi?

4. Kumanya bulelela bua tshidi lufu kudi kutuambuluisha

Kumanya bulelela pa bidi bitangila lufu kudi kutupikula ku ditshina dia bafue. Balayi Muambi 9:10, pashishe nuandamune lukonko elu:

Bafue badi mua kutuenzela bibi anyi?

Bulelela bua mu Bible budi butukuba kabidi ku dilongesha dia dishima dia ne: mbimpe kuenzela bafue mikiya ya dibalengelela anyi mene kubatendelela. Balayi Yeshaya 8:19 ne Buakabuluibua 4:11, pashishe nuandamune lukonko elu:

Buebe wewe, Yehowa udi umvua bishi padi muntu utendelela bafue anyi ukeba diambuluisha kudibu?

Bimfuanyi bilamakaja: Bilele bia malu a ntendelelu wa bakishi. 1. Muntu mutue binu usambila kumpala kua dibue dia ku lukita muikale ne biakudia bia kulambula bakishi. 2. Bantu balume basatu ba tshisa tshimue bavuale muomumue baja maja. 3. Tshisumbu tshia bantu benda mu njila bavuale bifuebe, bakuate bimfuanyi binene bia mifuba ya bantu basekelela Dituku dia bafue. — Bulelela pa bidi bitangila lufu budi butupikula ku bilele bidi binyingalaja Yehowa

5. Kumanya bulelela bua tshidi lufu kudi kutusamba

Mbalongeshe bantu ba bungi ne: padibu bafua, nebabanyoke bua malu mabi adibu benze. Kadi kumanya ne: muntu nansha umue (nansha uvua muenze malu mabi menemene) kena ukenga padiye ufua mbusambi kutudi. Balayi Lomo 6:7, pashishe nuandamune lukonko elu:

Bikalabi ne: padi muntu ufua udi ubingishibua ku mpekatu yende anu mudi mvese eu muambe, udi wela meji ne: mufue au udi ukenga dîba edi bua bilema bivuaye muenze kale anyi?

Patudi tuenda tumanya Yehowa bimpe, tudi tuenda tujingulula kabidi ne: kena mua kukengesha bafue to. Balayi Dutelonome 32:4 ne 1 Yone 4:8, pashishe nuandamune nkonko eyi:

Nzambi wa bikadilu bidibu batele mu mvese eyi udi mua kuanyisha bua kukengesha bantu bakadi bafue anyi?
Buebe wewe, bulelela budi Bible wamba bua lufu ebu budi butukolesha anyi kabuena butukolesha? Bua tshinyi?

BAMUE BATU BAMBA NE: “Ndi ne buôwa bua tshiangenzekela pangafua.”