Mua kuikala ne ngakuilu udi usankisha Yehowa

Pavua Yehowa mutufuke, wakatupesha dipa dilenga edi: mushindu wa kuakula. Ngakuilu wetu udiku ne mushinga kudiye anyi? Eyowa! (Balayi Yakobo 1:26.) Nanku mmunyi mutudi mua kutumbisha Yehowa ne ngakuilu wetu?

1. Mmunyi mutudi mua kuenza malu bimpe ne dipa dia kuakula?

Bible udi utuambila ne: “Tungunukayi ne kukankamijangana ne kukoleshangana.” (1 Tesalonike 5:11) Udiku mumanye muntu udi ukengela dikankamija anyi? Mmunyi muudi mua kumukankamija? Mujadikila ne: udi ne mushinga wa bungi kuudi. Pamuapa udi mua kumutelela bualu buutu wanyisha kudiye. Udiku mumanye mvese udi mua kukankamija muntu anyi? Kudi mvese ya bungi iudi mua kumubadila. Vuluka kabidi ne: mushindu uudi wakula udi mua kukankamija bakuabu bikole anu bu mêyi audi wamba. Nunku ikala wamba mêyi malenga misangu yonso ne dîyi dimpe.​—Nsumuinu 15:1.

2. Nngakuilu kayi utudi ne bua kuepuka?

Bible udi wamba ne: “Dîyi dibole kadipatuki mukana muenu.” (Balayi Efeso 4:29.) Abi bidi biumvuija ne: katuena ne bua kuambangana mêyi mabi a nsenda anyi a bipendu adi mua kutapa bakuabu to. Tudi kabidi ne bua kuepuka bijanu ne dishiminyinangana malu.​—Balayi Nsumuinu 16:28.

3. Ntshinyi tshiatuambuluisha bua kuakula mu mushindu udi ukankamija?

Misangu ya bungi, malu atutu tuakula atu aleja tshidi mu muoyo wetu anyi mu meji etu. (Luka 6:45) Nunku mbimpe tutume meji etu ku malu mimpe, malu adi makane, adi makezuke, adibu ne bua kunanga, ne adibu ne bua kutumbisha. (Filipoyi 4:8) Bua kuenza nanku, tudi ne bua kusungula mishindu mimpe ya kupita kapepe, ne kusungula balunda bimpe. (Nsumuinu 13:20) Mbimpe kabidi tuele meji kumpala kua tuetu kuakula. Ela meji a tshidi mêyi ebe mua kuenzela bakuabu. Bible udi wamba ne: “Mêyi mamba kaayi melela meji adi bu kutapa kua muele wa mvita, kadi ludimi lua bena meji ludi luondapu.”​—Nsumuinu 12:18.

BUELA MU BUONDOKE

4. Tabalela ngakuilu webe

Bitu bitufikila bua kuamba malu kadi tulua kunyingalala pashishe. (Yakobo 3:2) Balayi Galatiya 5:22, 23, pashishe nuandamune nkonko eyi:

• Nngikadilu kayi ya ku ngikadilu eyi iudi mua kulomba Yehowa mu disambila bua umanye mua kutabalela ngakuilu webe? Mmunyi mudi ngikadilu eyi mua kukuambuluisha?

Balayi 1 Kolinto 15:33, pashishe nuandamune lukonko elu:

• Mishindu iudi upita nayi kapepe ne balunda bebe badi mua kukusaka bua kuikala ne ngakuilu kayi?

Balayi Muambi 3:1, 7, pashishe nuandamune lukonko elu:

• Ndîba kayi didibi ne mushinga bua kupuwa anyi kuindila tshikondo tshikumbane bua kuakula?

5. Akula bimpe bua bakuabu

FILME: Amba “dîyi dimpe didi mua kukolesha bakuabu” (4:07)

• Mu filme eu, bua tshinyi muanetu au uvua musue kushintulula mushindu uvuaye wakula bua bakuabu?

• Ntshinyi tshivuaye muenze bua kushintuluka?

Balayi Muambi 7:16, pashishe nuandamune lukonko elu:

• Ntshinyi tshitudi ne bua kuvuluka patudi tumvua mua kuakula bibi bua bakuabu?

Balayi Muambi 7:21, 22, pashishe nuandamune lukonko elu:

• Mmunyi mudi mvese eyi mua kukuambuluisha bua kuakudi bibi padi muntu ukuamba mêyi mabi?

6. Ikala ne bukalanga paudi uyukila ne bena mu dîku dienu

FILME: Dinanga ne kanemu bidi bipetesha mêku buobumue (3:08)

• Tshidi mua kukuambuluisha bua kuakula bimpe ne bena mu dîku dienu ntshinyi?

Balayi Efeso 4:31, 32, pashishe nuandamune lukonko elu:

• Nngakuilu wa mushindu kayi udi mua kukolesha bena mu dîku dietu?

Yehowa wakaleja muvuaye umvua bua Muanende Yezu. Balayi Matayi 17:5, pashishe nuandamune lukonko elu:

• Mmunyi muudi mua kuidikija Yehowa mu mushindu uudi wakula ne bena mu dîku dienu?

TSHIA KUKUATA

Mêyi etu adi mua kukolesha bakuabu anyi kubatapa. Mbimpe tuikale tuela meji bikole a bitudi tuamba, dîba ditudi tubiamba, ne mutudi mua kubiamba.

Diambulula

• Ngimue mishindu kayi itudi mua kukankamija bakuabu ne mêyi etu?

• Nngakuilu kayi uudi ne bua kuepuka?

• Ntshinyi tshidi mua kutuambuluisha bua tuikale anu ne ngakuilu mulenga udi ukankamija bakuabu?

BIA KUTANGILA KABIDI

Tshidi mua kutuambuluisha bua kuikala ne ngakuilu muimpe ntshinyi?

Ikala ne ludimi lua bena meji (8:04)

Mona tshidi mua kukuambuluisha bua kuepuka ngakuilu mubi.

“Kuambangana mêyi mabole nkubi menemene anyi?” (Tshiena-bualu tshia mu jw.org)

Mona muudi mua kubenga kukuatshika mu buteyi bua bijanu bibi.

Mmunyi mundi mua kulekela kuakula bibi bua bakuabu? (2:36)

Mona muvua Yehowa muambuluishe muntu uvua udienzeja bua kulekela ngakuilu mubi.

“Ngakatuadija kuela meji bua muikala nsombelu wanyi matuku atshilualua” (Tshibumba tshia Nsentedi, 1/8/2013)