Mukanda wa kudi Kasumbu kaludiki

Bana betu bananga,

Dinanga ditudi banange Nzambi ne bantu didi ditusaka bua ‘kuya kuvuija bantu ba mu bisamba bionso bayidi, kubabatiza.’ (Mat. 28:19, 20; Mâko 12:28-31) Dinanga dia bushuwa didi ne bukole bua bungi. Didi mua kulenga mioyo ya bantu badi “bakaje muoyo wabu bimpe bua kupeta muoyo wa tshiendelele.”​—Bien. 13:48.

Ku kale, tuvua tutamba kudienzeja bua kukuata mêyi a mua kuyukila ne bantu ku muoyo ne kubapesha bibejibeji. Lelu mbimpe tudienzeje bua kulengeja mushindu wetu wa kuyukila nabu. Tudi basue kuyukila ne bakuabu malu adi abasankisha bua kuleja ne: tudi babanange. Mmumue ne: mbimpe tuye ne muntu muyayaye, tutabalela malu adi mamutonde ne adiye ujinga. Broshire eu neatuambuluishe bua kuenza nanku mushindu kayi?

Broshire eu udi ne malongesha 12 adi ne ngikadilu itudi nayi dijinga bua kumona mua kunanga bantu ne kubavuija bayidi. Dilongesha dionso ndimanyine pa bualu budi Bible ulonda buvua Yezu anyi muambi mukuabu wa mu bidimu lukama bia kumpala mulejile ngikadilu kampanda mu mudimu wa diyisha. Tshipatshila ki ntshia kukuata malu a kuambila bantu ku muoyo to, kadi ntshia kukeba mua kuleja mutudi babanange. Nansha mutudi dijinga ne yonso wa ku ngikadilu ayi mu mishindu yonso ya diyisha, netumone mudi ngikadilu mikuabu ne mushinga wa bungi patudi tutuadija kuyukila ne bantu, tubapinganyina, anyi tulonga nabu Bible.

Paudi wenda utata dilongesha dionso, ikala wela meji bimpe menemene a mudi ngikadilu au mua kumueneka kuudi paudi uyukila ne bantu ba muaba uudi musombele. Dienzeja bua kunanga Yehowa ne bantu bikole. Dinanga adi ndipite tshikuabu tshionso tshiudi mua kuenza tshiakuambuluisha bua kukumbaja tshipatshila tshiebe tshia kuvuija bantu bayidi.

Tudi ne dianyisha bua diakalenga dinene ditudi nadi dia kuenza nenu mudimu dikaya dituangane ne dikaya dikuabu. (Sef. 3:9) Yehowa anubeneshaku bikole panudi nutungunuka anu ne kunanga bantu ne kubavuija bayidi!