Bana babu ne Yosefe bakamumvuila mukawu! Utu pebe umvuilangana mukawu anyi?

TUANJI tuambe tshidi kumvuilangana mukawu kumvuija. Bikadiku bikukolele bua kunanga muntu kampanda bualu bantu bakuabu badi bamuanyisha mudiye muena malu malenga, muimpe kumona anyi?a— Ke tshitu tshienzeka padi muntu yeye mumvuile mukuabu mukawu.

Mukawu udi mua kumueneka mu dîku padi baledi batamba kunanga muana umue kupita bakuabu. Bible udi wakula bua dîku dikuabu divua dipete lutatu lunene bua mukawu. Tuanji tuakulayi bua lutatu ludi mukawu ukebesha ne dilongesha ditudi tupetela ku tshivua tshienzeke.

Yosefe uvua muana wa 11 wa Yakoba, kadi bana bavua Yakoba mulele ne bakaji bakuabu bavua bumvuile Yosefe mukawu. Udi mumanye bua tshinyi anyi?— Bualu tatuabu Yakoba uvua munange Yosefe bikole. Tshilejilu, Yakoba uvua muenzele Yosefe muzabi muimpe wa mishonyi mishonyi. Yakoba uvua mutambe kunanga Yosefe ‘bualu wakadi muana wakaleleye ku bununu buende’ ne muana wa kumpala kua mukajende Lakele uvuaye munange bikole.

Bible udi wamba ne: ‘Bana babu ne Yosefe bakamona ne: dinanga dia tatuabu kudiye divua dikole menemene, bobu kukina Yosefe.’ Pashishe, dimue dituku Yosefe kulondela bena mu dîku diabu ne: uvua mulote buobu buonso bamutuila binu, too ne tatuende. Bua bualu ebu Bible udi wamba ne: ‘Bana babu bakadi nende mukawu,’ too ne tatuende wa Yosefe wakamutandisha bua tshilota atshi.​—Genese 37:1-11.

Pavua Yosefe ne bidimu 17, bana babu bavua baye ntanta mule bakadisha mikoko ne mbuji ya tatuabu. Ke Yakoba kutuma Yosefe bua kuya kamona bana babu aba. Udi mumanye tshivua ba bungi ba kudibu basue kumuenzela pavuabu bamumone ulua anyi?— Bavua basue kumushipa. Kadi, Lubena ne Yuda kabavua basue kumushipa to.

Pavua bangenda-mushinga bavua baya ku Ejipitu bapita, Yuda kuamba ne: ‘Tuye kumupana.’ Ke bobu kumupana. Pashishe, bobu kushipa mbuji, e kutua muzabi wa Yosefe mu mashi. Bobu kuya kuleja tatuabu muzabi au; padiye uumona kudilaye wamba ne: ‘Nyama mubi wakadia Yosefe.’​—Genese 37:12-36.

Kabidi, Palô mukalenge wa Ejipitu wakananga Yosefe bikole bualu Nzambi uvua muambuluishe Yosefe bua kumumvuija bilota biende bibidi. Tshilota tshia kumpala tshivua tshia ngombe 7 ya manyi ne mikuabu 7 minyane bua masama. Tshilota tshibidi tshivua tshia miepu 7 mimpe ne mikuabu 7 mifubidile. Yosefe wakamba ne: bilota bionso bibidi bivua ne diumvuija dimue dia ne: nekuikale bidimu 7 bia biakudia bia bungi, ne nekulonde bidimu bikuabu 7 bia nzala. Ke Palô kutuma dîyi bua bateka Yosefe bua kulombola ne kutangila bilaminu bionso bia biakudia, bua kulama biakudia bia bungi bua tshikondo tshialua nzala.

Pakalua nzala, bana babu ne Yosefe bavua dijinga ne biakudia, nansha muvuabu basombele kule. Yakoba wakatuma bana babu ne Yosefe 10 mu Ejipitu bua kuya kukeba biakudia. Bakalua kumpala kua Yosefe, kadi kabatshivua bamumanye kabidi to. Yosefe kakadimanyisha kudibu to, kadi wakabateta ne kumonaye ne: bavua banyingalala bua malu mabi avuabu bamuenzele. Pashishe Yosefe kuluaye kudimanyisha kudibu. Bakelangana mu tshitupa, kusankabu bikole!​—Genese, nshapita 40 too ne 45.

Ndilongesha kayi diudi mua kupetela ku muyuki eu?— Mukawu udi mua kufikisha muntu ku lutatu lukole, mufuana kumufikisha ku dikina ne muanabu. Tuanji tubale Bienzedi 5:17, 18 ne Bienzedi 7:54-59 bua kumvua muvua mukawu mufikishe bantu ku dienzela bayidi ba Yezu malu mabi.— Wewe mumane kubala mvese eyi, udi mumvue bua tshinyi tudi ne bua kulekela mukawu anyi?—

Yosefe wakalala bidimu 110 pa buloba. Wakalela bana, bana bende kulelanganabu pabu, bana ba bana bende aba kulela pabu bana, yeye anu ne muoyo. Tudi mua kuamba ne: Yosefe uvua ubalongesha pa tshibidilu bua kunangangana ne kubenga kuikala ne mukawu.​—Genese 50:22, 23, 26.