Bua tshinyi kunemeka bakulakaje?
KU MUELELELU kua mbuu mu Californie (mu ditunga dia États-Unis) kudi mutshi wa ku mitshi itu bantu batamba kukuata foto bikole. Batu babikila mutshi au ne: Sapen wa pa nkayende. Batu bamba mukadi mutshi au ne bidimu bipite pa 250. Mudi bantu bamanye mutshi mulengele kumona au bua dijoboka diawu, batu bawutabalela mishindu mishilashilangane. Tshilejilu, mbawusuike nshinga mikole bua kuwulama anu muimane, bawibakile ne tshibumba tshia mabue tshiwunyunguluke ku tshitaku.
Mutshi wa Sapen au udi utuvuluija bena Kristo bakulakaje badi munkatshi muetu badi bashale anu ne lulamatu lua bungi kabayi batshioka to. Mushindu mutambe bunene udibu baleja dinanukila diabu ngua mudibu bayisha lumu luimpe lua Bukalenge. Muprofete Yoele wakadianjila kumanyisha muvua “bakulumpe” aba mua kuyisha malu adi mu Bible. (Yoe. 2:28-32; Bien. 2:16-21) Anji elabi meji a bungi bua mêba adibu benza ne muoyo mujima bua kuambuluisha bakuabu bua kumvuabu ‘lumu luimpe lua Bukalenge.’ (Mat. 24:14) Bamue ba ku bayishi netu ba Bukalenge bakulakaje aba mbananukile bidimu bia bungi bidibu babakengesha anyi mu ntatu mikuabu. Bikala bantu bamanya Sapen wetu wa patupu eu bimpe anu bua dilala bidimu bia bungi, bamuashila ne tshibumba tshia mabue, bamusuika nshinga bua kumushiya anu muimane, ki mbimpe tuetu kutamba kupesha kabidi bana betu bakadi bakulakaje kanemu kakole ne buneme buonso anyi?
Yehowa uvua muambile bantu bende kale ne: ‘Uleje kanemu kudi muntu udi ne nsuki mitoke tô, unemeke muntu mununu.’ (Lew. 19:32) Munkatshi mua batendeledi ba Yehowa ba lelu mudi kabidi bana betu ba lulamatu badi bilejilu bilenga badi ‘bende ne Nzambi’ mu makumi a bidimu. (Mika 6:8) Padibu batungunuka ne kutumikila malu adi mu Bible, nsuki yabu mitoke idi bushuwa “tshifulu tshia butumbi.”—Nsu. 16:31.
Mupostolo Paulo wakambila Timote ne: “Kutandishi mukulakaje.” Kadi Timote uvua ne bua ‘kumubela bu tatu’ ne ‘bakaji bakole bu bamamu.’ (1 Tim. 5:1, 2, MMM) Mu kuamba kuimpe, Timote uvua ne bua ‘kuleja kanemu’ kumpala kua muntu mununu. Nanku bidi biumvuika ne: Yehowa mmusue bua tuikale ne kanemu ka nunku mu ngakuilu wetu.
Lomo 12:10 udi wamba ne: ‘Mu buneme muntu ne muntu ateke mukuabu kumpala.’ Batangidi badi mu bisumbu bia bena Kristo mbatu benzela bena Kristo bakulakaje malu a buneme menemene. Kadi tuetu bonso kabidi tudi ne bua kuikala ba kumpala badi bambikangana buneme.
Mu bulelela, bena dîku mbadi nangananga ne dibanza dia kutangila majinga a baledi babu ne bakakuabu. Mu bualu bua Sapen wa pa nkayende (utukavua batele), bantu mbakebe mishindu idibu mua kumulama anuku, kabidi batshidi anu bamutshiunga. Nanku tudi petu bushuwa ne bua kukeba mishindu ya kuambuluisha baledi betu bakulakaje ne bakakuetu bua kulama buneme buabu. Tshilejilu, kubateleja bimpe nekutukande bua kubenga kusunsuma bua kuenza anu malu mutudi tuetu basue katuyi tutangila tshidibu pabu bajinga nansha.—Nsu. 23:22; 1 Tim. 5:4.
Bantu banunu badi munkatshi muetu badi ne mushinga wa bungi ku mêsu kua Yehowa. Yeye kena ubalekela nansha. (Mus. 71:18) Nzambi udi mene ubakolesha bua batungunuke ne kumuenzela mudimu ne lulamatu. Nanku tutungunukayi petu ne kuambuluisha banunu betu ne kubanemeka!
[Tshimfuanyi mu dibeji 7]
Mudi Sapen wa pa nkayende dijinga ne kumutshiunga ke mudi bantu banunu bajinga kubenzela malu a buneme ne kubanemeka
[Mêyi a dianyisha]
Bimfuanyi bia American Spirit/age fotostock