Tupetayi masanka kudi Mukalenge udi nyuma wa Nzambi ulombola
‘Nyuma wa Yehowa neashikame pambidi pende.’—YESH. 11:2.
1. Ntshinyi tshidi bamue bantu bambe bua bilumbu bidi pa buloba?
STEPHEN HAWKING mumanyi wa malu a mabulungu wakebeja mu 2006 wamba ne: “Mu buloba budi malu a tshididi ne a nsombelu wa bantu ne bintu binyanguke, mmunyi mudi bukua bantu mua kushala ne muoyo bidimu bikuabu 100?” Tshiena-bualu tshia mu tshikandakanda tshikuabu tshiakamba ne: “Katuena bajikije bupele anyi bafile ditalala pa buloba to. Kadi mbimueneke ne: tudi benze anu bia tshianana. Kabiena biumvuija ne: katuena batete kuenza tshintu nansha tshimue to. Tudi batete mishindu yonso ya mbulamatadi, kubangila ku idi ne dîyi pa malu onso a mpetu a mu ditunga too ne eyi idi ilekela bantu badienzela tshidibu basue mu malu a mpetu; tudi benze Nsangilu wa matunga ne bunguije bingoma binene bua kukanda mvita. Tudi baluangane ‘mvita ya bungi bua kujikija mvita,’ tuela meji ne: tudi bamanye mua kujikija mvita.”—New Statesman.
2. Mmunyi mualeja Yehowa bukokeshi buende pa buloba mu katupa kîpi emu?
2 Mêyi a nunku kaena akemesha Bantemu ba Yehowa to, bualu Bible udi wamba ne: Nzambi kavua mufuke bantu bua badilombole to. (Yel. 10:23) Yehowa nkayende ke udi mukumbane bua kuikala Mfumuetu. Yeye ke udi mukumbane bua kutuelela mikenji, kutuleja tshipatshila tshitudi ne bua kuikala natshi ne kutulombola bua kutshikumbaja. Pashishe mu katupa kîpi emu, nealeje bukokeshi buende pabutulaye mbulamatadi idi bantu benze bua kudilombola. Neabutule kabidi bantu bonso badi babenga bumfumu buende ne badi bashiya bantu ku bupika bua bubi, bua dipanga bupuangane ne bua Satana Diabolo “nzambi wa tshikondo etshi.”—2 Kol. 4:4.
3. Ntshinyi tshivua Yeshaya muambe bua Masiya?
3 Mu Mparadizu, Yehowa neakokeshe bantu mu mushindu muimpe ku diambuluisha dia Bukalenge bua Masiya. (Dan. 7:13, 14) Yeshaya wakamba bua mukalenge wa Bukalenge abu ne: ‘Lutonga nelutoloke ku tshikuku tshia Yishai, ne ditamba dia ku miji yende nedikuame mamuma. Nyuma wa Yehowa neashikame pambidi pende, nyuma wa meji ne wa kujingulula kua malu, nyuma udi umukuatshisha ne meji ne bukole, nyuma wa kumanya Yehowa ne wa kumunemeka.’ (Yesh. 11:1, 2) Mmu mishindu kayi misunguluke mudi nyuma wa Nzambi mupeshe Yezu Kristo ‘lutonga lua ku tshikuku tshia Yishai’ bukole bua kukokesha bantu? Bukokeshi buende nebutuadile bantu masanka kayi? Tudi ne bua kuenza tshinyi bua kuapeta?
Nzambi mmumupeshe bukole bua kukokesha
4-6. Ndimanya kayi dia mushinga mukole didi diambuluisha Yezu bua kuikala Mukalenge, Muakuidi Munene ne Mulumbuluishi wa meji udi umvuila bantu?
4 Yehowa mmusue bua Mukalenge, Muakuidi Munene, Mulumbuluishi wa meji ne udi umvuila bantu afikishe bantu badi bakokela bumfumu buende ku bupuangane. Ke bualu kayi Nzambi wakasungula Yezu Kristo udi mukumbane ku diambuluisha ne nyuma muimpe bua kukumbaja midimu minene eyi. Tukonkonone amue malu adi enza bua Yezu akumbaje midimu idi Nzambi mumupeshe bimpe menemene.
5 Yezu mmumanye Nzambi bimpe menemene. Muana mulela umue eu mmumanye Tatu kukadi bidimu bia bungi menemene kupita muntu kayi yonso, mmumumanye pamuapa munkatshi mua bidimu binunu ne binunu. Munkatshi mua bidimu ebi, Yezu uvua mumanye Yehowa bikole menemene, ke bualu kayi badi bamubikila ne: ‘tshifuanyikiji tshia Nzambi udi kayi mua kumueneka.’ (Kolos. 1:15) Yezu muine wakamba ne: “Wakuntangila meme wakutangila Tatu.”—Yone 14:9.
6 Pa kumbusha Yehowa, Yezu mmumanye bikole bifukibua bionso too ne bantu. Kolosai 1:16, 17 udi wamba ne: ‘Bualu bua munda mua Muana wa Nzambi muakafukibua bintu bionso bia mu diulu ne bia pa buloba, ne bintu bidi bimueneka ne bintu bidi kabiyi bimueneka. Ne yeye udi kumpala kua bintu bionso ne bintu bionso bidi bikuatakaja munda muende.’ Elabi meji bua bualu ebu! Bu muvua Yezu “muena mudimu” munene wa Nzambi, wakamuambuluisha bua kufuka bintu bikuabu bionso. Ke bualu kayi mmumanye kalu ne kalu konso kadi katangila bifukibua bionso bia mu diulu ne bia pa buloba too ne bongo bua bantu budi bukemesha bikole. Bushuwa, Kristo mmeji adibu bakuila mu Bible.—Nsu. 8:12, 22, 30, 31.
7, 8. Mmunyi muvua nyuma wa Nzambi muambuluishe Yezu mu mudimu wende pa buloba?
7 Nzambi wakapesha Yezu nyuma muimpe. Yezu wakamba ne: ‘Nyuma wa Nzambi udi pambidi panyi, bualu bua yeye wakangela manyi pa mutu ne: Ambila bantu bapele lumu luimpe; Yeye wakuntuma ne: Ambila bena lukanu bualu bua dikopoka diabu, ne bafofo bualu bua kutabaja kua mêsu abu, upe badi batata budishikaminyi, ambila bantu bualu bua tshidimu tshiakitabuja Mukalenge.’ (Luka 4:18, 19) Bidi bimueneka ne: pakatambula Yezu, nyuma muimpe wakamuvuluija malu avuaye mulonge kumpala kua kuluaye pa buloba, too ne malu avua Nzambi musue bua enze pa buloba bu Masiya.—Bala Yeshaya 42:1; Luka 3:21, 22; Yone 12:50.
8 Bu muvua Yezu ne bukole bua nyuma muimpe ne muikale mupuangane mu mubidi ne mu meji, kavua anu muntu mutambe bunene wa katshia ne katshia to, kadi uvua kabidi mulongeshi munene. Ke bualu kayi ‘diyisha diende divua dikemesha’ bantu bavua bamuteleja. (Mat. 7:28) Tshia kumpala, Yezu uvua mumanye tshidi tshikebesha ntatu ya bantu mbuena kuamba ne: malu mabi, dipanga bupuangane ne dipanga kumanya Nzambi. Uvua kabidi ne bukokeshi bua kumona tshivua mu mioyo ya bantu ne kubenzela malu bilondeshile tshivuabu.—Mat. 9:4; Yone 1:47.
9. Mmunyi mudi malu avua menzekele Yezu pa buloba akusaka bua kueyemena bumfumu buende?
9 Yezu mmuntu uvua musombe pa buloba. Malu avua mamuenzekele pa buloba ne disomba ne bantu bapange bupuangane diakamuambuluisha bikole bua kuikala Mukalenge muimpe. Mupostolo Paulo wakafunda ne: ‘Buakadi Yezu nabu mbua kufuanyikijibua bu bana babu mu malu onso, bua yeye alue muakuidi munene wa luse ne wa kueyemenyibua mu malu adi a Nzambi, bua kufilaye milambu ya kubuikidila nayi bantu mibi yabu. Bualu bua yeye nkayende wakakenga pakateyibuaye, yeye udi mumanye mua kukuatshisha badi bateyibua.’ (Eb. 2:17, 18) Bu muvua Yezu ‘muteyibue’ udi mua kumvuila bantu badi batetshibua. Pavuaye pa buloba wakaleja muvuaye umvuila bantu. Tshilejilu, bantu bavua basama, bavua ne bulema, bavua bakenga too ne bana bavua balua kudiye kakuyi lutatu. (Mâko 5:22-24, 38-42; 10:14-16) Uvua ukoka kabidi bapuekele ne bavua basue kulonga malu a Nzambi. Kadi bena lutambishi ne bavua ‘kabayi ne dinanga dia Nzambi munda muabu’ bavua bamukine, bavua bamubenga ne bamuluisha.—Yone 5:40-42; 11:47-53.
10. Mmu mushindu kayi munene muvua Yezu mutuleje dinanga?
10 Yezu wakatufuila. Imue misangu muvua Yezu muitabe bua kulua kutufuila ke tshijadiki tshitambe bunene tshidi tshileja ne: mmukumbane bua kukokesha. (Bala Musambu wa 40:6-10.) Kristo wakamba ne: ‘Kakuena muntu udi ne dinanga didi ditambe edi, dia muntu udi ufuila balunda bende.’ (Yone 15:13) Yezu mmushilangane ne bakokeshi bapange bupuangane batu bapeta nsombelu muimpe ku diambuluisha dia makuta adibu bapeta kudi bantu babu, bualu yeye wakafuila bantu.—Mat. 20:28.
Udi ne bukokeshi bua kutupesha masanka a mulambu wende
11. Bua tshinyi tudi mua kueyemena Yezu mupikudi wetu mu malu onso?
11 Bu mudi Yezu muikale Muakuidi Munene mbikumbanyine bua atupeteshe masanka a mulambu wende. Pavua Yezu pa buloba, wakaleja tshikalaye mua kuenza bu mupikudi wetu mu bukokeshi buende bua bidimu tshinunu. Netuikale mu bukokeshi amu tuetu bashale ne lulamatu kudi Nzambi. Tshilejilu, wakondopa babedi ne balema, kubisha bafue, kudisha bisumbu bia bantu ne kutalaja mpepele. (Mat. 8:26; 14:14-21; Luka 7:14, 15) Kakenza malu aa bua kudileja to, kadi wakaenza bualu uvua munange bantu ne ubumvuila luse. Wakambila muena nsudi uvua umusengelela bua amuondope ne: “Ndi musue.” (Mâko 1:40, 41) Yezu neikale ne luse lua nunku mu bukokeshi buende bua bidimu tshinunu kudi bantu ba pa buloba bujima.
12. Yeshaya 11:9 neakumbane bishi?
12 Kristo ne bantu bakokesha nende nebatungunuke kabidi ne mudimu wa kulongesha bantu malu a Nzambi, mudimu uvua Yezu mutuadije kukadi bidimu 2 000. Dîba adi mêyi adi mu Yeshaya 11:9 neakumbane: ‘Buloba nebuikale buule tente ne kumanya kua Yehowa, bu mudi mâyi a mu mâyi manene abuikila miaba yawu yonso.’ Kakuyi mpata, mu dilongesha edi nemuikale malu a kuenza bua kulama buloba ne bintu bivule bidipu anu bu muvua Nzambi muambile Adama bua kuenza ku ntuadijilu. Ku ndekelu kua bidimu tshinunu, disua dia Nzambi didi mu Genese 1:28 nedikale dimane kukumbana ne masanka adi afumina ku mulambu wa Yezu neikale pawu mamane kukumbana onso.
Udi ne bukokeshi bua kulumbuluisha
13. Mmunyi muvua Yezu muleje ne: uvua munange buakane?
13 Kristo mmuntu ‘wakusungudibua kudi Nzambi bua kuikala Mulumbuluishi wa badi ne muoyo ne wa bafue.’ (Bien. 10:42) Nunku kumanya ne: kabena mua kukosa Yezu mishiku, ne buakane ne lulamatu bidi bu mukaba wa mu tshimonu tshiende kudi kutukolesha ku muoyo. (Yesh. 11:5) Wakaleja muvuaye mukine lukuka, lubombo ne malu mabi makuabu ne uvua upisha bantu bavua basanka bua dikenga dia bakuabu. (Mat. 23:1-8, 25-28; Mâko 3:5) Yezu wakaleja kabidi ne: tshimuenekelu tshia muntu katshivua tshimushima to, bualu ‘yeye mene uvua mumanye malu a munda mua bantu.’—Yone 2:25.
14. Mmu mushindu kayi mudi Yezu uleja mudiye munange malu mimpe ne buakane mpindieu? Nnkonko kayi itudi ne bua kudiela?
14 Yezu udi utungunuka ne kuleja mudiye munange malu mimpe ne buakane padiye ulombola mudimu munene wa kuyisha ne kulongesha bantu pa buloba bujima wikala kauyi mua kuenzeka kabidi to. Kakuena muntu anyi mbulamatadi peshi nyuma mubi udi mua kuimanyika mudimu eu bua kuenzekawu mudi Nzambi musue to. Nunku tudi bashindike ne: pajika mvita ya Armagedone, buakane bua Nzambi nebuikale miaba yonso. (Bala Yeshaya 11:4; Matayo 16:27.) Diebeja ne: ‘Ndiku ngenzela bantu bandi nyisha malu bu Yezu anyi? Ndiku ngenzela Yehowa mudimu ne bukole buanyi buonso, nansha makanda anyi a mubidi anyi nsombelu wanyi umpangisha mua kuenza mudimu wa bungi anyi?’
15. Ntshinyi tshitudi mua kuvuluka tshidi mua kutuambuluisha bua kuenzela Nzambi mudimu ne muoyo mujima?
15 Kuvuluka ne: kuyisha mmudimu wa Nzambi nekutuambuluishe bua kumuenzela mudimu ne muoyo wetu mujima. Yeye ke wakatupeshawu, mmuteke Muanende bua kuulombola ne udi ukolesha badi bawenza ne nyuma wende. Udiku wanyisha diakalenga diudi nadi dia kuikala muenzejanganyi wa mudimu ne Nzambi pamue ne Muanende udi nyuma ulombola anyi? Pa kumbusha Yehowa kakuena muntu uvua mua kusaka bantu bapite pa miliyo muanda mutekete bua kuyisha lumu lua Bukalenge bua Nzambi kudi bantu ba mu matunga 236. Bantu bavule badi bamona bantu ba bungi badi bayisha aba bu bantu badi ‘kabayi bamanye mikanda, bantu ba patupu.’—Bien. 4:13.
Nupete masanka ku butuangaji bua Kristo
16. Genese 22:18 udi uleja tshinyi bua masanka a kudi Nzambi?
16 Yehowa wakambila Abalahama ne: ‘Bisamba bionso bia pa buloba nebisanke bualu bua tunkanunuina tuebe, bualu bua wewe wakatumikila dîyi dianyi.’ (Gen. 22:18) Bualu ebu budi bumvuija ne: bantu badi banyisha diakalenga dia kuenzela Nzambi ne Muanende mudimu badi mua kutekemena ne muoyo wabu mujima masanka ikala Masiya ne bua kubapetesha. Badi benza mudimu lelu bela meji ku masanka au.
17, 18. Ntshinyi tshivua Yehowa mulaye mu Dutelonome 28:2? Tshidi tshiumvuija tshinyi buetu tuetu?
17 Nzambi wakambila tshisamba tshia Iselele tshivua tshienza ne tunkanunuina tua Abalahama ne: ‘Masanka aa onso (adibu batele mu tshipungidi tshia Mikenji) nealue kunudi, neanupete, binuatumikila dîyi dia Yehowa, Nzambi wenu.’ (Dut. 28:2) Mêyi aa adi akumbanyina kabidi batendeledi ba Nzambi lelu. Nuenu basue kupeta masanka a kudi Yehowa, tungunukayi ne ‘kutumikila’ dîyi diende. Dîba adi, mabenesha ‘nealue kunudi, neanupete.’ Kadi ‘kutumikila’ kudi kumvuija tshinyi?
18 Kutumikila kudi kulomba kuangata ne mushinga malu adi mu Bible ne adi Nzambi utulongesha. (Mat. 24:45) Kudi kumvuija kabidi kulonda tshidi Nzambi ne Muanende batuambila. Yezu wakamba ne: ‘Bantu batu bambikila ne: Mukalenge, Mukalenge, kabena babuela bonso mu bukalenge bua mu diulu, anu yeye utu wenza bu mudi Tatu wanyi udi mu diulu musue.’ (Mat. 7:21) Kutumikila Nzambi kudi kumvuija kabidi kukokela tshisumbu tshia bena Kristo tshidi Nzambi muteke ne bakulu badimu badi bikale ‘mapa.’—Ef. 4:8.
19. Mmushindu kayi mukuabu utudi mua kupeta masanka a kudi Nzambi?
19 Munkatshi mua bakulu badi bikale ‘mapa’ tudi ne bena mu Kasumbu Kaludiki badi benza mudimu bu baleji mpala ba tshisumbu tshijima tshia bena Kristo. (Bien. 15:2, 6) Mushindu utudi tuenzela bana babu ne Kristo aba malu udi ne mushinga, bualu nebatulumbuluishe palua dikenga dinene bilondeshile malu aa. (Mat. 25:34-40) Nunku mushindu mukuabu utudi mua kupeta masanka a kudi Nzambi mpatudi tukuatshisha bantu badi Nzambi muele manyi.
20. (a) Mmudimu kayi munene udi nawu bantu badi bikale ‘mapa’? (b) Mmunyi mutudi mua kuleja ne: tudi tuanyisha bana betu aba?
20 Munkatshi mua bantu badi bikale ‘mapa’ aba mudi kabidi bantu bonso badi nyuma wa Nzambi muteke bu mudi bena mu Komite ya filiale, batangidi bena ngendu ne bakulu ba mu tshisumbu. (Bien. 20:28) Mudimu wa kumpala wa bana betu aba ngua kukolesha bantu ba Nzambi ‘too ne papeta buonso buobumue bua ditabuja ne bua kumanya kua Muana wa Nzambi, too ne pafikabu ku mulongo wa muntu mukole, too ne ku luidi lua dikola didi mu tshiuwidi tshia Kristo.’ (Ef. 4:13) Kadi mbantu bapange bupuangane anu bu tuetu. Nansha nanku, tudi tupeta masanka patudi tuanyisha mushindu udibu batulombola ne dinanga.—Eb. 13:7, 17.
21. Bua tshinyi tudi ne bua kutumikila Muana wa Nzambi mpindieu?
21 Mu katupa kîpi emu, Kristo neabutule bulongolodi bubi bua Satana. Penzeka bualu abu, mioyo yetu neikale mu bianza bia Yezu bualu yeye ke udi Nzambi mupeshe bukokeshi bua kulombola bena mu “tshisumbu tshinene tshia bantu” tshikavua Bible muakule bualu buatshi ku ‘mishimi ya mâyi a muoyo.’ (Buak. 7:9, 16, 17) Nunku tuenzayi muetu muonso mpindieu bua kukokela ne dianyisha dionso Mukalenge udi nyuma wa Yehowa ulombola.
Ntshinyi tshidi mvese eyi ikulongesha . . .
• Genese 22:18?
[Tshimfuanyi mu dibeji 17]
Luse lua Yezu luakamueneka pakajulaye muana wa bakaji wa Yailo
[Tshimfuanyi mu dibeji 18]
Yezu Kristo udi ulombola mudimu munene wa diyisha wikala kauyi mua kuenzeka kabidi