Bua tshinyi mbimpe kutumikila mibelu ya mu Bible?

MMUENENU wa Bible bua dimanyangana ukadiku mupitshile matuku ne mmupite bukole anyi? Tòo. Mmuenenu wa Bible bua dimanyangana udi mua kutuambuluisha bua kuepuka malu aa:

▪ Masama a mu bilamba

▪ Mafu a panshi

▪ Tunyinganyinga tudi tufumina ku dishipa dibaka

▪ Dishala ne kuondo ka muoyo kapampakana

▪ Dipuekeshibua milongo kudi bakuabu

Yehowa Nzambia Mufuki wetu mmusue bua tuenze mudimu bimpe ne bintu bidiye mutupeshe bua tupete masanka. Nzambi “udi ukuyisha bua wewe wikale ne diakalengele.” (Yeshaya 48:17) Padi muntu utumikila mibelu ya mu Bible idi yakula bua dimanyangana, udi upeta masanka aa:

▪ Dianyishibua dia kudi Nzambi

▪ Ditalala dia mu lungenyi

▪ Nsombelu muimpe mu dîku

▪ Lumu luimpe kudi bakuabu

▪ Kudimone ne mushinga

Kadi netuambe tshinyi biwikale kuyi utumikila mibelu ya mu Bible idi itangila malu a bikadilu? Kudiku mushindu wa wewe kushintulula nsombelu webe anyi? Nzambi udiku mua kukubadila malu mabi auvua muenze kale anyi?

Tuangate tshilejilu etshi: Mu tshisumbu tshia bena Kristo ba kumpala kuvua bamue bantu bavua kumpala bena tshiendenda, bena masandi ne bamue bavua balume bavua bangatangana ne balume nabu. Kadi bakashintulula nsombelu wabu ne Nzambi kubabuikidilaye mibi yabu. (1 Kolinto 6:9-11) Lelu, kudi bantu ba bungi pa buloba bujima badi bashintulule pabu nsombelu wabu anu bu bena Kristo ba kale aba. Mbalekele buendenda ne mbapeta masanka adi afumina ku ditumikila dia mibelu ya mu Bible. Tangila tshilejilu tshia malu avua mafikile Sarah utudi batele mu tshiena-bualu tshia kumpala.

“Ngakumvua disulakana diakamue”

Sarah wakamone ne: nsombelu uvuaye nende wa kuenza tshivuaye musue kavua mumupeteshe budikadidi ne disanka bivuaye ujinga to. Udi wamba ne: “Kuondo kanyi ka muoyo kavua kapape. Mvua ngumvua bundu ne bivua bintonda bualu mvua mua kupeta difu dia panshi anyi kupeta disama dia lufu. Mvua anu mumanye ne: Nzambi udiku, ne nsombelu wanyi uvua umunyingalaja. Tshitshivua mukezuke to; malu amvua ngenza avua anyangila nsombelu.”

Ndekelu wa bionso, Sarah wakapeta bukole bua kushintulula nsombelu wende. Wakakeba diambuluisha kudi baledi bende badi Bantemu ba Yehowa. Wakakeba kabidi diambuluisha kudi bakulu ba mu tshisumbu tshiabu. Sarah udi wamba kabidi ne: “Mvua mukema bikole bua malu mimpe avua baledi banyi ne bakulu bangenzele ne dinanga dionso. Ngakumvua disulakana diakamue.”

Lelu Sarah udi udikoleshila bana babidi. Udi wamba ne: “Ntu ngambila bana banyi patoke malu amvua muenze ne mapangadika amvua muangate. Ndi musue bua bumvue bimpe ntatu imvua mupete bua dibenga kutumikila mibelu ya mu Bible. Ndi musue kubambuluisha bua bamanye ne: kutumikila mikenji ya Nzambi idi itangila dimanyangana kudi kupetesha masanka ku mubidi ne mu lungenyi. Ndi mujadike ne: Nzambi udi utupesha mibelu idi itangila bikadilu bualu ki mmusue bua tukenga to.”

Udi pebe mua kupeta masanka wewe ulonda mibelu idi Nzambi ufila ne dinanga dionso. Bible udi ulaya ne: ‘Mêyi a Yehowa adi malelela, adi asankisha mutshima; mukenji wa Yehowa udi mulengele, udi utandula mêsu a bantu. Mu kutumikila kuabi mudi bukenji bunene.’​—Musambu 19:8, 11.b

[Mêyi adi kuinshi]

[Lungenyi lunene lua mu dibeji 8]

Bantu batu babenga kutumikila mibelu ya mu Bible batu misangu ya bungi bapeta ntatu

[Lungenyi lunene lua mu dibeji 9]

Bantu batu batumikila mibelu ya mu Bible badi ne kuondo ka muoyo kimpe ne nsombelu muimpe mu dîku