Armagedone​—Bamue bantu batu bamba tshinyi bua bualu buende?

‘Bakabasangisha mu muaba udibu babikila mu muaku wa tshiena Ebelu ne: Armagedone.’​—BUAKABULUIBUA 16:16.

PAUDI umvua bakula bua ‘Armagedone,’ utu wela meji ne: ntshinyi? Misangu ya bungi bantu batu bela meji ku bikumina binene. Nansha mudi muaku Armagedone usanganyibua anu musangu umue mu Bible, kadi badi batamba kuwutela mu bikandakanda, ku televizion, ku bisanji ne kudi bamfumu ba bitendelelu.

Mmuenenu udi nende bantu ba bungi bua Armagedone udiku upetangana ne tshidi Bible wamba anyi? Diandamuna dia lukonko elu didi ne mushinga. Bua tshinyi? Bualu kumanya bulelela pa bidi bitangila Armagedone kudi mua kumbusha buôwa buudi nabu bua patupu, kudi mua kulengeja mushindu uudi umona matuku atshilualua ne kushintulula muutu wela meji bua Nzambi.

Tuanji tukonkonone nkonko isatu idi ilonda eyi ne tutete kufuanyikija mmuenenu idi nayi bantu bua Armagedone ne tshidi Bible ulongesha menemene.

1. ARMAGEDONE NTSHIKUMINA TSHIKEBESHA KUDI BANTU ANYI?

Bakamona kamba ne benji ba makebulula batu batamba kutela muaku ‘Armagedone’ bua kuakula bua bikumina bikebesha kudi bantu. Tshilejilu, bavua bangate Mvita ya kumpala ne mibidi ya buloba bujima bu Armagedone. Mvita eyi mimane kujika, bantu bavua ne buôwa bua ne: bena mu ditunga dia États-Unis ne dia Union soviétique kabalu kushipangana ne bingoma binene. Bikandakanda ne tudiomba bivua bibikile mvita ivua mua kulua kuenzeka ayi ne: “Armagedone mukebesha kudi bingoma binene.” Lelu eu bakebuludi badi ne buôwa bua ne: dinyanguka dia mivu didi mua kukebesha dishintuluka dinene pa buloba didibu bangata bu “Armagedone.”

Diumvuija diabu didi disua kuleja ne: Bantu mbamanye mua kulombola buloba mu matuku atshilualua ne nsombelu udipu. Mbulamatadi yoyi kayiyi milombole malu ne meji, buloba nebunyanguke bikole bia dikema.

Tshidi Bible ulongesha: Nzambi kakuanyisha bua bantu babutule buloba to. Bible udi utujadikila ne: Yehowaa kakafuka buloba ‘bu tshintu tshia patupu.’ Kadi wakabufuka bua ‘bantu bashikamapu.’ (Yeshaya 45:18) Pamutu pa kuanyishaye bua bantu babutule buloba, Nzambi ‘neabutule badi babutula buloba.’​—Buakabuluibua 11:18.

2. ARMAGEDONE NTSHIKUMINA TSHIDI TSHIDIENZEKELA ANYI?

Bakamona kamba batu imue misangu babikila bikumina binene bitu bidienzekela ne: ‘Armagedone.’ Tshilejilu, mu 2010 kadiomba kampanda kavua kakule bua makenga, dinyanguka dia bintu, ne muvua bantu bafue mu tshikumina tshikole mu ditunga dia Haïti ne: ‘Armagedone.’ Bakamona kamba ne benji ba filme batu bakula bua muaku eu bua malu akadi menzeke ne bua aa adibu batshina ne: adi mua kuenzeka. Tshilejilu, bavua bakule bua muaku ‘Armagedone’ bua kuleja njiwu idi dibulungu kampanda didibu babikila ne: astéroïde mua kukebesha diodi diditute ku buloba.

Diumvuija diabu didi disua kuleja ne: Armagedone mbualu budi buenzeka mu mpukapuka bushipa bantu badi kabayi ne bualu. Kuena ne tshiudi mua kuenza bua kudikuba.

Tshidi Bible ulongesha: Armagedone kena ushipa bantu mu mpukapuka to, kadi neashipe anu bantu babi. Bible udi uleja ne: mu katupa kîpi emu ‘muntu mubi kena wikalaku kabidi; ee, neukebe kumona muaba wende ne disuminyina, kena wikalaku.’​—Musambu 37:10.

3. NZAMBI NEABUTULE BULOBA KU ARMAGEDONE ANYI?

Bantu ba mu bitendelelu bia bungi batu bitabuja ne: nekuikale mvita pankatshi pa buimpe ne bubi ikala mua kubutula buloba ebu. Pa bantu bakulumpe lukama bavuabu bele nkonko mu ditunga dia États-Unis, bantu 40 badi bitaba ne: buloba ebu nebubutudibue ku ‘mvita ya Armagedone.’​—Princeton Survey Research Associates.

Dilongesha diabu didi disua kuleja ne: Nzambi kavua mufuke bantu bua kusombabu pa buloba kashidi to, nansha buloba pabu kabavua babufuke bua kushalabu kashidi to. Nzambi uvua mufuke bantu muikale mumanye ne: nebafue bonso tshikondo kampanda.

Tshidi Bible ulongesha: Bible udi uleja patoke ne: Nzambi ‘wakajadika buloba pa bishimikidi biabu, bua kabunyungi too ne kashidi.’ (Musambu 104:5) Bua bantu basomba pa buloba, Bible udi wamba ne: ‘Bantu bakane nebapiane buloba, nebashikamemu tshiendelele.’​—Musambu 37:29.

Bulelela, tshidi Bible ulongesha bua Armagedone ntshishilangane ne tshidi bantu ba bungi bamba. Kadi bulelela budi penyi?

[Mêyi adi kuinshi]