Bulelela pa bidi bitangila Armagedone

‘Nyuma ya bademon idi iya kudi bakalenge ba pa buloba buonso ne bakabasangisha mu muaba udibu babikila mu muaku wa tshiena Ebelu ne: Ha-Megido.’​—BUAKABULUIBUA 16:14, 16.

MUAKU “Ha-Megido” udibu bakudimuna imue misangu ne: Armagedone mbawangate bu dîna dia muaba kampanda. Kadi bidi bimueneka ne: muaba wa nunku kawutuku pa buloba to.

Kadi muaku ‘Armagedone’ udi umvuija tshinyi mu bulelela? Bua tshinyi batu batamba kuusuikakaja ne bualu kampanda bu mudi mvita?

Bakabasangisha mu muaba udibu babikila ne: Armagedone

Muaku wa mu tshiena Ebelu udibu bakudimune ne: Armagedone udi umvuija ku muaku ku muaku ne: “Mukuna wa Megido.” Nansha muvua mukuna wa mushindu eu kawuyiku, kadi kudi muaba udibu babikila ne: Megido. Mmuaba muimpe wa ku Nord-Est uvua njila ibidi minene ituilangane, ne ke muaba uvua bena tshisamba tshia Isalele wa kale basombele. Mvita minene ya bungi ivua mienzekele pabuipi ne muaba au. Ke bualu kayi bavua basuikakaja muaku Megido ku mvita.a

Kadi bua kumvua bimpe muaku Megido kabiena bikengela kumanya mvita ya mushindu kayi ivua mienzeke to, kadi bidi bikengela kumanya bua tshinyi mvita ayi ivua mienzeke. Megido uvua tshitupa tshia Buloba bulaya buvua Yehowa Nzambi mupeshe bena Isalele. (Ekesode 33:1; Yoshua 12:7, 21) Uvua mulaye bantu abu bua kubasungila mu bianza bia baluishi babu, ne ke tshivuaye muenze. (Dutelonome 6:18, 19) Tshilejilu, ku Megido ke kuvua Yehowa musungile bena Isalele pavuabu babele mvita kudi basalayi ba Yabina mukalenge wa bena Kanana bavuabu balombola kudi mfumu Sisela.​—Balumbuluishi 4:14-16.

Nunku, muaku ‘Armagedone’ anyi “Ha-Megido” udi ne diumvuija dia mu tshimfuanyi. Badi bawusuikakaja ne mvita idi pankatshi pa biluilu binene bibidi.

Mêyi a buprofete adi mu Buakabuluibua adi aleja ne: mu tshikondo tshilualua tshikadi pabuipi, Satana ne bademon bende nebikale mua kusaka mbulamatadi bua kusangisha biluilu biayi bua kuluisha bantu ba Nzambi ne mudimu wabu. Dibaluisha edi nedifuishe bantu miliyo mipite bungi pikala Nzambi mua kutshimuna.​—Buakabuluibua 19:11-18.

Bua tshinyi Nzambi udi Bible uleja bu Nzambi ‘wa luse, udi kayi ukuata tshiji lubilu, ne udi muule tente ne dinanga’ udi mua kushipesha bantu bungi nunku? (Nehemiya 9:17) Bua kumvua tshidi Nzambi wenzela nunku, tudi ne bua kuandamuna nkonko isatu eyi: 1) Nnganyi udi utuadija mvita? 2) Bua tshinyi Nzambi mmuelamu dîyi? 3) Mvita eyi neipatule bipeta kayi mu matuku atshilualua?

1. NNGANYI UDI UTUADIJA MVITA?

Mvita ya Armagedone ki mbualu budi buleja ne: Nzambi udi ne tshikisu to. Kadi Nzambi neasungile bantu bimpe kudi badi bakeba kubabutula. Mu tshilumbu etshi, baluishi ‘mbakalenge ba pa buloba buonso’ badi balombola buloba ebu. Nebabunde bantu ba Nzambi bua tshinyi? Bualu Satana neakuate mudimu ne mbulamatadi ne biluilu bia basalayi bua kuela bantu badi batendelela Yehowa Nzambi mvita mikole.​—Buakabuluibua 16:13, 14; 19:17, 18.

Lelu bu mudi bantu ba mu matunga a bungi bangata budikadidi bua kuakula ne kuenza malu a ntendelelu ne mushinga, kabiena mua kumvuika bua mbulamatadi anyenge bantu budikadidi buabu anyi akange bitendelelu to. Kadi buluishi bua mushindu eu buakenzeka mu bidimu bia 1900 ne budi buenda buenzeka lelu eu.b Nansha nanku, kudi malu manene abidi adi aleja dishilangana didi pankatshi pa mvita ikadi mienzeke ne eyi idi misuikakaja ku Armagedone. Tshia kumpala, mvita eyi neyenzeke pa buloba bujima. Tshibidi, Yehowa Nzambi nealeje bukole buende mu mushindu utuye kayi muanji kubuleja to. (Yelemiya 25:32, 33) Bible udi wakula bua dibunda edi bu ‘mvita ya dituku dinene dia Nzambi wa Bukole Buonso.’

2. BUA TSHINYI NZAMBI MMUELAMU DÎYI?

Yehowa udi ulomba bantu badi bamutendelela bua bikale bena ditalala ne banange baluishi babu. (Mika 4:1-3; Matayi 5:43, 44; 26:52) Pikalabu mua kubaluisha kabakuangata bingoma bua kudisombuela. Nzambi yeye kayi musungile bantu bende, nebababutule bonso. Dîba adi, dîna dia Yehowa Nzambi anyi lumu luende nebinyanguke. Baluishi bobu bafike ku dibutula bantu bende, Yehowa neamueneke bu Nzambi udi kayi ne dinanga, udi kayi ne buakane anyi udi kayi ne bukole. Malu a mushindu eu kaena mua kuenzeka nansha kakese!​—Musambu 37:28, 29.

Nzambi ki mmusue kubutula muntu nansha umue, kadi udi utudimuija bua tuikale bamanye tshikalaye mua kuenza. (2 Petelo 3:9) Ku diambuluisha dia miyuki idi Yehowa mufundishe mu Bible, udi utuleja mushindu uvuaye musombuele bantu bende pavuabu bababunde. (2 Bakelenge 19:35) Bible udi utuleja kabidi ne: mu matuku atshilualua pikala Satana ne bantu bende mua kubunda bantu ba Nzambi, Yehowa neenze mudimu ne bukole buende bua kusombuela bantu bende kudi bantu badi bababunda. Bulelela, Dîyi dia Nzambi dikavua didianjile kuamba ne: Yehowa neabutule bantu babi. (Nsumuinu 2:21, 22; 2 Tesalonike 1:6-9) Dîba adi, kakuyi mpata baluishi abu nebamanye ne: mbabunde Nzambi wa Bukole Buonso.​—Yehezekele 38:21-23.

3. MVITA EYI NEIPATULE BIPETA KAYI MU MATUKU ATSHILUALUA?

Bantu miliyo ya bungi nebapanduke mu mvita ya Armagedone. Bushuwa, neikale ntuadijilu wa tshikondo tshia ditalala pa buloba.​—Buakabuluibua 21:3, 4.

Mukanda wa Buakabuluibua udi wakula bua “tshisumbu tshinene tshia bantu” tshidi muntu kayi mua kubala tshiapanduka mu mvita eyi. (Buakabuluibua 7:9, 14) Ku bulombodi bua Nzambi, bantu aba nebalengeje buloba bua bulue Mparadizu anu bu muvua Yehowa mulongolole ku ntuadijilu.

Tudiku bamanye dîba dikalabu mua kubunda bantu ba Nzambi anyi?

[Mêyi adi kuinshi]

[Tshimfuanyi mu dibeji 6]

Yehowa Nzambi uvua musungile bantu bende mu bikondo bia kale

[Tshimfuanyi mu dibeji 7]

Yehowa neasungile kabidi bantu bende mu mvita ya Armagedone