Ndîba kayi dikala mvita ya Armagedone mua kuenzeka?

‘Ngakatangila, ne mona, tshisumbu tshinene tshia bantu tshiakadi muntu kayi mua kubala, munkatshi mua ditunga dionso, ne munkatshi mua bisamba bionso, ne bantu bonso, ne miaku yonso bumuka mu dikenga dinene.’​—BUAKABULUIBUA 7:9, 14.

MALU akadi mamane kulongolola bua mvita ya Armagedone. Mushindu kayi?

Kukadi bantu ba bungi pa buloba bujima badi benzela Nzambi mudimu ne batumikila mikenji ya mu Bible idi itangila bikadilu bimpe. Ku diambuluisha dia Nzambi, miliyo ya bantu ba mu matunga onso, bisamba bionso, miakulu yonso badi benda badisangisha mu buobumue ne mu dinanga bu bena muntu. Buena muntu bua mushindu eu budi kudi Bantemu ba Yehowa.​—Yone 13:35.

Mu katupa kîpi emu, Satana neasangishe biluilu biende ne neele bantu bena ditalala aba badi bamueneka kabayi ne udi mua kubasungila mvita mikole. (Yehezekele 38:8-12; Buakabuluibua 16:13, 14, 16) Tshidi tshitusaka bua kuamba nanku ntshinyi? Bible udi wakula bua malu masunguluke adi mua kutuambuluisha bua kumanya tshikondo tshikale mvita ya Armagedone ne bua kuenzeka. A bungi a ku malu au adi enda akumbana.

Malu audi umona enda akumbana

Bayidi ba Yezu bakamukonka bua kumanya muvua bantu mua kumanya ne: ‘nshikidilu wa tshikondo etshi’ ukadi pabuipi. (Matayi 24:3) Yezu wakabandamuna wamba ne: ‘Tshisamba tshikuabu netshiluangane ne tshinga, bukalenge bukuabu nebuluangane ne bunga, biyole nebikalaku ne buloba nebukanke ku nseke ne ku nseke.’ Pashishe wakamba kabidi ne: ‘Malu aa adi tshibangidilu tshia kanyinganyinga.’ (Matayi 24:7, 8) Mupostolo Paulo wakabikila tshikondo etshi ne: ‘matuku a ku nshikidilu,’ ne kuambaye kabidi ne: neikale matuku a ‘malu makole.’ (2 Timote 3:1) Kuenaku umona ne: milayi eyi idi yakula bua malu adi enzeka mu matuku etu aa anyi?

Bua tshinyi tshikondo etshi ntshikole? Mupostolo Yone udi utumvuija bua tshinyi bidi nanku. Wakamba ne: nekuikale ‘musangu muipi’ wikala Satana ne bademon bende ne bua kutangidija malu abu onso pa buloba. Badi baleja Satana muikale ne ‘tshiji tshikole’ mu tshikondo etshi. (Buakabuluibua 12:7-12) Kuenaku umona ne: lelu eu tshiji ne tshikisu bidi mu bantu, kabiyi anu muaba umue kadi pa buloba bujima anyi?

Yezu uvua muambe kabidi ne: mu tshikondo tshia ntatu mikole etshi, bavua ne bua kuenza mudimu wa mushinga mukole. Wakamba ne: ‘Nebambile bantu bonso ba pa buloba lumu luimpe elu lua bukalenge [bua Nzambi], neluikale tshimanyishilu ku bisamba bionso; pashishe, nshikidilu nealue.’ (Matayi 24:14) Lelu eu mu matunga mapite pa 235, Bantemu ba Yehowa badi bayisha lumu luimpe lua Bukalenge bua Nzambi mu miakulu mipite pa 500. Tshibejibeji tshia Tshibumba tshia Nsentedi ne tshia Réveillez-vous! bidi bimvuija malu a mu Bible bidibu bapatula, ke bibejibeji bidibu babanya bikole pa buloba bujima. Bantemu ba Yehowa mbakudimune kabidi Bible mu miakulu mitue ku 100. Mudimu wabu badi bawenza kudi bena budisuile ne udi wenda ne makuta adi bantu bafila ku budisuile. Mudimu eu munene wa diyisha kawenaku ukumbaja mulayi wa Yezu anyi?

Bible udi kabidi uleja malu ikala mua kufikisha ku mvita pankatshi pa Yehowa Nzambi ne bantu badi bamutombokela. Tukonkonone milayi isatu iwamona dikumbana diayi.

Malu awuikala mua kumona mu katupa kîpi emu

Mulayi wa 1. Bible udi wamba ne: bamfumu ba pa buloba nebikale mua kuamba ne: ‘tudi ne ditalala, katuyi ne bualu.’ Badi bela meji ne: bakadi pakujikija bilumbu binene. Kadi malu ikala mua kulonda panyima pa diakula diabu kaakuleja ne: kudi ditalala nansha.​—1 Tesalonike 5:1-3.

Mulayi 2. Pashishe, mbulamatadi ya bungi neibunde bitendelelu. Mu Bible mbulamatadi eyi idi tshimfuanyi tshia nyama wa luonji; ne bitendelelu bia dishima bidi tshimfuanyi tshia mukaji udi musombe pa nyama eu. (Buakabuluibua 17:3, 15-18) Nyama wa mu tshimfuanyi eu neenze tshidi Nzambi musue bua enze mu dibutula bitendelelu bidi bishima mudibi bileja mpala wa Nzambi.

Mupostolo Yone wakaleja bualu ebu mu tshimfuanyi mushindu eu: ‘Nsengu dikumi iwakatangila, ne nyama wa luonji, nebikale ne mukaji wa masandi lukuna, nebimuvuije bu tshintu tshia patupu ne butaka, nebidie munyinyi wende, nebimushidishe ne kapia. Bualu bua Nzambi wakabueja bualu ebu mu mitshima yabu bua kuenzabu mudiye wela meji.’​—Buakabuluibua 17:16, 17.

Mulayi 3. Pikalabu bamane kutshimuna bitendelelu bia dishima ebi, Satana neasangishe bisamba bionso bua kuluisha bantu badi batendelela Yehowa Nzambi.​—Buakabuluibua 7:14; Matayi 24:21.

Mmunyi mudi bualu ebu bukutangila?

Wewe kuyi muanji kupeta mushindu wa kulonga bimpe Bible, bidi mua kukukolela bua kuitaba ne: malu atudi batele kuulu eku neenzeke. Kadi kudi bualu budi mua kutusaka bua kuitaba ne: kalu ne kalu konso nekakumbane, ne malu aa neikale mua kukumbana matuku makese kumpala eku. Milayi ya bungi ya mu Bible ikadi mikumbane idi itujadikila bualu ebu.a

Bua tshinyi kuenaku mua kukeba dîba bua kumanya tshidi tshijadikila Bantemu ba Yehowa ne: ‘Mvita ya dituku dinene dia Nzambi wa Bukole Buonso’ ikadi pabuipi? Bua tshinyi kuena ne bua kuikala ne buôwa bua bualu buayi? Ulombe Bantemu bua bakuleje tshidi Bible wamba bua wewe kuenza bua wikale munkatshi mua bantu badi Nzambi ukuba. (Buakabuluibua 16:14) Malu awalonga neashintulule mmuenenu webe bua matuku atshilualua.

[Mêyi adi kuinshi]

[Lungenyi lunene lua mu dibeji 8]

Mudimu wa Bantemu ba Yehowa kawenaku ukumbaja mulayi wa mu Bible anyi?