Bua tshinyi Nzambi uvua mulombe Abalahama bua kulambulaye muanende?

▪ Bilondeshile mukanda wa Genese, Yehowa Nzambi uvua mulombe Abalahama bua kufilaye muanende Isaka bu mulambu. (Genese 22:2) Bitu bikolela bamue babadi ba Bible bua kumvua bualu ebu. Mulongeshi kampanda diende Carol udi wamba ne: “Pamvua mumvue bualu ebu bua musangu wa kumpala pantshivua muana, bivua bintonde bikole. Nzambi kayi udi mua kulomba muntu bua kuenza bualu bubi bua mushindu eu?” Nansha mudi bantu kabayi bumvua bualu ebu, dikonkonona dia malu abidi adi alonda aa didi mua kutuambuluisha.

Bualu bua kumpala, tukonkononayi tshivua Yehowa kayi muenze. Kavua mulekele Abalahama bua kumulambulaye muanende, nansha muvuaye mudilongolole bua kuenza nanku, bualu Nzambi katu muanji kulomba muntu bua kuenza bualu bua nunku to. Yehowa ki mmusue lufu lua batendeledi bende bonso nansha lua bana to, kadi mmusue bua batungunuke ne kuikala ne muoyo matuku a bungi ne disanka.

Bualu buibidi, Bible udi uleja ne: Yehowa uvua ne tshivuaye mulombele Abalahama bua kulambula Isaka. Yehowa uvua mumanye bidimu bia bungi kumpala ne: uvua ne bua kutuma Muanendea Yezu bua kutufuilaye. (Matayi 20:28) Yehowa uvua musue bua tumanye mushindu uvua mulambu eu mua kumulomba bia bungi. Pavua Yehowa mulombe Abalahama bua kumulambula muanende, uvua musue kuleja mulambu uvuaye ne bua kufila mu matuku atshilualua. Mushindu kayi?

Tukonkononayi tshivua Yehowa muambile Abalahama. Wakamuambila ne: ‘Wangate muanebe mulume, muana umuepele, uudi munange, Isaka mene, umufilaku bu mulambu wa kuosha pa kapia.’ (Genese 22:2) Mona ne: Yehowa wakakula bua Isaka bu muana ‘uudi munange’ bikole. Yehowa uvua mumanye muvua Abalahama munange Isaka. Nzambi uvua mumanye muvuaye mudiumvue pende bua Muanende Yezu. Yehowa uvua munange Yezu bikole ke bualu kayi uvua muakuile mu diulu misangu ibidi mijima bua Yezu wamba ne: “Muana wanyi munanga.”​—Mâko 1:11; 9:7.

Tudi tumona kabidi ne: mu dilomba didi Yehowa mulombe Abalahama uvua muakule ne bukalanga. Mumanyi wa malu a Bible mukuabu udi wamba ne: kuakula ne bukalanga eku kudi kuleja ne: “Mukalenge mmumanye mushinga wa tshidiye ulomba.” Anu mutudi mua kumona, dilomba edi divua mua kunyingalaja Abalahama bikole; mu mushindu wa muomumue, tudi mua kumona kanyinganyinga kakole kavua Yehowa mumvue pavuaye mumone Muanende munanga ukenga ne ufua. Kakuyi mpata, bualu ebu buvua busame Yehowa ku muoyo bikole ne kabuakumufikila kabidi to.

Bulelela, nansha mutudi mua kumvua bibi bua tshivua Yehowa mulombe Abalahama bua kuenza, kadi tuvuluke ne: Yehowa uvua mupangishe muena lulamatu eu bua kumulambulaye muanende. Uvua muepule Abalahama ku kanyinganyinga kakole kadi muledi mua kuikala naku padiye ufuisha muanende. Yehowa wakapandisha Isaka ku lufu. Kadi Yehowa kavua muepule ‘Muanende mene, kadi wakamufila bua buonso buetu.’ (Lomo 8:32) Bua tshinyi Yehowa wakadikengesha mushindu eu? Wakenza nanku bua “tuetu tuikale ne muoyo.” (1 Yone 4:9) Ki ntshijadiki tshidi tshileja ne: Yehowa mmutunange anyi? Kabienaku bitusaka petu bua kumuleja dinanga anyi?b

[Mêyi adi kuinshi]