Dikankamija difumina “mukana mua bana”

Mu ngondo wa 12 wa 2009, Kabadi kakulu ka ditunga dia Russie kakangata dipangadika dia kukandika midimu ya Bantemu ba Yehowa ba mu tshimenga tshia Taganrog mu Russie, kunyenga Nzubu wa Bukalenge, ne kuamba muvua malu adi mafunda mu mikanda yetu 34 mele kalele. Bakela dipangadika edi mu site wa Enternete wa Bantemu ba Yehowa, kuelabu kabidi foto ya Bantemu bavua dipangadika edi ditangila kusangisha kabidi ne ya bana.

Ngondo mikese pashishe, Betele wa Bantemu ba Yehowa wa mu Russie wakapeta kadibuki ne mukanda bia kudi dimue dîku dia Bantemu ba Yehowa ba mu tshimenga tshia Queensland mu Australie bavua babale dipangadika divua Kabadi kangate. Mu mukanda amu bavua bafunde ne: “Bana betu basuibue, bivua bilenge bana betu batekete, Cody ne Larissa ku muoyo bua ditabuja divua bana betu ba mu Russie baleje ne ntatu ivuabu bapete. Mbafunde malu kampanda pa karte ne pa mabeji, tudi babiele mu dibuki dikese didi ne mapa ditudi batumine bana ba mu Taganrog bua kubaleja ne: nansha mudibu kule, kudi bana bakuabu badi benzela Yehowa mudimu badi baditatshisha bua bualu buabu. Badi babatumina mioyo ya disanka.”

Diakamue pakapeta bana ba mu Taganrog mapa aa, bakafundila pabu dîku dia mu Australie edi mikanda bua kudiela tuasakidila. Bu muvua mêyi a dikankamija mafumine “mukana mua bana,” biakasaka muanetu kampanda udi wenza mudimu ku Betele wa mu Russie bua kufundila Cody ne Larissa ne: “Nudi mua kufuanyikija muvuabi mua kuikala bitonde bakulumpe ne bana bua muvuabu babanyoke pabu kabayi benze bualu bubi nansha bumue. Bana betu ba balume ne ba bakaji ba mu Taganrog ki mbenze bualu bubi nansha bumue to, kadi mbabanyenge Nzubu wabu wa Bukalenge. Bualu ebu buvua bubabungamije bikole. Nebibakoleshe padibu bumvua ne: kudi muntu mukuabu wa mu ditunga dikuabu udi uditatshisha bua bualu buabu. Tuasakidilayi bua musangelu wenu ne lungenyi luenu lua kuambuluishangana.”​—Mus. 8:2.

Bushuwa, tudi mu dîku dimue ne bana betu pa buloba bujima, ne dinanga didi munkatshi muetu didi dituambuluisha bua kutantamena ntatu ne makenga. Padi bena mu Tubadi bakonkonona bua kumanya bikala mikanda ya Bantemu ba Yehowa isaka bantu ku dikinangana, bana betu batekete badi bobu baleja mudibu baditatshisha bua diakalenge dia bantu bakuabu, kabayi ne kansungasunga ka ditunga ne bisamba; badi baleja mudi mêyi a Yezu adi alonda aa malelela: “Bua bualu ebu bantu bonso nebamanye ne: nudi bayidi banyi, binuikala ne dinanga munkatshi muenu.”​—Yone 13:35.