Dimanyisha kudi babadi

Tshibejibeji tshiudi ubala etshi bakatuadija ku tshipatula mu ngondo wa 7 mu 1879. Bu mudi bikondo bishintuluka, ke bua tshinyi tshibejibeji etshi patshi tshidi tshishintuluka. (Tangila foto idi kuulu eku.) Kutuadijila ku tshibejibeji etshi, nenumone ne: mushindu utubu benze tshibejibeji etshi mmushintuluke. Ndishilangana kayi didiku?

Mu matunga mavule, bantu ba bungi batu banange kubala malu a bungi ku Enternete. Ku diambuluisha dia ordinatere, mbipepele bua kupeta ne kubala amue malu ku Enternete. Kudi mushindu wa kubala mikanda ya bungi, bibejibeji ne bikandakanda ku Enternete.

Bu mudi bantu ba bungi basue kubala malu ku Enternete, tudi bashintulule bikole site wetu wa www.jw.org, mmulue muimpe mutambe, ne mbipepele bua kubuelamu. Bantu badi basue badi mua kubalamu mikanda yetu idi ipatuka mu miakulu mipite pa 430. Nunku, kubangila anu mu ngondo eu, bimue biena-bualu bitu bipatuka mu bibejibeji bietu nebituadije kupatuka anu mu site wetu eu.a

Bu mutuikala tupatula biena-bualu bia bungi anu ku Enternete, ne bia mu tshibejibeji etshi, nunku tudi bakepeshe mabeji a mu Tshibumba tshia Nsentedi tshia bantu bonso tshidi ne mabeji 32 bua tshikale ne mabeji 16. Mpindieu Tshibumba tshia Nsentedi tshikadi tshipatuka mu miakulu 204. Bu muditshi ne mabeji makese, nebikale bipepele bua kutshikudimuna mu miakulu ya bungi.

Tudi ne ditekemena dia ne: malu atudi bashintulule aa neatuambuluishe bua kuyisha bantu ba bungi mukenji wa mu Bible udi usungilangana. Tudi badisuike bua kutungunuka ne kupatula biena-bualu bimpe mu mabeji ne ku Enternete bua kuambuluisha babadi badi banemeka Bible, badi basue kumanya tshidi Bible wamba menemene.

Bapatudi