MANDAMUNA A NKONKO YA MU BIBLE
Kudiku mushindu wakupeta muoyo wa tshiendelele anyi?
Ntshinyi tshidi Nzambi mulongolole bua kutupikula ku lufu?
Adama muntu wa kumpala, wakalala bidimu bia bungi. Kadi ndekelu wa bionso, wakakulakaja ne kufuaye. Katshia anu ku dîba adi, bantu mbaditatshishe mu mishindu ya bungi bua kuluisha bukulakaje. Kadi nansha nanku, kakuena muntu udi mua kuepuka lufu to. Bua tshinyi? Adama wakakulakaja ne kufua bualu wakenza bubi pakabengaye kutumikila Nzambi. Tudi tukulakaja bualu tudi bapiana bubi bua Adama ne lufu ludi difutu dia bubi abu.—Bala Genese 5:5; Lomo 5:12.
Bua tuetu kupeta muoyo wa tshiendelele, tudi dijinga ne muntu udi mua kufila tshia kutupikula natshi. (Yobo 33:24, 25) Tshintu tshia kupikula natshi mmushinga udibu bafuta bua kupikula muntu, ne ku luetu luseke tudi tujinga bua batupikule ku lufu. (Ekesode 21:29, 30) Yezu wakafuta mushinga eu pakafuaye bua bualu buetu.—Bala Yone 3:16.
Mmunyi mutudi mua kupeta muoyo wa tshiendelele?
Ki mmuntu yonso wikala ne bua kupikudibua ku masama ne bukulakaje to. Mu kuamba kuimpe, bantu badi babenga kutumikila Nzambi bu muvua Adama muenze, kabakupeta diakalenga dia muoyo wa tshiendelele to. Anu bantu bikalabu ne bua kubuikidila mibi yabu ke bapete muoyo wa tshiendelele.—Bala Yeshaya 33:24; 35:3-6.
Bua bobu kutufuila luse, tudi ne bua kuenza malu kampanda. Tudi ne bua kumanya Nzambi pa kulonga Bible Dîyi diende. Bible udi utulongesha mushindu utudi mua kupeta nsombelu muimpe, mudi Nzambi mua kutuanyisha ne mutudi mua kupeta muoyo wa tshiendelele.—Bala Yone 17:3; Bienzedi 3:19.