Bua tshinyi makenga bungi nunku?

BUENZEJI BUA MBULAMATADI MUBI

Bible udi wamba ne: ‘Pakokesha muntu mubi, bantu badi batua mikemu.’​—Nsumuinu 29:2.

Malu a pa buloba mmuule tente ne mianda ya batshikokesha nkaya badi bakokesha ne tshikisu ne bakengesha bantu badi ku bukokesha buabu. Bushuwa, kabiena nanku bua bakokeshi bonso to. Bamue badi mua kuikala ne meji mimpe bua bantu badibu bakokesha. Kadi padibu bapeta bukokeshi, batu misangu ya bungi bamona ne: buluishi bua bantu bakuabu ne difuilakana dia bukalenge bidi binyanga diditatshisha diabu dia kuenza bimpe. Peshi badi mua kudinyangila bukokeshi buabu ne dijinga dia kupeta bia bungi eku bantu benda bakenga. Henry Kissinger mufundi wa kale wa malu a mbulamatadi wa mu États-Unis wakamba ne: “Bakokeshi mbalaye bantu malu a bungi adibu kabayi bakumbaje.”

Bible udi wamba pende ne: “Muntu wendenda ewu kena ne bukole bua kuludika makasa ende.” (Yelemiya 10:23, MMM) Bantu bena mapanga kabena ne meji a bungi ne bukole bua kulombola malu abu wonso bimpe. Bikala bantu kabayi ne bukole bua kulombola makasa abu, mmunyi mudibu mua kulombola bisamba? Udiku mumone bua tshinyi bakokeshi ba pa buloba kabena ne bukokeshi bua kujikija makenga anyi? Bushuwa, misangu ya bungi mbulamatadi mubi anyi bakoleshi babi badi bakebesha makenga!

BUENZEJI BUA BITENDELELU BIA DISHIMA

Yezu wakamba ne: “Bua bualu ebu bantu bonso nebamanye ne: nudi bayidi banyi, binuikala ne dinanga munkatshi muenu.”​—Yone 13:35.

Bamfumu bonso ba bitendelelu bishilashilangane badi balongesha bua dinanga ne buobumue. Bulelela budi ne: mbapangile mua kubueja dinanga munkatshi mua bena kuitabuja babu bua kumbusha kansungansunga. Pamutu pa bitendelelu kuambuluishabi bantu bua kuikala ne dinanga bidi biobi bisaka bantu ne bisamba bua kutapuluka ne kuikala ne bilumbu munkatshi muabu. Mukanda mukuabu wa malu a bitendelelu mufunda kudi muena teoloji diende Hans Küng udi wamba mu mêyi ende a ndekelu ne: “Bilumbu ne bimvundu bia bungi bidi nabi bena tshididi mbikebesha kudi bitendelelu.”​—Le christianisme et les religions du monde.

Bamfumu ba bitendelelu bia bungi badi kabidi banyisha patoke masandi a bajike ne masandi a basele ne balume badi balala ne balume nabu anyi bakaji badi balala ne bakaji nabu. Bualu ebu budi bufikisha ku divulangana dia masama, ditula dia mafu, mafu kaayi melela meji, difua dia mabaka ne dinyanguka dia mêku, tunyinganyinga ne dibungama.

DIPANGA BUPUANGANE DIA BANTU NE DIJINGA DIA KUDISANKISHA

Bible udi wamba ne: “Muntu yonso udi utetshibua padi dijinga diende dimukoka ne dimukuata mu buteyi. Pashishe, padi dijinga edi dikola, didi dilela bubi; ne bubi pabu padibu babuenza, budi bufikisha ku lufu.”​—Yakobo 1:14, 15.

Yonso wa kutudi bua dipanga bupuangane ditudi bapiane, utu wenza anu bilema ne uluangana bua kutantamena dijinga dia ‘kuenza malu mu diumvuangana ne majinga a mubidi wetu.’ (Efeso 2:3) Padi muntu muikale ne dijinga dibi ne yeye mutuilangane ne mpunga wa kudikumbaja, bitu bikola bua kutantamena diteta edi. Tuetu bakumbaje dijinga dibi, bipeta nebikale bibi bitambe.

Mufundi mukuabu diende Phiroz Mehta wakafunda ne: “Ntatu ya bungi itudi tutuilangana nayi idi ifumina ku lukuka lutudi nalu, dijinga dinekesha dia kudisankisha ne kujinga malu manene.” Lukuka ne dinanga malu mabi bu mudi dikuatshika dia maluvu, dinua dia diamba, dinaya manaya a makuta, dienda dia masandi ne malu mabi makuabu mbinyange bantu ba bungi badibu banemeka ne mbikengeshe mêku abu, balunda babu ne bantu bakuabu. Bua dipanga bupuangane dia bantu, tudi tuitaba tshidi nkudimuinu mukuabu wa Bible wamba ne: “Muntu yonso udi ne mêsu udi umona ne: too ne mpindieu, bifukibua bionso bidi bitua mikemu bu mukaji wamba kulela.”​—Lomo 8:22, The New Testament in Modern English, mukudimuna kudi J. B. Phillips.

BUKOLE BUA NYUMA MIBI

Bible udi uleja ne: Satana udi “nzambi wa ndongoluelu wa malu eu” ne badi bamuambuluisha kudi nyuma mibi idi ne bukole idibu babikila ne: bademon.​—2 Kolinto 4:4; Buakabuluibua 12:9.

Anu bu Satana, bademon mbadifile bua kulombola bantu ne kubasesuisha mu njila muimpe. Mupostolo Paulo wakajadika bualu ebu pakambaye ne: “Katuena tuluangana ne mashi ne mubidi, kadi tudi tuluangana ne mbulamatadi ne bakokeshi ne bamfumu ba mîdima ba buloba ebu ne bisumbu bia nyuma mibi bidi mu miaba ya mu diulu.”​—Efeso 6:12.

Nansha mudi bademon basanka bua kukengesha bantu, kadi etshi nki ntshipatshila tshiabu tshinene to. Mbasue kumbusha bantu kudi Yehowa Nzambi Mutambe Bunene. (Musambu 83:18) Malu bu mudi dimanya malu atshilualua ku diambuluisha dia mitoto, majimbu, buloji ne malu a mbuku mbimue bia ku bintu bidi bademon benza nabi mudimu bua kushima bantu ne kubalombola. Ke bua tshinyi Yehowa udi utudimuija bua njiwu eyi ne udi ukuba bonso badi bakandamena Satana ne bademon.​—Yakobo 4:7.

TUDI MU “MATUKU A KU NSHIKIDILU”

Kukadi bidimu bitue ku binunu bibidi, Bible ukavua mudianjile kuamba ne: “Umanye bualu ebu ne: mu matuku a ku nshikidilu nekuikale bikondo bibi bidi bikole mua kupita nabi.”

Bible udi uleja tshidi tshienza bua bikondo bikale bikole, wamba ne: “Bualu bantu nebikale badinangi, banangi ba makuta, bena diambu, badibandishi, . . . kabayi banange bana babu, kabayi ne lungenyi lua kumvuangana, bashiminyinyanganyi ba malu, kabayi badikanda, bena luonji, kabayi banange malu mimpe, batungidianganyi, bena mutu mukole, badiuwuja ne didisua, banangi ba masanka pamutu pa kuikala banangi ba Nzambi.” Bulelela, makenga onso atudi tumona lelu adi aleja ne: tudi mu “matuku a ku nshikidilu.”​—2 Timote 3:1-4.

Patudi tutangila malu atudi bakonkonone, kabienaku bimueneka patoke ne: bantu mbapangile bua kujikija makenga nansha mudibu ne meji mimpe anyi? Kadi nkuepi kutudi mua kupeta diambuluisha? Tudi ne bua kutangila kudi Mufuki wetu udi mulaye bua “kubutula midimu ya Diabolo” ne ya bena diende. (1 Yone 3:8) Tshiena-bualu tshidi tshilonda netshiakule bua tshikala Nzambi mua kuenza bua kujikija malu onso adi akebesha makenga.