Mmunyi mutudi bafike ku dikala pa buloba apa?

Mu mêyi makese, Genese mukanda wa kumpala wa mu Bible udi umvuija kudi bintu bionso bidi mu diulu ne pa buloba bifumine, padiye wamba ne: ‘Kale ku tshibangidilu Nzambi wakafuka diulu ne buloba.’ (Genese 1:1) Pashishe Nzambi wakafuka mitshi ne nyama, wakafuka Adama ne Eva bantu ba kumpala. Bantu bavua bashilangane ne nyama bualu bavua ne ngikadilu ya buena ya Nzambi ne bavua ne budikadidi bua kuenza tshivuabu basue. Nunku, bipeta bia bienzedi biabu bivua pa makaya abu. Bu muvuabu baledi ba kumpala, bu bobu batumikile mikenji ya Nzambi, bavua mua kukumbaja disua dia Nzambi dia kuuja buloba tente ne bantu bavua mua kuikala mu ditalala ne nsombelu mupuangane pa buloba bua kashidi ne tshiendelele.

Kadi, muanjelu mukuabu wakasaka bantu bua kuenzabu disua diende. Nunku, muanjelu eu wakalua Satana, dîna didi diumvuija “muluishi.” Satana wakakula ne Eva ku diambuluisha dia nyoka umuambila ne: neikale bimpe yeye kayi ku bulombodi bua Nzambi. Adama ne Eva bakalonda Satana, kunyangabu malanda abu ne Mufuki wabu. Bua disungula diabu dibi edi, baledi betu ba kumpala bakajimija muoyo wa tshiendelele ne kutusambulujila tuetu buonso mpekatu, dipanga bupuangane ne lufu lutudi katuyi mua kuepuka.

Diakamue, Nzambi wakaleja dijinga diende dia kuakaja nsombelu mubi eu ne kupesha ndelanganyi ya Adama mpunga wa kupeta muoyo wa tshiendelele. Nzambi uvua mudianjile kuakula bua “muana” mbuena kuamba ne: muntu wa pa buende uvua ne bua kubutula Satana ne kujikija makenga onso adi Satana ne Adama ne Eva bakebele bantu. (Genese 3:15) “Muana” eu uvua ne bua kuikala nganyi? Bualu ebu buvua ne bua kumanyika mu kupita kua matuku.

Mu tshikondo atshi, Satana uvua wenda wenza muende muonso bua disua dimpe dia Nzambi kadikumbanyi to. Bantu babi bakavulangana bikole menemene. Nzambi wakangata dipangadika dia kubutula bantu babi ne mvula wa kabutu. Wakambila Noa muntu muakana bua kuenza buatu (mushete munene uvua ulelema pa mâyi) bua kudipandishaye ne bena mu dîku diende ne nyama ivuabu bamuambile bua kubueja mu buatu.

Tshidimu tshijima panyima pa Mvula wa kabutu mumane kutuadija kuloka, Noa ne bena mu dîku diende bakapatuka mu buatu pa buloba bukezula. Kadi “muana” kavua muanji kumueneka mu tshikondo atshi to.

​—Malu mangatshila mu Genese 1-11; Yuda 6, 14, 15; Buakabuluibua 12:9.