Nzambi mmulongolole bua kusungila bantu

Nzambi wakaleja muena lulamatu Abalahama ne: “muana” uvuaye mulaye uvua ne bua kupatukila mu ndelanganyi yende. Ku diambuluisha dia muana eu, bantu ba mu “bisamba bionso” bavua ne bua kubeneshibua. (Genese 22:18) Yakoba munkana wa Abalahama wakaya mu Ejipitu, muaba uvua bena mu dîku diende bavulangane ne balue tshisamba tshia kale tshia Isalele.

Bidimu ndambu bimane kupita mu Ejipitu, Palô mfumu wa tshikisu wakakuata bena Isalele ku bupika too ne pakalua Nzambi kujula muprofete Mose, uvua mupatule tshisamba etshi mu Ejipitu ne mutshisungile mu tshishima pakapandululaye mâyi a Mbuu Mukunze. Pashishe Nzambi wakapesha bena Isalele mikenji pamue ne Mêyi Dikumi bua kubalombola ne kubakuba. Mikenji eyi ivua ileja patoke milambu ivua bantu mua kufila bua kubabuikidilabu mibi. Ku diambuluisha dia nyuma wa Nzambi, Mose wakambila bena Isalele ne: Nzambi uvua ne bua kunutumina muprofete mukuabu. Muprofete au uvua ne bua kuikala “muana” uvuabu balaye.

Bidimu bipite pa 400 pashishe, Nzambi wakalaya mukalenge Davidi ne: “muana” uvua ne bua kulua uvuabu balaye mu Edene, uvua ne bua kukokesha mu bukalenge buvua ne bua kushala kashidi ne tshiendelele. Muana au uvua ne bua kuikala Masiya, Musungidi uvua Yehowa musungule bua kusungila bantu ne kupingaja Mparadizu pa buloba.

Ku diambuluisha dia Davidi ne baprofete bakuabu, Nzambi wakamanyisha ku kakese ku kakese malu a bungi bua Masiya. Bavua bamanyishe ne: uvua ne bua kuikala muena budipuekeshi ne muntu muimpe, ne mu bukokeshi buende uvua ne bua kujikija nzala, malu mabi ne mvita. Bantu bonso bavua ne bua kuikala mu ditalala munkatshi muabu nansha pankatshi pabu ne nyama. Masama, makenga ne lufu (malu avua Nzambi kayi mulongolole ku ntuadijilu) neajike ne bantu bakadi bafue nebapetulule muoyo pa buloba apa.

Nzambi uvua muambe ku butuangaji bua muprofete Mika ne: Masiya uvua ne bua kuledibua mu Beteleheme ne ku butuangaji bua muprofete Danyele uvua muambe ne: bavua ne bua kushipa Masiya. Kadi Nzambi uvua ne bua kujula Masiya ku lufu ne kumuteka Mukalenge mu diulu. Danyele uvua kabidi mudianjile kumona ne: Bukalenge bua Masiya buvua ne bua kupingana bua kashidi pa muaba wa makalenge makuabu onso a bana ba bantu. Masiya uvuaku bushuwa mulue anu muvuabu balaye anyi?

​—Malu mangatshila mu Genese 22-50, Ekesode, Dutelonome, 2 Samuele, Misambu, Yeshaya, Danyele, Mika, Zekâya 9:9.