“Tudi bamone Masiya!”

Bidimu bitue ku 400 bamane kufunda mukanda wa ndekelu wa mu tshiena Ebelu wa mu Bible, mêyi a buprofete a Mika avua atangila Masiya akakumbana: Yezu wakaledibua mu Beteleheme. Bidimu bitue ku 30 pashishe, mu tshidimu 29 bikondo bietu ebi, tshitupa tshia kumpala tshia mêyi a buprofete a Danyele avua atangila dilua dia Masiya akakumbana. Yezu wakatambula, Nzambi kumuelaye manyi a nyuma muimpe. Anu mu tshikondo atshi, Masiya anyi Muana uvuabu bindile bidimu bia bungi, wakamueneka!

Yezu wakatuadija diakamue mudimu wende wa ‘diamba dia lumu luimpe lua Bukalenge bua Nzambi.’ (Luka 8:1) Anu muvua mêyi a buprofete mambe, Yezu wakaleja muvuaye muntu muimpe, muena malu malenga ne uvua uditatshisha ne muoyo mujima bua bakuabu. Malongesha ende avua ambuluisha mu nsombelu ne aleja dinanga, ne uvua wondopa bantu bavua ne “masama a mishindu yonso,” bileja ne: Nzambi uvua nende. (Matayi 4:23) Bantu ba bidimu bionso bakaya mu tshisumbu kudi Yezu ne kuambabu ne: “Tudi bamone Masiya!”​—Yone 1:41.

Yezu wakamanyisha ne: kumpala kua Bukalenge buende kutuadijabu kukokesha, mvita, dikanka dia buloba ne bimvundu bia bungi bivua ne bua kuenzeka pa buloba. Wakadimuija bantu bonso bua ‘kushala batabale.’​—Mâko 13:37.

Yezu uvua muntu mupuangane uvua utumikila Nzambi, kadi uvua ne baluishi bavua balue kumushipa. Lufu luende luvua mulambu mupuangane bua kutupingajila tshivua Adama ne Eva bajimije, mmumue ne: ditekemena dia muoyo wa tshiendelele mu Mparadizu.

Dibishibua dia Yezu ku lufu kudi Nzambi panyima pa matuku asatu bu tshifukibua tshia mu nyuma tshia bukole, diakakumbaja mêyi a buprofete. Pashishe Yezu wakamuenekela bayidi bende bapite pa 500. Kumpala kua Yezu kupinganaye mu diulu, wakapesha bayidi bende mudimu wa kuyisha “bantu ba bisamba bionso” lumu luimpe lua bualu buende ne lua Bukalenge buende. (Matayi 28:19) Mmunyi muvuabu bakumbaje mudimu eu?

​—Malu mangatshila mu Matayi, Mâko, Luka, Yone, 1 Kolinto.