Tshitu muanji kuya pa muaba tshiyi ne katshingoma kanyi

TSHIMVUA KALE:

Mvua muledibue ne mukolele ku mpenga kua tshimenga tshia Lomo, muaba uvua bapele basombele. Nsombelu uvua mukole. Tshitu muanji kumanya mamuanyi mundedi to, ne tshivua muibidilangane ne tatuanyi to. Mvua mupete nkoleshilu wa mu njila.

Ngakatuadija kuiba pamvua ne bidimu dikumi. Pangakakumbaja bidimu 12, ngakanyema kumbelu bua musangu wa kumpala. Misangu ya bungi, tatuanyi uvua umpatuisha mu buloko ne umpingaja kumbelu. Mvua ntandangana ne bantu misangu ya bungi, mvua ne tshikisu ne mvua nkuatshila muntu yonso tshiji. Pangakakumbaja bidimu 14, ngakumbuka kumbelu bua kashidi. Ngakatuadija kunua diamba ne kushala muana wa mu njila. Mumvua tshiyi ne muaba wa kulala, mvua ndala mu mashinyi nshalamu too ne mêba a mu dinda. Pashishe mvua nkeba muaba uvua dijiba dia mâyi bua kuowa.

Ngakalua muivi wa kalanda musenga, mvua diafulangana bibuta, mbuelelangana mu nzubu minene ne mikese butuku. Lumu luanyi luakatuadija kunyanguka ne bakambikila diakamue bua kubuela mu tshisumbu tshia bantomboji banene bavua bamanyike, bavua bamfikishe kudiba makuta mu banke. Bu mumvua muena tshikisu, bakatuadija kuntshina bikole kudi bantomboji nanyi bakuabu. Tshivua mua kuya pa muaba tshiyi ne katshingoma kanyi to; mvua ndala naku ku mutu kua bulalu. Tshikisu, diamba, buivi, ngakuilu mubi, ne tshiendenda biakalua malu a mu nsombelu wanyi. Bampulushi bavua bankeba dîba dionso. Bakankuata misangu ya bungi, ne mvua mupitshishe bidimu bia bungi mu dibuela ne dipatuka mu buloko.

MUSHINDU UVUA BIBLE MUNSHINTULULE:

Musangu kampanda uvuabu bampatule mu buloko, ngakangata dipangadika dia kuya kutangila mamuanyi muakunyi. Tshivua mumanye ne: mamuanyi muakunyi eu ne bana bende babidi bakavua balue Bantemu ba Yehowa to. Bakangambila bua tuetu kuya nabu mu bisangilu bia Bantemu. Ngakitaba anu bua kuyamu. Patuakafika ku Nzubu wa Bukalenge, ngakalomba bua kusombela ku tshibueledi bua ngikale mmona badi babuela ne badi bapatuka. Kadi mvua anu ne katshingoma kanyi.

Malu avuabu balongeshe mu bisangilu abi akashintulula nsombelu wanyi. Ndi mvuluka mumvua mudimone bu mvua muaba mukuabu wa pa buawu. Bavua bangela muoyo ne musangelu ne batua mimuemua. Ntshidi anu mvuluka tshimuenekelu tshimpe ne disanka divua nadi Bantemu dituku adi. Bavua bantu bavua bashilangane kule ne kule ne bantu bamvua nsomba nabu.

Ngakatuadija kulonga Bible ne Bantemu. Pamvua ngenda ndonga, mvua ngenda mmona ne: bikengela nshintulule nsombelu wanyi mujima. Ngakangata ne mushinga mêyi adi mu Nsumuinu 13:20 adi wamba ne: ‘Udi wenda ne bena meji udi ulua muena meji, kadi udi ubuelakana ne bapote neakenge bua bualu ebu.’ Ngakajingulula ne: bidi bikengela nngumbuke munkatshi mua bantomboji bamvua ngenda nabu. Kabivua bualu bupepele to, kadi ku diambuluisha dia Yehowa ngakangata dipangadika edi.

Ngakalua ne mankenda a mubidi. Meme kuenza muanyi muonso bua kulekela kunua makanya ne diamba. Ngakakosesha nsuki yanyi ivua mile, ne meme kumbusha tukanu ku matshi ne kulekela ngakuilu mubi. Ngakatuadija kudikanda mu malu anyi onso bua musangu wa kumpala.

Tshivua musue kulonga ne kubala to, nunku bivua bikole bua meme kudifila ne muoyo umue ne kutumikila malu amvua ndonga mu Bible. Kadi, bu mumvua mudienzeje bikole, ngakatuadija kunanga Yehowa ku kakese ku kakese ne kondo kanyi ka muoyo kakatuadija kumpisha. Misangu ya bungi mvua ndipisha, tshiyi ngitaba ne: Yehowa uvua mua kumfuila luse bua malu mabi amvua muenze. Mu tshikondo atshi, pangakabala muyuki wa muvua Yehowa mufuile Davidi luse bua bubi bunene buvuaye muenze, bualu ebu bua kankolesha bikole.​—2 Samuele 11:1–12:13.

Lutatu lukuabu lumvua nalu ndua kuyisha ku nzubu ne ku nzubu malu amvua mulonge. (Matayi 28:19, 20) Mvua ne buôwa bua kusambakena ne muntu umvua muenzele bibi mu nsombelu umvua nende kumpala. Kadi ku kakese ku kakese ngakatantamena buôwa ebu. Ngakatuadija kupeta disanka dilelela pa kuambuluisha bantu bakuabu bua kulonga malu mimpe a kukema a Tatuetu wa mu diulu udi mubanji mu luse.

MASANKA ANGAKAPETA:

Kulonga malu a Yehowa kuakasungila muoyo wanyi. Balunda banyi ba bungi ba kale bakadi bafue ne bakuabu badi mu buloko, kadi meme ndi ne nsombelu muimpe mutambe ne muindile ne disanka matuku mimpe atshilualua. Ndi mulonge bua kuikala muena budipuekeshi, kutumikila ne kudikanda ku tshikisu tshianyi tshikole. Kuenza nunku, nkungambuluishe bua kuikala mu malanda mimpe ne bantu badi banyunguluke. Ndi ne disanka bua mundi musele Carmen mukaji muimpe. Meme ne yeye tudi ne disanka diakuambuluisha bantu bakuabu bua kulongabu malu a mu Bible.

Mpindieu ndi ngenza mudimu ne bujalame buonso, imue misangu ne bena ku banke, kadi pamutu pa kubiba ntu mbambila bulelela.