Uvua mumanye anyi?

Mmunyi muvua bantu ba bikondo bia kale batemesha kapia pavuabu benza luendu?

BIBLE udi wamba mu Genese nshapita wa 22 ne: Nzambi wakambila Abalahama bua kuya muaba uvua kule ne muaba uvuaye musombele bua kulambula mulambu. Bible udi wamba ne: ‘Abalahama wakangata nkunyi ya kapia ka pa tshioshelu, wakayiteka pa diapa dia muanende Izaka, yeye wakangata kapia ne kele mu tshianza tshiende; bubidi buabu bakaya popamue.’​—Genese 22:6.

Bible kena uleja muvua bantu batemesha kapia bikondo bia kale to. Nunku Abalahama ne Izaka bavuaku batemeshe kapia pashishe kukambulabu kenda kalakuka anyi? Mumvuiji kampanda wa malu a mu Bible wakamba ne: “Bivua pamuapa bikole bua ndimi ya kapia kushalayi yenda ilakuka pavua bantu benza luendu.” Kadi Abalahama ne muanende Izaka bavua mua kuikala bangate tshintu tshionso tshivuabu natshi dijinga bua kutemesha kapia.

Kadi bakuabu badi bamba ne: kutemesha kapia kakuvua bualu butekete mu bikondo abi to. Nunku dîba dionso divua bantu ne dijinga dia kutemesha kapia, bavua mua kuangata dikala dia kapia mu kapia kakavuabu batemeshe, pamuapa nansha kua muena mutumba. Bamanyi ba bungi ba malu a mu Bible badi bitaba ne: Abalahama uvua muangate makala a kapia mu kapia kakavuabu batemeshe kumpala kua kuenzabu luendu luabu. Uvua mua kuikala mukele pamuapa mu luesu lulembeleja ku shene, ne uvua mua kuikala muambule luesu alu. (Yesh. 30:14) Pashishe uvua mua kuikala muangate makala a kapia ne tumitshi tûme bua kutemesha kapia dîba dionso divuaye naku dijinga.