MU BINTU BIETU BIA KALE

“Bikale ne tshisumi ne dinanga dia bungi mu mioyo yetu kupita kumpala”

LUYA lukavua lutuadije kubanda mu Ditanu adi mu dinda mu ngondo wa 9 mu 1922 pavua bantu 8 000 bakunguile mu nzubu wa bisangilu. Mulombodi wakamanyisha ne: mu tshitupa tshia mushinga etshi, muntu yonso udi ne budikadidi bua kupatuka, kadi kabakuanyishila muntu nansha umue bua kubuela kabidi mu nzubu eu to.

Bakimba misambu mu tshitupa tshia ntuadijilu tshia “Ditumbisha,” pashishe Joseph Rutherford wakabanda ku tshiakuidi. Bantu ba bungi bavua mu nzubu au bavua ne mioyo kuulu kuulu. Bantu bakese bavua batambakana bua luya. Ngamba-malu wakabalomba ne muoyo mujima bua kusomba ne kuteleja. Pakatuadija muyuki, kuvuaku muntu uvua mutabalele tshilamba tshinene tshivunga bimpe, tshisuika tshilembeleja muulu anyi?

Muanetu Rutherford wakakuila pa tshiena-bualu tshia ne: “Bukalenge bua mu diulu bukadi pabuipi.” Munkatshi mua dîba ditue ku dimue ne tshitupa, dîyi diende dia bukole divua divuma mu nzubu au pavuaye umvuija muvua baprofete ba kale bamanyishe dilua dia Bukalenge kabayi ne buôwa. Pakafikaye pa buimpe bua muyuki, wakebeja ne: “Nudiku nuitabuja ne: Mukalenge wa butumbi ukadi mutuadije kukokesha anyi?” Bantu kuandamuna ne dîyi dikole ne: “Eyowa!”

Muanetu Rutherford wakamba ne dîyi dikole ne: “Nunku, alukilayi mu budimi, nuenu bana ba Nzambi mutambe bunene! Monayi Mukalenge udi ukokesha! Nudi bamanyishi ba lumu luende. Nanku manyishayi, manyishayi, manyishayi.”

Dîba adi, tshilamba tshivunga tshivua muulu tshiakavunguluka bimpe bimpe, mêyi aa kumuenekawu: “Manyishayi Mukalenge ne Bukalenge buende.”

Muanetu Ray Bopp udi uvuluka wamba ne: “Bantu bakasanka bikole.” Muanetu Anna Gardner wakaleja muvua “makunji manyukuke bua tshikashi.” Muanetu Fred Twarosh wakamba ne: “Bantu bonso bakimana kuulu anu bu muntu umue.” Muanetu Evangelos Scouffas wakamba yeye ne: “Bivua anu bu ne: bukole kampanda bua bungi buakatujula mu nkuasa yetu, tuetu kuimana kuulu, binsonji bitengebele mu mêsu.”

Bantu ba bungi bavua mu mpungilu au bakavua bayisha lumu luimpe lua Bukalenge. Kadi dîba adi bakapeta bukole bupiabupia bua kukumbaja mudimu au. Muanetu Ethel Bennecoff wakamba ne: balongi ba Bible bakapatuka “bikale ne tshisumi ne dinanga dia bungi mu mioyo [yabu] kupita kumpala.” Muanetu Odessa Tuck uvua ne bidimu 18 tshikondo atshi wakafuma mu mpungilu au mudisuike bua kuandamuna lubila lua ne: ‘Nnganyi waya?’ wakamba ne: “Tshivua mumanye kua kuya, anyi mua kukuya, peshi tshia kuenza to. Tshimvua mumanye tshivua anu ne: mvua musue kuikala bu Yeshaya wakamba ne: ‘Ke meme eu, untume meme!’” (Yesh. 6:8) Muanetu Ralph Leffler wakamba ne: “Dituku dia disanka adi divua ntuadijilu wa bushuwa wa kampanye ka dimanyisha Bukalenge kadi katuangane pa buloba lelu eu.”

Kabiena bikemesha bua mudi mpungilu wa mu 1922 mu Cedar Point, mu Ohio au muikale mpungilu wa katshia ne katshia mu malu a Bukalenge! Muanetu George Gangas wakamba ne: “Mpungilu au wakampesha dijinga dia kubenga kupumbisha mpungilu nansha umue.” Uvua uvuluka ne: kavua muanji kupumbishaku mpungilu nansha umue. Muanetu Julia Wilcox wakafunda ne: “Tshiena mua kumvuija disanka dindi mpeta dîba dionso didibu bakula bua mpungilu wa mu 1922 mu Cedar Point mu mikanda yetu to. Ntu musue kuamba misangu yonso ne: ‘Tuasakidila Yehowa bua muuvua mumpeshe mpunga wa kubuela mu mpungilu au.’”

Bidi bimueneka ne: ba bungi ba kutudi badi bavuluka malu mimpe a muomumue a mpungilu kampanda uvua musankishe mioyo yetu bikole ne mutuwuje ne tshisumi ne dinanga bua Nzambi wetu munene ne Mukalenge wende. Patudi tuvuluka malu a nunku, bidi bitusaka petu bua kuamba ne: “Tuasakidila Yehowa bua muuvua mumpeshe mpunga wa kubuela mu mpungilu au.”

Diandamuna disambila dienza mu musokoko

Arthur ne Nellie Claus bakafika kumpala kua dîba bua kupeta miaba mimpe ya kusombabu. Arthur udi wamba ne: “Mvua ndondesha muaku wonso uvua upatuka.” Diakamue munda muakatuadija kumunyenga. Wakapatuka mu nzubu wa bisangilu au ku tshimfula muoyo mumanye ne: kavua mua kubuelamu kabidi to. Muntu uvua ku tshiibi wakamuebeja ne: “Mmunyi muudi mua kupatuka dîba dia buena edi?” Kadi Arthur uvua mumanye ne: bivua bikengela apatuke.

Pavua Arthur mualukile, wakumvua tshikashi tshikole tshifumina mu nzubu au. Yeye kubanga kukeba kaba ku nzubu au kavuaye mua kumvuila tshivua tshienzeka munda, kupetaye kaba kakubandila pa musaka wa nzubu, metre matue ku 4,8 kuulu. Pashishe wakabanda mutangile ku mmienu ivua pa musaka wa nzubu au mikale ne madidishi makangula.

Kuntu aku Arthur wakapeta bana betu ba bungi bapampakana batangile kudi ngamba-malu. Bavua babalombe bua kukosa mionji ya bungi musangu umue bua tshilamba tshivunga tshikutuluke. Kadi bua kukosa mionji yonso musangu umue bavua dijinga ne kele kakuabu. Arthur uvuaku ne kele ka mu mpaya katue anyi? Diakalenga uvua naku. Arthur ne bana betu bakuabu abu bakadilongolola bindile tshikuma tshivuabu babambile. Pavua muanetu Rutherford wamba ne: “Manyishayi!” bua musangu muibidi, bavua ne bua kukosa mionji ayi.

Bantu bavua bamone bualu ebu bakaleja muvua tshilamba tshinene tshivua ne mekala asatu atshi tshivunguluke bimpe bimpe. Munkatshi muatshi muvua tshimfuanyi tshia Yezu.

Panyima, bana betu abu bakumvuija Arthur ne: bavua babandile ku tshibandilu bua kufika pa musaka, ne pashishe kumbushabu tshibandilu atshi. Kabavua mua kuya kukeba diambuluisha, nunku bakalomba Yehowa bua abatumine muanetu wa balume muikale ne kele. Bana betu abu bavua batuishibue ne: Yehowa uvua muandamune disambila diabu mu mushindu wa dikema.