Mandamuna a nkonko yenu

▪ Mmalu kayi adi bana mua kulonga bua kukolabu mu nyuma?

Baledi bena Kristo badi benza muabu muonso bua kukolesha bana babu ne “mibelu ne didimuija bia Yehowa.” (Ef. 6:4) Tshilejilu, baledi ba bungi mbamone ne: bidi ne mushinga wa bungi bua kukonkonona mvese wa ku dituku pamue ne bana babu mu dinda dionso. Mu ntendelelu wa mu dîku ne mu bikondo bikuabu, bena mu dîku badi mua kumona filme yetu ne kuyukidilangana malu adimu, kuyukila bua bimue biena-bualu bidi mu mukanda wa Les jeunes s’interrogent, kuenza dinaya didi dileja muvua bualu kampanda bua mu Bible buenzeke anyi kuenza manaya makuabu. Kadi bua bana kuyabu “batangile ku dikola,” baledi badi ne bua kubalongesha malu manene a mu Bible.​—Eb. 6:1.

Tumonayi malu atutu tulongesha bantu ba mu teritware wetu. Patutu tupetangana ne muntu bua musangu wa kumpala anyi tumupinganyina, tutu tudienzeja bua kutuadija kulonga nende Bible ku diambuluisha dia mukanda wa Bible utu ulongesha tshinyi menemene? Patudi tujikija kulonga nende mukanda eu, tutu tulonga nende mukanda wa “Nudilame mu dinanga dia Nzambi.” Bua tshinyi? Bualu mukanda wa Bible ulongesha udi wambuluisha balongi bua kumanya malongesha manene a mu Bible. Kadi mukanda wa “Dinanga dia Nzambi” udi ubalongesha mua kutumikila mêyi manene a mu Bible dituku dionso. Kulonga mikanda yonso ibidi eyi kudi kuambuluisha bapiabapia bua ‘kuela miji’ mu Kristo ne ‘kujalama mu ditabuja.’ (Kolos. 2:6, 7) Malu aa kaenaku mua kuambuluisha kabidi bana betu anyi? Badi pabu dijinga ne kumanya malu adi atangila tshia kupikula natshi bantu, Bukalenge bua Nzambi, ne tshitu tshienzeka patu muntu ufua. Badi ne bua kumanya tshidi Nzambi mulekeele makenga atungunuka ne kumanya kabidi malu adi aleja ne: tudi mu matuku a ku nshikidilu wa ndongoluelu wa malu eu. Badi ne bua kuikala batuishibue ne: Bantemu ba Yehowa ke badi ne bulelela. Bana badi kabidi ne bua kumanya mêyi manene a mu Bible ne mushindu udibu mua kuibidija “bukole buabu bua kujingulula nabu malu.” (Eb. 5:14) Bushuwa, baledi badi ne bua kulongesha bana babu bilondeshile bidimu biabu ne lumvu ludibu nalu. Kadi bana ba bungi batu bamueneka bakumbane bua kutuadija kulonga malongesha manene a mu Bible nansha bobu batshidi bapuekele.​—Luka 2:42, 46, 47.