Masanka apeta bantu badi batumikila Nzambi

Muprofete Mose wakamba ne: tuetu tutumikila mikenji ya Nzambi neatubeneshe. (Dutelonome 10:13; 11:27) Katuena tutumikila Nzambi bualu tudi tutshina bua katunyoki to. Ngikadilu mimpe ya Nzambi ke idi itusaka bua tuetu kumutumikila, bualu tudi bamunange ne katuena basue kuenza bualu budi mua kumunyingalaja to. “Mona tshidi dinanga dia Nzambi diumvuija: bua tutumikile mikenji yende.”​—1 Yone 5:3.

Kadi mmushindu kayi udi kutumikila Nzambi kupetesha muntu masanka? Tukonkononayi mishindu ibidi eyi.

1. KUTUMIKILA NZAMBI NEKUTUVUIJE BENA MEJI

“Meme, Yehowa, ndi Nzambi webe, Yeye udi ukulongesha bua diakalenga diebe, . . . udi ukulombola mu njila uudi ne bua kuendela.”​—YESHAYA 48:17.

Mufuki wetu Yehowa Nzambi, mmutumanye ne utu utupesha buludiki butudi nabu dijinga. Tuetu basue bua malongesha ende atuambuluishe bua kuangata mapangadika mimpe, tudi ne bua kulonga Mifundu ya tshijila bua tumanye tshidi Nzambi musue bua tuetu kuenza, pashishe kutumikila malu atudi balongamu.

2. KUTUMIKILA KUDI KUTUPETESHA DISANKA

“Bantu badi bateleja dîyi dia Nzambi ne badilama ke ba diakalenga!”​—LUKA 11:28.

Lelu, bantu miliyo ya bungi badi batumikila Dîyi dia Nzambi badi bapeta disanka dilelela. Tuangate tshilejilu tshia muntu mukuabu wa mu Espanye uvua ufiika munda lukasa ne uvua wenzela bantu bakuabu malu ne luonji too ne mukajende. Dimue dituku wakabala mifundu ya muprofete Mose, yeye kubalamu bua muvua Jozefe muana wa Yakoba muikale muntu wa malu mapole. Bavua bapane Jozefe bu mupika ne bamuele mu buloko kayi ne tshivuaye muenze; nansha nanku, wakashala anu muntu wa malu mapole, wa ditalala uvua ufuilangana luse. (Genese, nshapita wa 37-45) Muntu wa mu Espanye au udi wamba ne: “Pangakelangana meji a tshilejilu tshia Jozefe etshi, biakansaka bua meme kuikala panyi ne bupole, bulenga, ne didikanda. Lelu bingambuluishe bua meme kuikala panyi ne nsombelu wa disanka.”

Mifundu ya tshijila idi itupesha mibelu mikuabu ya mutudi ne bua kuenzela bakuabu malu. Netuakule bua mibelu ayi mu buondoke mu tshiena-bualu tshidi tshilonda.