“Buloba nebupatule bintu biabu; Nzambi, Nzambi wetu, neatubeneshe.”—MISAMBU 67:6

Udi mua kupeta masanka a tshiendelele a kudi Mufuki wetu

Nzambi wakalaya muprofete Abalahama ne: umue wa ku ndelanganyi yende uvua ne bua kupetesha “bisamba bionso bia pa buloba” mabenesha. (Genese 22:18) Nnganyi uvua ne bua kuikala umue wa mu ndelanganyi amu?

Kukadi mpindieu bidimu bipite pa 2 000, Nzambi wakapesha Yezu, uvua wa mu ndelanganyi ya Abalahama, bukole bua kuenza bishima bia dikema. Bishima abi biakaleja ne: malu avuabu balaye Abalahama avua mua kufikila bisamba avua ne bua kukumbana ku butuangaji bua Yezu.—Galatiya 3:14.

Bishima bivua Yezu muenze biakaleja ne: yeye ke muntu uvua Nzambi musungule bua kupetesha bantu mabenesha, biakaleja kabidi mushindu uvua Nzambi mua kuenza nende mudimu bua kupetesha bantu mabenesha a tshiendelele. Mona muvua bishima bivua Yezu muenze bileje ngikadilu yende ya mushinga eyi.

Bulenga: Yezu wakondopa bantu bavua basama.

Musangu mukuabu muena nsudi wakasengelela Yezu bua kumuondopa. Yezu wakamulenga yeye kumuandamuna ne: “Ndi musue!” Diakamue nsudi yende yonso yakajimina.—Mâko 1:40-42.

Muoyo wa kupeshangana bintu: Yezu wakadisha bantu bavua ne nzala.

Yezu kavua musue bua bantu bapingane ne nzala ku mabu to. Misangu ya bungi, wakadisha bantu mu tshishima pakavudijaye mampa ndambu ne tumishipa tukese. (Matayi 14:17-21; 15:32-38) Bobu bamane kudia, bantu bonso bakukuta ne biakudia biakashala bipite bungi.

Luse: Yezu wakabisha bantu ku lufu.

Yezu wakabisha muana mulela umue wa mukaji mukamba uvua wenda udila, uvua kayi ne wende wa kumutabalela, bualu ‘wakamumvuila luse.’—Luka 7:12-15.

MASANKA A TSHIENDELELE PA BULOBA

Yezu ukavua mumane kuleja ne: Nzambi udi ne bukole bua kupetesha bantu masanka. Mu katupa kîpi emu, padiye upingana anu mukavuaye mulaye, Wa Bukole Buonso neakuate nende mudimu bua kuenza bishima binene pa buloba bujima kupita ne bikavuaye muenze kumpala.

Nsombelu neikale mushindu kayi pa buloba pakumbaja Nzambi malu onso avuaye mulaye Abalahama? Bantu bonso badi banange Nzambi ne bamunemeka “nebapiane buloba” ne “nebikale ne disanka dipite bungi mu ditalala divule.” (Misambu 37:11) “Lufu kaluakuikalaku kabidi, nansha madilu, nansha mbila ya miadi, nansha bintu bidi bisama kabiakuikalaku kabidi.”—Buakabuluibua 21:4.

Netuikale ne diakalenga dia dikema dia kusomba kashidi pa buloba mu ditalala. Tudi tukulomba bua kulonga malu makuabu adi atangila mabenesha ikala bukokeshi bua Nzambi mua kupetesha bantu mu katupa kîpi emu, mu site wa jw.org.