Nkonko ya babadi
Ngikadilu idi mu Galatiya 5:22, 23 ke idi yenza “dimuma dia nyuma” nkayayi anyi?
Mvese eyi idi itela ngikadilu tshitema ya buena Kristo. Idi yamba ne: “Dimuma dia nyuma didi: dinanga, disanka, ditalala, lutulu, bulenga, buimpe, ditabuja, bupole, didikanda.” Nunku katuedi meji ne: nyuma wa Nzambi udi mua kutuambuluisha bua kupeta anu ngikadilu tshitema mimpe eyi nkayayi to.
Tangila tshivua muposto Paulo mufunde mu mvese idi kumpala kuayi: “Malu a mubidi . . . ngowu aa: masandi, malu a bukoya, tshikadilu tshia dikamakama, ditendelela dia mpingu, malu a mîdima, lukuna, matandu, mukawu, biji bikole bia lukasa, makokianganyi, matapuluka, tusumbusumbu, dialakana, dikuatshika dia maluvu, bibilu bia bisankasanka ne malu a buena aa.” (Gal. 5:19-21) Nunku, Paulo uvua mua kuikala mutele “malu a mubidi” makuabu, a buena avuaye muakuile mu Kolosayi 3:5. Bia muomumue, yeye mumane kutela ngikadilu mimpe tshitema, wakamba ne: “Kakuena mukenji udi ukandika malu a nunku to.” Nunku Paulo kavua mutele ngikadilu mimpe yonso idi nyuma muimpe mua kutuambuluisha bua kupeta to.
Tudi tumvua bualu ebu bimpe patudi tufuanyikija ngikadilu eyi ne tshivua Paulo muambe pavuaye mufundile tshisumbu tshia Efeso. Wakafunda ne: “Dimuma dia butoke ndienza ne buimpe ne buakane ne bulelela bia mishindu yonso.” (Ef. 5:8, 9) Bushuwa, “buimpe,” kusangisha ne buakane ne bulelela, bidi mu “dimuma dia butoke,” kadi budi kabidi mu “dimuma dia nyuma.”
Bia muomumue, Paulo wakalomba Timote bua ‘ipatshile buakane, dilamata Nzambi, ditabuja, dinanga, dinanukila ne bupole malu’; tuambe ne: ngikadilu mimpe isambombo. (1 Tim. 6:11) Mbatele muaba eu anu ngikadilu isatu ya mu “dimuma dia nyuma” eyi: ditabuja, dinanga, bupole malu. Kadi Timote uvua kabidi ne bua kuikala dijinga ne diambuluisha dia nyuma bua kupeta ngikadilu mikuabu ivuabu batele ayi. Mmumue ne: buakane, dilamata Nzambi, ne dinanukila.—Fuanyikija ne Kolosayi 3:12; 2 Petelo 1:5-7.
Nunku, Galatiya 5:22, 23 kena wakula bua ngikadilu yonso idi muena Kristo ne bua kupeta to. Nyuma wa Nzambi udi mua kutuambuluisha bua kupeta ngikadilu tshitema idi yenza “dimuma dia nyuma.” Kadi kudi ngikadilu mikuabu itudi mua kupeta patudi tuenda tukola mu nyuma ne ‘tuvuala bumuntu bupiabupia buvua bufukibue bilondeshile disua dia Nzambi mu buakane ne lulamatu bia bushuwa.’—Ef. 4:24.