Yehowa neakuambuluishe mu ntatu

1-2. Ntatu kayi idi batendeledi ba Yehowa ba lulamatu mua kutuilangana nayi?

BUALU bubi bobu butufikile, nsombelu wetu udi mua kushintuluka mu mupodi wa dîsu. Tshilejilu, muanetu mukuabu diende Luisa bakamukuata kansere kabi menemene. Doktere wakamuambila ne: kuvua kumushadile ngondo mikese bua yeye kufua. Muanetu Monika ne bayende bavua badifila bikole mu midimu ya Yehowa. Dimue edi, Monika wakamanya ne: bayende uvua mukulu uvua wenza mpekatu mu musokoko kukavua matuku a bungi. Bakambila muanetu Olivia utshivua mujike bua kunyema, kumbuka kuende bualu tshipepele tshikole tshikavua pa kudituta. Pakapinganaye, wakasangana nzubu wende munyangakaja kudi tshipepele. Nsombelu wa bana betu batudi batele aba, wakashintuluka mu mupodi wa dîsu. Ukadiku mutuilangane ne nsombelu ya nunku ivua mishintulule nsombelu webe mu mupodi wa dîsu anyi?

² Tuetu batendeledi ba Yehowa tutu tutuilangana ne ntatu ne masama bitu bikuata bantu bonso. Pamuapa tudi ne bua kunanukila kabidi padibu batukengesha anyi batuluisha kudi bantu badi batukine. Nansha mudi Yehowa kayi utuepula ku ntatu ya nunku, mmulaye ne: neatuambuluishe. (Yesh. 41:10) Yehowa yeye mutuambuluishe, netuikale anu ne disanka, netuangate mapangadika mimpe nansha tuetu mu ntatu mikole. Mu tshiena-bualu etshi, netumone mishindu inayi idi Yehowa utuambuluisha mu ntatu. Netumone kabidi tshitudi ne bua kuenza bua yeye kutuambuluisha.

YEHOWA NEATULAME

3. Padi lutatu lukole lutukuata, bidi mua kutukolela bua kuenza tshinyi?

³ Lutatu. Padi lutatu lukole lutukuata, bidi mua kutukolela bua kuela meji bimpe ne kuangata mapangadika mimpe. Bua tshinyi? Bualu tudi mua kuikala ne kanyinganyinga kakole. Dîba adi, tudi mua kudimona anu bu badi bendela mu dibungi didi ditupangisha bua kumona njila wa kuyila. Mona muvua bana betu ba bakaji babidi batukadi batele kuulu eku bumvue bua ntatu ivuabu nayi. Olivia udi wamba ne: “Tshipepele atshi tshimane kunyanga nzubu wanyi, ngakapangila tshia kuenza, meme kudiumvua mushikile.” Monika udi wamba bua muvua bayende mumuele mâyi ku makasa ne: “Ngakumvua bibi bitambe! Nkavua ngumvua anu bu ne: mbantape ku muoyo. Tshitshivua kabidi nkokesha bua kuenza malu bu konso eku to. Tshivua muele meji ne: bualu bua nunku buvua mua kumfikila to.” Mmunyi mudi Yehowa ulaya bua kutuambuluisha patudi bazajibue mushindu eu?

4. Bilondeshile Filipoyi 4:6, 7, ntshinyi tshidi Yehowa mutulaye?

⁴ Tshidi Yehowa wenza. Mmulaye bua kutupesha tshidi Bible ubikila ne: “Ditalala dia Nzambi.” (Bala Filipoyi 4:6, 7.) Ditalala adi, nditukija dia mu muoyo ne mu lungenyi didi difumina ku malanda mimpe ne Yehowa. Nditalala dimpe dia dikema, didi dipite dijingulula dionso dia malu. Bikatuku bikufikile bua kudiumvua mutukije wewe mumane kusambila Yehowa ne muoyo mujime anyi? Wewe umvua nanku, manya ne: ‘nditalala dia Nzambi.’

5. Mmunyi mudi ditalala dia Nzambi dilama mioyo yetu ne meji etu?

⁵ Filipoyi 4:7 udi wamba kabidi ne: ditalala dia Nzambi adi “nedilame” anyi nedikube “mioyo yenu ne bieledi bienu bia meji.” Muaku wa mu tshiena Greke udibu bakudimune ne: “kulama,” mmuaku uvuabu batamba kutela bua kuleja basalayi bavua balama tshimenga, batshikuba pavuabu balua kutshiela mvita. Bantu ba mu tshimenga tshivuabu balama, bavua balala mu ditalala bamanye ne: bisumbu bia basalayi bivua bilama ku biibi. Bia muomumue, padi ditalala dia Nzambi dilama mioyo yetu ne meji etu, tudi tudiumvua batukije bamanye ne: tudi mu bukubi. (Mis. 4:8) Nsombelu wetu yeye kayi mushintuluke diakamue anu bu muvuabi bifikile Hana, tudi anu mua kuikala ne ditalala. (1 Sam. 1:16-18) Patutu tutukija nanku, tutu tumona ne: mbipepele bua kuela meji bimpe ne kuangata mapangadika a meji.

6. Ntshinyi tshitudi ne bua kuenza bua kupeta ditalala dia Nzambi? (Tangila kabidi tshimfuanyi.)

⁶ Tshitudi ne bua kuenza. Paudi mu lutatu, bikila mulami. Mmushindu kayi uudi mua kumubikila? Sambila too ne pawapeta ditalala dia Nzambi. (Luka 11:9; 1 Tes. 5:17) Luis utukadi batele kuulu eku udi umvuija muvuaye yeye ne mukajende Ana bafike ku dinanukila pavuabu bamuambile ne: kuvua kumushadile anu ngondo mikese bua kufua. Udi wamba ne: “Tshikondo bu atshi, bitu bikole menemene bua kusungula mushindu wa kukuondopabu ne kuangata mapangadika mu malu makuabu. Kadi, disambila ke divua ditupeteshe ditalala tshikondo atshi.” Luis ne mukajende badi bamba ne: bakasambila ne muoyo mujima misangu ya bungi balomba Yehowa ditalala dia mu muoyo ne dia mu lungenyi ne meji, bua kuangata mapangadika mimpe. Bakamona ne: Yehowa mmubambuluishe. Wewe mutuilangane ne lutatu, suminyina mu disambila, dîba adi neupete ditalala dia Yehowa dialama muoyo webe ne meji ebe.—Lomo 12:12.

YEHOWA NEAKUJALAMIJE

7. Ntshinyi tshitudi mua kumvua patudi mu lutatu lukole?

⁷ Lutatu. Patudi mu lutatu, katuakuikala tudiumvua bu konso eku to, tuela meji anyi tuenza malu bu pa tshibidilu to. Dîba dia nanku, tunyinganyinga tudi mua kutupita bungi. Ana utukadi batele kuulu eku, udi uleja muvuaye mumvua kanyinganyinga kakole pavua bayende Luis mufue. Wakamba ne: “Pantu ndiumvua nkaya tshiyi ne bayanyi, bitu bintonda bikole. Ntu ntuadija kumvua tshiji bua mudiye mufue.” Misangu mikuabu, Ana uvua udiumvua nkaya, umvua bibi pavuabi bimufikila bua kuangata mapangadika mu malu avua Luis mumanye bikole. Uvua udimona bu uvua mu mâyi, tshipepele tshimukupa eku ne eku. Mmunyi mudi Yehowa utuambuluisha padi tunyinganyinga tututshibuila panshi?

8. Anu mudi Yeshaya 33:6 uleja, Yehowa udi utujadikila tshinyi?

⁸ Tshidi Yehowa wenza. Mmulaye bua kutujalamija. (Bala Yeshaya 33:6.) Patu tshipepele tshikole tshituadija, mazuwa atu atuadija kutenkakana bibi menemene. Mazuwa a bungi atu menze ne biamu ku nseke bitu biajalamija patuku tshipepele. Biamu abi bitu biambuluisha bua kaikadi atenkakana to. Dîba adi, bantu badi mu mazuwa nebikale mu bukubi, luendu ludibu benza kaluakubatonda to. Kadi bua biobi kufika ku diajalamija, bidi bikengela mazuwa ikale mu lubilu. Bia muomumue, Yehowa neatujalamije tuetu tutungunuka ne kumuenzela mudimu ne lulamatu patudi mu ntatu.

9. Mmunyi mudi bintu bia kuenza nabi makebulula mua kutuambuluisha bua kukepesha tunyinganyinga? (Tangila kabidi tshimfuanyi.)

⁹ Tshitudi ne bua kuenza. Padi tunyinganyinga tukutshibuila panshi, enza muebe muonso bua kuikala kusambila, kubuela bisangilu ne kuyisha. Biobi bikukolele bua kuenza malu au bu kumpala, manya ne: Yehowa katu muena malu makole to, utu utulomba bua kuenza anu tshitudi mua kukokesha. (Fuanyikija ne Luka 21:1-4.) Pa kumbusha malu au, dikosele dîba dia kuikala kudilongela Bible ne kuelangana meji a malu audi ulonga. Bulongolodi bua Yehowa budi butupatuila filme ne biena-bualu bimpe bidi bituambuluisha bua kukepesha tunyinganyinga patudi mu ntatu. Bua kupeta malu audi nawu dijinga, udi mua kuenza mudimu ne bintu bia kuenza nabi makebulula bidi mu muakulu wenu bu mudi JW Library, Index des publications des Témoins de Jéhovah ne Mukanda wa makebulula wa Bantemu ba Yehowa. Monika utukadi batele kuulu eku wakamba ne: pavuaye umvua kanyinganyinga, uvua wenza makebulula mu mikanda yetu bua kupeta mibelu ivua mua kumuambuluisha. Tshilejilu, wakenza makebulula a muaku “tshiji.” Misangu mikuabu wakenza makebulula bua “lulamatu” anyi “diedibua mâyi ku makasa.” Uvua ubala malu au too ne pavua kanyinganyinga kajika. Udi wamba ne: “Pantshivua ntuadijilaku kubala, mvua nganji ngumvua bibi, kadi pamvua ntungunuka ne kubala, mvua ngumvua anu bu ne: Yehowa udi ungela mu tshitupa. Ngakafika ku dimanya ne: uvua mumanye kanyinganyinga kanyi ne uvua ungambuluisha.” Yehowa yeye ukuambuluisha mushindu eu, neukepeshe tunyinganyinga too ne paudi utukija.—Mis. 119:143, 144.

YEHOWA NEAKUAMBULUISHE

10. Mmunyi mututu tumvua lutatu lukole luolu lutukuate?

¹⁰ Lutatu. Lutatu lukole luolu lukukuate, nekuikale matuku awatuadija kudiumvua kuyi ne bukole, meji akushikile. Tudi mua kutuadija pamuapa kudiumvua anu bu munyemi wa lubilu lukole, kadi ukadi utebuka bualu mmutapike. Tudi mua kubanga kutata bua kuenza midimu ituvua tuenza konso eku bipepele. Anyi pamuapa katuakuikala kabidi ne dijinga dia kuenza midimu ivua itusankisha kumpala to. Bidi mua kutukolela bua kujuka anu bu Eliya. Tukadi tujinga anu bua kulala. (1 Bak. 19:5-7) Yehowa udi ulaya bua kutuenzela tshinyi patudi batekete?

11. Yehowa utu utuambuluisha kabidi mushindu kayi? (Misambu 94:18)

¹¹ Tshidi Yehowa wenza. Mmulaye bua kutuambuluisha. (Bala Misambu 94:18.) Anu mutu munyemi wa lubilu ujinga bua bamuambuluishe, tuetu petu tudi dijinga ne diambuluisha bua tutungunuke ne kuenzela Yehowa mudimu. Mu bikondo bia nanku, Yehowa udi utujadikila ne: “Meme, Yehowa Nzambi webe, ndi nkuata tshianza tshiebe tshia balume bikole, yeye udi ukuambila ne: ‘Kutshinyi to. Nenkuambuluishe.’” (Yesh. 41:13) Mukalenge Davidi wakamona muvua Yehowa mumuambuluishe. Pavuaye mutuilangane ne ntatu ne pavua baluishi bende bakeba kumuenzela bibi, wakambila Yehowa ne: “Tshianza tshiebe tshia balume tshidi tshinkuatshisha.” (Mis. 18:35) Kadi mmunyi mutu Yehowa utuambuluisha?

12. Mbanganyi badi Yehowa mua kusaka bua kutuambuluisha patudi batshiokesha kudi malu?

¹² Yehowa utu usaka bantu bakuabu bua kutuambuluisha. Tshilejilu, pavua Davidi mupungile, Yonatana mulunda wende wakalua kumukankamija ne mêyi mimpe. (1 Sam. 23:16, 17) Bia muomumue, Yehowa wakasungula Elisha bua ikale wambuluisha Eliya. (1 Bak. 19:16, 21; 2 Bak. 2:2) Lelu, Yehowa udi mua kusaka bena mu mêku etu, balunda betu, anyi bakulu ba mu tshisumbu bua kutuambuluisha. Kadi patu muntu utunyingalaja, tutu tumvua anu bua kuditola, katuyi basue kuikala pamue ne bakuabu to. Bitu bienzekela bantu nanku. Tshia kuenza ntshinyi bua Yehowa kutuambuluisha?

13. Ntshinyi tshitudi ne bua kuenza bua Yehowa atuambuluishe? (Tangila kabidi tshimfuanyi.)

¹³ Tshitudi ne bua kuenza. Dienzeja bikole bua kulekela lungenyi lua kuditola. Misangu yonso itudi tuditola, tudi tutuma meji etu anu ku majinga etu ne ku ntatu itudi nayi. Tuetu tuenza nanku, tudi mua kufika ku diangata mapangadika mabi. (Nsu. 18:1) Kutu misangu itutu basue kuikala nkayetu, nangananga tshikondo tshidi malu makole atufikila. Tuetu tuditola mutantshi mule, bidi bimueneka bu ne: tudi tubenga diambuluisha dia bantu badi Yehowa usaka bua kutuambuluisha. Nansha tuetu mu bikondo bikole bia mushindu kayi, mbimpe tuitabe diambuluisha dia kudi bena mu mêku etu, dia kudi balunda betu ne dia kudi bakulu ba mu tshisumbu. Tubamone anu bu ne: Yehowa ke udi mubatume bua kutuambuluisha.—Nsu. 17:17; Yesh. 32:1, 2.

YEHOWA NEAKUKOLESHA

14. Mmalu kayi adi enza buôwa atudi mua kutuilangana nawu?

¹⁴ Lutatu. Tudi mua kutuilangana ne nsombelu idi yenza buôwa. Mu Bible, batendeledi ba Yehowa ba lulamatu badi bakula bua bikondo bivuabu ne kanyinganyinga ne luzakalu bua baluishi babu anyi bua muvuabu babafunyina. (Mis. 18:4; 55:1, 5) Tuetu petu tudi mua kutuilangana ne buluishi ku mudimu, mu kalasa, kudi bena mu mêku etu anyi kudi mbulamatadi. Tudi mene mua kumvua buôwa ne: tukadi tufua bua disama ditudi nadi. Dîba dia nanku, tudi mua kudiumvua katuyi ne bukole anu bu muana mutekete. Mmunyi mudi Yehowa utuambuluisha mu bikondo bia nanku?

15. Misambu 94:19 udi utujadikila tshinyi?

¹⁵ Tshidi Yehowa wenza. Yehowa utu utusamba ne utupesha ditalala. (Bala Misambu 94:19.) Mêyi a mu musambu eu adi mua kutusaka bua kudifuanyikijila kana ka bakaji kikale ne buôwa bua makubakuba ne mipenyi idi yela. Papa wende udi ulua umuambula, umubembeleja too ne mudiye ulala nansha mudi makubakuba atungunuka ne kudila; muana au udi udiumvua mu bukubi padi tatuende mumukongoloje. Tudi dijinga ne Tatu wetu wa mu diulu bua atuele mu maboko too ne patudi tutukija. Mmunyi mudi Yehowa mua kutusamba mushindu au?

16. Ntshinyi tshitudi ne bua kuenza bua Yehowa atusambe? (Tangila kabidi tshimfuanyi.)

¹⁶ Tshitudi ne bua kuenza. Pitshisha dîba dia bungi ne Yehowa; mmumue ne: ikala usambila, ubala Dîyi diende. (Mis. 77:1, 12-14) Nunku padi malu akutonda, tshintu tshia kumpala tshiwenza nkusambila. Ambila Yehowa malu adi akuenza buôwa. Bala Dîyi diende bua upete busambi. (Mis. 119:28) Udi mua kupeta mvese misunguluke idi mua kukusamba paudi ne buôwa. Tshilejilu, udi mua kupeta mêyi adi akankamija mu mukanda wa Yobo, Misambu, Nsumuinu, nansha mu mêyi a Yezu adi mu Matayi nshapita 6. Neupete busambi bua kudi Yehowa wewe umusambila ne ubala Dîyi diende.

17. Ndishindika kayi ditudi ne bua kuikala nadi?

¹⁷ Tudi ne bua kutuishibua ne: Yehowa neikale netu patudi mu ntatu. Kakutulekela nkayetu to. (Mis. 23:4; 94:14) Mmulaye bua kutulama, kutushindamija, kutuambuluisha, ne kutusamba. Yeshaya 26:3 udi wamba bua Yehowa ne: ‘Neakube badi bamueyemena ne muoyo mujima; neabapeshe ditalala didi kadiyi dijika, bualu badi bamueyemena yeye.’ Nunku eyemena Yehowa, itaba diambuluisha dia kudi bantu badiye usaka bua kutuambuluisha. Wewe muenze nanku, neupetulule bukole nansha mu bikondo bia ntatu.