Didipuekesha dikusake bua kuitaba malu audi kuyi mumanye

1. Yehowa mmutufuke ne bukole bua kuenza tshinyi? Bua tshinyi?

YEHOWA mmutufuke ne bukole bua kunana lungenyi, kulonga malu mapiamapia ne kumanya mua kutumikila bitudi tulonga. Bua tshinyi mmutufuke mushindu au? Bualu mmusue bua ‘tupete dimanya dia Nzambi’ ne tumuenzele mudimu ne tshieledi tshietu tshia meji.​—Nsu. 2:1-5; Lomo 12:1.

2. a) Mmikalu kayi itudi nayi? (Yobo 37:23, 24) (Tangila kabidi tshimfuanyi.) b) Bua tshinyi mbimpe tumanye mikalu yetu?

² Nansha mutudi ne mushindu wa kulonga malu a bungi, kudi makuabu a bungi atudi katuyi mua kumanya to. (Bala Yobo 37:23, 24.) Tuangate tshilejilu tshia Yobo. Yehowa wakamuela nkonko ya bungi ivua mimuambuluishe bua kumona ne: kuvua malu a bungi avuaye kayi mumanye to. Biakamuambuluisha bua kupeta didipuekesha ne kushintulula ngelelu wende wa meji. (Yobo 42:3-6) Mbimpe tumanye petu ne: katuena mua kumanya malu onso to. Nunku nebituambuluishe bua kuikala ne didipuekesha ne kuikala batuishibue ne: Yehowa neikale anu utuleja tshia kuenza bua kuangata mapangadika mimpe.​—Nsu. 2:6.

3. Mmalu kayi atuakuila mu tshiena-bualu etshi?

³ Mu tshiena-bualu etshi, netuakule bua malu atudi katuyi bamanye ne ntatu itudi mua kupeta bua dipanga kuamanya. Netumone kabidi ne: mbimpe bua mutudi katuyi bamanye amue malu. Nebitujadikile ne: Yehowa, “Yeye udi mupuangane mu dimanya,” udi utuambila malu atudi akengela ne: tumanye.​—Yobo 37:16.

KATUENA BAMANYE DIALUA NSHIKIDILU TO

4. Bilondeshile Matayi 24:36, mbualu kayi butudi katuyi bamanye?

⁴ Bala Matayi 24:36. Katuena bamanye dituku dialua nshikidilu wa ndongoluelu wa malu eu to. Nansha pavua Yezu pa buloba kavua mumanye ‘dituku ne dîba’a divua nshikidilu ne bua kulua to. Wakalua kuambila bapostolo bende ne: Yehowa ke udi ne bukenji bua kujadika tshikondo tshidi malu kampanda ne bua kuenzeka. (Bien. 1:6, 7) Yehowa ukadi mujadike dituku dialua nshikidilu wa ndongoluelu wa malu eu, kadi katuena bamanye dituku dialuaye menemene to.

5. Bu mutudi katuyi bamanye dituku dialua nshikidilu, ntshinyi tshidi mua kutufikila?

⁵ Katuena bamanye tshikondo tshidi tshishale bua nshikidilu kulua to. Nunku tudi bafuane kupangila lutulu anyi kutekeshibua mu mikolo nangananga bituikale bindile dituku dia Yehowa adi kukadi matuku a bungi. Bena mu mêku etu anyi bantu bakuabu bobu batuseka bua mudi nshikidilu kayi mulue, bidi mua kututekesha kabidi mu mikolo. (2 Pet. 3:3, 4) Pamuapa tudi mua kuela meji ne: tuetu bamanye dituku menemene dialua nshikidilu, bidi mua kutuambuluisha bua kuikala ne lutulu lua bungi ne kunanukila padibu batuseka.

6. Bua tshinyi mbimpe bua mutudi katuyi bamanye dituku dialua nshikidilu?

⁶ Bu mudi Yehowa kayi mutuambile dituku menemene dialua nshikidilu, bidi bitupesha mpunga wa kuleja ne: tudi tumuenzela mudimu bualu tudi bamunange ne tudi bamueyemene. Nansha nshikidilu yeye mulue, tuetu tudi basue kutungunuka ne kuenzela Yehowa mudimu bua kashidi. Pamutu pa kutamba kutuma meji ku dîba dialua “dituku dia Yehowa,” mbimpe tuatume ku malu mimpe enzeka palua dituku adi. Nebituambuluishe bua kusemena pabuipi menemene ne Yehowa, kumueyemena ne kuenza muetu muonso bua kumusankisha.​—2 Pet. 3:11, 12.

7. Mmalu kayi atudi bamanye?

⁷ Mbimpe tutume meji etu ku tshitudi bamanye, tshia ne: matuku a ku nshikidilu akatuadija mu 1914. Mu Bible mudi mêyi a buprofete avua makule bua tshidimu atshi ne maleje malu a bungi avua ne bua kuenzeka panyima pa tshidimu atshi. Bu mudi mêyi au makumbane, bidi bitujadikila ne: “Dituku dinene dia Yehowa didi pabuipi.” (Sef. 1:14) Tudi bamanye kabidi mudimu udi Yehowa musue bua tuenze, wa kumanyisha bantu ba bungi menemene ‘lumu luimpe lua Bukalenge.’ (Mat. 24:14) Tudi tumanyisha bantu lumu elu mu matunga matue ku 240 ne mu miakulu mipite pa 1 000. Bua kuyisha ne tshisumi, kabiena bikengela anu tumanye ‘dituku ne dîba’ to.

KATUENA BAMANYE MUENZA YEHOWA MALU TO

8. “Mudimu wa Nzambi mulelela” mmudimu kayi? (Muambi 11:5)

⁸ Katutu anu bamanye “mudimu wa Nzambi mulelela” to. (Bala Muambi 11:5.) Padibu bakula bua “mudimu wa Nzambi mulelela,” badi bakula bua malu adi Yehowa wenzeja anyi adiye ulekela enzeka bua kukumbaja disua diende. Katuena mua kumanya menemene tshidi tshisaka Yehowa bua kulekela bualu kampanda buenzeka anyi tshienzaye menemene bua kutuambuluisha to. (Mis. 37:5) Bible udi ufuanyikija dipanga “kumanya mudimu wa Nzambi mulelela” ne dipanga kumanya mutu muana ukola munda mua mamuende. Nansha bena malu a sianse ki mbamanye menemene bualu ebu to. Bia muomumue, katuena bamanye menemene muenza Yehowa malu to.

9. Dipanga kumanya muenza Yehowa malu didi mua kutufikisha ku dienza tshinyi?

⁹ Dipanga kumanya muenza Yehowa malu didi mua kutufikisha ku dibanga kuelakana bua kuangata amue mapangadika. Tudi mua kuelakana bua kuenza amue malu bua kuvudija mudimu wetu, bu mudi kukepesha bintu bitudi nabi anyi kuya muaba udibu dijinga ne bamanyishi ba bungi. Bualu bukuabu, tuetu katuyi bakumbaje tshipatshila tshia mu nyuma tshituvua badifundile, katuyi bapatule bipeta bimpe mudimu wetu wa buambi, anyi tuetu bapete ntatu mu midimu kampanda itudi tuenza mu bulongolodi buetu, tudi bafuane kumona ne: Yehowa kena utuanyisha.

10. Dipanga kumanya muenza Yehowa malu didi dituambuluisha bua kuikala ne ngikadilu kayi ya mushinga?

¹⁰ Dipanga kumanya muenza Yehowa malu didi dituambuluisha bua kuikala ne didipuekesha. Netufike ku dimona ne: Yehowa utu anu mumanye tshidi tshitambe buimpe buetu tuetu. (Yesh. 55:8, 9) Didi dituambuluisha kabidi bua kumueyemena ne muoyo mujima, batuishibue ne: neenze malu mu mushindu mutambe buimpe. Tuetu bapatule bipeta bimpe mu mudimu wa buambi anyi mu mudimu kampanda utudi tuenza mu bulongolodi buetu, Yehowa ke utudi ne bua kutumbisha. (Mis. 127:1; 1 Kol. 3:7) Malu owu kaayi menzeke mu mushindu utuvua batekemene, mbimpe tuvuluke ne: Yehowa mmumanye malu onso. (Yesh. 26:12) Tuenze tshietu tshitudi mua kuenza, batuishibue ne: neatuambuluishe. Tudi bashindike ne: neatupeshe buludiki budi bukengela, nansha biobi ne: kakutupeshabu mu tshishima bu muvuaye wenza kale.​—Bien. 16:6-10.

11. Mmalu kayi a mushinga atudi bamanye?

¹¹ Tudi bamanye ne: Yehowa utu anu ne dinanga ne buakane ne meji. Tudi bamanye kabidi ne: mudimu utudi tumuenzela ne utudi tuenzela bena Kristo netu utu uwangata ne mushinga wa bungi, ne utu anu ufuta badi bamulamate.​—Eb. 11:6.

KATUENA BAMANYE TSHIENZEKA MALABA TO

12. Bilondeshile Yakobo 4:13, 14, mmalu kayi atudi katuyi bamanye?

¹² Bala Yakobo 4:13, 14. Katuena bamanye tshiatuenzekela malaba to. Tudi tutuilangana ne ‘bikondo ne malu adi kaayi matekemena’ mu ndongoluelu wa malu eu. (Muam. 9:11) Ke bualu kayi katuena bamanye bitudi balongolole ni biakumbana anyi ni tuikala ne muoyo bua kubienza to.

13. Dipanga kumanya malu enzeka kumpala eku didi mua kutufikisha ku diumvua bishi?

¹³ Bu mutudi katuyi bamanye malu enzeka matuku atshilualua, bidi mua kutukolela bua kunanukila. Bua tshinyi? Bualu tudi mua kusamisha mutu bua tshienzeka, bituadija kutujimijila ne disanka. Malu mabi adi mua kutufikila mu tshimpitshimpi adi mua kutukebela tunyinganyinga tua bungi. Bualu bukuabu, malu atuvua batekemene owu kaayi menzeke, tudi mua kuteketa mu mikolo anyi kudiumvua bedibue mâyi ku makasa.​—Nsu. 13:12.

14. Bua kupeta disanka dilelela, tudi ne bua kuenza tshinyi? (Tangila kabidi bimfuanyi.)

¹⁴ Patudi tutantamena ntatu, bidi bileja ne: nansha malu kayi matufikile, tudi tuenzela Tatu wetu wa mu diulu mudimu bualu tudi bamunange. Miyuki ya malu adi mu Bible idi ileja ne: katuena ne bua kutekemena ne: Yehowa neatukube ku lutatu luonso to. Idi ileja kabidi ne: katu udianjila kulongolola malu atuenzekela to. Mmumanye ne: tudi anu mua kuikala ne disanka nansha mutudi katuyi bamanye tshiatuenzekela kumpala eku. Kadi bua kudipeta, mbimpe tumulombe buludiki ne tumutumikile. (Yel. 10:23) Patudi tumulomba buludiki kumpala kua kuangata mapangadika, mu bulelela tudi tuamba ne: “Biasua Yehowa, netuikale ne muoyo, ne netuenze bualu kampanda anyi kansanga.”​—Yak. 4:15.

15. Ntshinyi tshitudi bamanye bua matuku atshilualua?

¹⁵ Katuena bamanye tshidi mua kuenzeka dituku dionso to, kadi tudi bamanye ne: Yehowa mmutulaye muoyo wa tshiendelele, mu diulu anyi pa buloba. Tudi bamanye kabidi ne: kena mua kushima ne kakuena tshintu tshidi mua kumupangisha bua kukumbaja milayi yende yonso to. (Tito 1:2) Anu yeye ke udi mua ‘kudianjila kumanyisha ndekelu wa bualu, ne kumanyisha kumpala menemene malu adi kaayi manji kuenzeka.’ Malu onso avuaye mulaye kale akakumbana. Nansha adiye mutulaye petu neakumbane. (Yesh. 46:10) Tudi batuishibue ne: kakuena tshidi mua kumupangisha bua kutunanga to. (Lomo 8:35-39) Neatupeshe meji ne bukole bua tunanukile. Tuikalayi batuishibue ne: Yehowa neatuambuluishe ne neatubeneshe.​—Yel. 17:7, 8.

KATUENA MUA KUFIKA KUDIUMVUA MENEMENE MUDI YEHOWA MUTUMANYE BIMPE TO

16. Ntshinyi tshidi Yehowa mumanye buetu tuetu? Tudi tumvua munyi bua bualu abu? (Misambu 139:1-6)

¹⁶ Bala Misambu 139:1-6. Mufuki wetu mmumanye mudiye mutufuke ne mudi mubidi wetu, mututu tudiumvua ne mututu tuela meji. Utu utuma ntema yende kutudi misangu yonso. Mmumanye bitudi tuamba ne bidi mu muoyo wetu. Mmumanye kabidi malu atudi tuenza ne tshitudi tuenzela. Anu muvua mukalenge Davidi muambe, Yehowa utu anu mudiakaje bua kutuambuluisha. Bidi bitukemesha bikole bua mudi Mukalenge wa diulu ne buloba, Mufuki wa bukole buonso utuma ntema yende kutudi mushindu eu! Davidi wakamba ne: “Dimanya dia nunku didi dinkemesha bikole. Ndipite bungi bua meme kumvua.”​—Mis. 139:6, dim.

17. Bua tshinyi bidi mua kutukolela bua kuitaba ne: Yehowa mmutumanye bimpe menemene?

¹⁷ Malu adi matufikile mu mêku etu, bilele bia kuetu anyi malu a mu tshitendelelu tshietu tshia kale atuvua bitabuje bidi pamuapa mua kuenza bua bitukolele bua kumona Yehowa bu Tatu muimpe udi ututabalela. Pamuapa tudi mua kuela meji ne: bua malu mabi atuvua benze kale, Yehowa kena mua kutunanga to, udi netu kule. Kudi misangu ivua Davidi muele pende meji nanku. (Mis. 38:18, 21) Muntu udi udienzeja bua kushintuluka ne kutuadija kutumikila mikenji miakane ya Nzambi udi mua kudiebeja ne: ‘Bikala Nzambi mummanye, bua tshinyi mmusue bua ndekele bualu bundi meme mmona ne: mbuimpe?’

18. Kuitaba ne: Yehowa mmutumanye kupita mutudi badimanye kudi kutuambuluisha mushindu kayi? (Tangila kabidi bimfuanyi.)

¹⁸ Mbimpe tuitabe ne: Yehowa mmutumanye bimpe kupita mutudi badimanye ne udi mua kumona malu mimpe atudi nawu atudi katuyi mua kumona. Nansha mudiye umona bilema bietu, mmumanye mutudi basue kuikala bantu badi benza malu mimpe, ne mmutunange. (Lomo 7:15) Patudi tujingulula ne: Yehowa utu anu umona mutudi basue kuikala bantu badi benza malu mimpe, bidi bitupesha bukole bua kumuenzela mudimu ne lulamatu ne disanka.

19. Ntshinyi tshitudi bashindike bua Yehowa?

¹⁹ Tudi bashindike ne: Yehowa udi dinanga. (1 Yone 4:8) Tudi bamanye ne: mikenji yende miakane idi ileja mudiye mutunange ne mudiye musue bua tuikale ne nsombelu mutambe buimpe. Tudi bamanye kabidi ne: mmusue bua tupete muoyo wa tshiendelele. Ke bualu kayi wakafila dipa dia tshia kupikulangana natshi. Dipa edi didi ditujadikila ne: tudi mua kufika ku disankisha Yehowa nansha mutudi bena mapanga. (Lomo 7:24, 25) Bible udi utuambila ne: “Nzambi mmunene kupita mioyo yetu ne mmumanye malu onso.” (1 Yone 3:19, 20) Yehowa mmumanye malu etu onso, ne mmutuishibue ne: tudi anu mua kuenza disua diende.

20. Ntshinyi tshiatuambuluisha bua kuepuka tunyinganyinga tua patupu?

²⁰ Yehowa utu anu utuambila malu atudi ne bua kumanya. Nunku katusamishi mutu bua malu atudi katuyi bamanye to. Mbimpe tutume meji etu ku malu adi ne mushinga wa bungi. Dîba adi nebileje ne: tudi beyemene Yehowa bikole, “yeye udi ne dimanya dipuangane.” (Yobo 36:4) Nansha mutudi katuyi bamanye malu onso lelu, tudi bamanye ne: Yehowa neatungunuke ne kutulongesha malu mapiamapia bua kashidi. Tudi kabidi ne disanka bua mutuatungunuka ne kulonga malu mapiamapia adi atangila Nzambi wetu muimpe.​—Muam. 3:11.