Bantu badi “bakaje muoyo wabu bimpe” nebitabe bua kulonga bulelela

1. Ntshinyi tshidi bantu mua kuenza patudi tubayisha? (Bienzedi 13:47, 48; 16:14, 15)

BANTU ba bungi ba mu bidimu lukama bia kumpala bakitaba bulelela diakamue pakabambilabu mukenji wa Bukalenge. (Bala Bienzedi 13:47, 48; 16:14, 15.) Nansha lelu eu kudi bantu badi basanka bikole patudi tubayisha lumu luimpe, baluitaba diakamue. Kudi bakuabu batu banji kulubenga kadi balua kuluitaba pashishe. Tuetu bapete bantu badi “bakaje muoyo wabu bimpe” patudi mu buambi, ntshinyi tshitudi mua kuenza?

2. Mmu ngumvuilu kayi mudi mudimu wetu wa kuvuija bantu bayidi mufuanangane ne wa tshidime?

² Tudi mua kufuanyikija mudimu wa kuyisha ne wa tshidime. Tshidime yeye mumone tshimuma tshipie ku mutshi, udi utshipola, kadi utungunuka anu ne kumiamina bikunyibua bikuabu mâyi ne kutabalela bikuabu bidi ne bimuma kabiyi bianji kupia. Bia muomumue, patudi tupeta muntu udi uteleja mukenji wa Bukalenge, kuoku mushindu tudi tumuambuluisha bua alue muyidi wa Kristo katuyi tujanguluka to. Kadi bua bantu badi kabayi banji kuikala pabuipi bua kulonga bulelela, tudi tutungunuka ne kubambuluisha bua bamone ne: mbimpe balonge malu Nzambi adi mu Bible. (Yone 4:35, 36) Dijingulula dia malu nedituambuluishe bua kumanya mua kuyukila ne bantu bimpe menemene patudi tubayisha. Tumonayi mpindieu tshitudi mua kuenza patudi tutuilangana bua musangu wa kumpala ne muntu udi musue kulonga malu a Nzambi. Netumone kabidi mutudi mua kuambuluisha bantu ba mushindu eu bua kulua batendeledi ba Nzambi.

PADI BANTU BASUE KUTELEJA

3. Ntshinyi tshitudi ne bua kuenza patudi tupeta bantu badi ne dijinga dia kulonga malu a Nzambi? (1 Kolinto 9:26)

³ Patudi tupeta bantu badi ne dijinga dia kulonga malu a Nzambi, mbimpe tubambuluishe diakamue bua batuadije luendu mu njila udi ufikisha ku muoyo. Anu musangu wa kumpala utudi tuyukila nabu au, mbimpe tubalombe bua kulonga nabu Bible ne tubabikile mu bisangilu.​—Bala 1 Kolinto 9:26.

4. Londa bualu bua nsongakaji kampanda uvua muitabe bua kulonga Bible diakamue.

⁴ Lomba muntu bua ulonge nende Bible. Bamue bantu batutu tuyisha batu bitaba diakamue bua kulonga Bible. Tshilejilu, mu Dinayi dia lumingu kampanda, nsongakaji mukuabu wa mu Canada wakasemena ku kaditempu ka mikanda yetu, kuangataye broshire wa Shala ne muoyo kashidi!. Muanetu wa bakaji uvua uyisha ne kaditempu aku wakamumvuija ne: tutu tulongesha bantu Bible ku diambuluisha dia Broshire eu kabayi bafuta kantu. Nsongakaji au wakasanka bikole, kupeshaye muanetu wa bakaji nimero yende ya telefone. Mêba a bungi pashishe, wakafundila muanetu wa bakaji mesaje, umulomba bua balonge. Pakamuambila muanetu wa bakaji bua balonge nansha ku ndekelu kua lumingu, yeye wakamulomba, wamba ne: “Luaku nansha malaba wa Ditanu tulonge, tshiena ne kundi nya to.” Bakalonga anu mu Ditanu amu. Nsongakaji au wakabuela mu bisangilu biende bia kumpala anu ku ndekelu kua lumingu alu, diakamue yeye kutuadija kudia bulunda ne Yehowa.

5. Mmunyi mutudi mua kuleja ne: tudi ne dijingulula dia malu patudi tulomba muntu bua kulonga nende Bible? (Tangila kabidi bimfuanyi.)

⁵ Tudi bamanye bimpe ne: bantu bonso kabakuitaba bua kulonga Bible diakamue anu bu nsongakaji au to. Bidi mua kulomba dîba dia bungi bua bamue kuitababu bua kulonga. Bua bualu abu, tudi mua kutuadija kuyukila nabu bua tshiena-bualu kampanda tshidi tshibasankisha. Tuetu bikale anu tubamona mu mushindu muimpe ne tutungunuka ne kubatabalela, pamuapa panyima pa matuku makese, tudi mua kutuadija kulonga nabu Bible. Ntshinyi tshitudi mua kuamba patudi tulomba muntu bua kulonga nende Bible? Tumonayi muvua bana betu batu bapiluke mu bualu ebu bandamune lukonko elu.

6. Ntshinyi tshitudi mua kuambila muntu bua amone ne: kulonga Bible nekumuambuluishe?

⁶ Bamanyishi ba lumu luimpe ne bampanda-njila bavuabu bele lukonko alu bavua bumvuije ne: imue miaba ki mbimpe kutelela muntu biambilu bu mudi “dilonga,” “dilonga dia Bible,” anyi “kulongesha muntu” paudi usua kuakula bua mushindu ututu tulonga Bible ne bantu to. Bavua baleje ne: mbimpe kutelela bantu biambilu bu mudi “kuyukila” ne “kumanya malu adi mu Bible.” Udi mua kuleja muntu muudi musue kutungunuka ne muyuki wenu nende, umuambila ne: “Wewe mumvue mudi Bible wandamuna nkonko minene idi itangila nsombelu wetu, nebikukemeshe bikole,” anyi udi mua kumuambila ne: “Bible ki mmukanda wa malu a Nzambi patupu to, udi ne malu adi atuambuluisha bikole.” Udi mua kuamba kabidi ne: “Kumanya bualu kampanda bua mushinga budi mu Bible kakutu kulomba mêba a bungi to, kudi mua kuangata minite mikese tshianana.” Kuteledi muntu biambilu bu mudi “dituku dia kutuilangana” anyi “lumingu luonso” to, bualu mmufuane kudimona bu muela disoka mu nshingu bua kushala anu mukuindile.

7. Bamue bantu bakajingulula bulelela bua mu Bible dîba kayi? (1 Kolinto 14:23-25)

⁷ Babikila mu bisangilu. Bidi bimueneka ne: bamue bantu ba mu tshikondo tshia Paulo bakajingulula bulelela bua mu Bible pakabuelabu bua musangu wa kumpala mu tshisangilu tshia bena Kristo. (Bala 1 Kolinto 14:23-25.) Bualu bua muomumue budi buenzeka kabidi lelu. Bantu ba bungi batu baya kumpala ne lukasa patubu batuadija kubuela mu bisangilu. Ndîba kayi diudi ne bua kubabikilamu? Mu mukanda wa Shala ne muoyo kashidi! mu dilongesha dia 10 mudi mêyi a kuambila muntu patudi tumubikila mu bisangilu, kadi bua kumubikilamu, kuindidi anu panuafika mu dilongesha adi to. Mubikilamu anu musangu wa kumpala unudi batuilangane nende au. Udi mua kumubikila mu tshisanigilu tshia ku ndekelu kua lumingu, pamuapa kumutelela ne tshiena-bualu tshia muyuki wa patoke anyi bualu bua mu dilonga dia Tshibumba tshia Nsentedi dia lumingu alu.

8. Ntshinyi tshitudi mua kuambila muntu patudi tumubikila mu bisangilu? (Yeshaya 54:13)

⁸ Paudi ubikila muntu mu bisangilu, mumvuija ne: mushindu ututu tuenza bisangilu mmushilangane ne mutuye pamuapa umona bitendelelu bikuabu bienza masangisha abi. Pavua mulongi wa Bible kampanda mubuele mu dilonga dia Tshibumba tshia Nsentedi, wakebeja mulongeshi wende wa Bible ne: “Mulombodi mmumanye dîna dia muntu yonso anyi?” Mulongeshi wende wakamuandamuna ne: tuetu bonso tutu tudienzeja bua kumanya mêna a bena mu tshisumbu tshietu anu mutudi bamanye mêna a bena mu dîku dietu. Mulongi wa Bible au wakamona ne: kabitu nanku mu tshiabu tshitendelelu to. Bantu bakuabu ba bungi ki mbamanye tshipatshila tshia bisangilu bietu to. (Bala Yeshaya 54:13.) Tutu tuya mu bisangilu bua kutendelela Yehowa, bua atulongeshe, ne bua tuetu kukankamijangana. (Eb. 2:12; 10:24, 25) Ke bualu kayi bisangilu bietu bitu bilongolola bimpe bua bituambuluishe, ne katutu tuenzamu mikiya to. (1 Kol. 14:40) Bualu bukuabu, Nzubu yetu ya Bukalenge ki mmiasa mu mushindu udi ukemesha bantu to, bualu tudi tulongamu malu a Nzambi. Katutu tuambamu mudi kasumbu kampanda ka tshididi kapite kakuabu to, bualu katutu tubuelakana mu malu a tshididi ne katutu tukokangana ne bantu bua malu au to. Kumpala kua mulongi wa Bible kulua mu bisangilu, mbimpe umuleje filme wa Tshitu tshienzeka ku Nzubu wa Bukalenge ntshinyi? bua ikale mumanye mudibi bienzeka.

9-10. Patudi tubikila muntu mu bisangilu, ntshinyi tshitudi mua kumuambila bua kapetshi buôwa bua kulua? (Tangila kabidi tshimfuanyi.)

⁹ Bamue bantu batu belakana bua kulua mu bisangilu bualu batu bela meji ne: netubalombe bua kushala Bantemu ba Yehowa. Paudi ubikila muntu mu bisangilu, mujadikila ne: tutu basue kuakidila benyi ne katutu tubenzeja bua balue Bantemu ba Yehowa to. Tutu tuakidilamu bena mu mêku bonso. Bantu bonso, bakulumpe ne bana, batu balongeshibuamu pamue. Baledi batu basomba pamue ne bana babu, bibambuluisha bua kubatabalela ne kumanya malu adibu benda balonga. (Dut. 31:12) Katutu tusangishamu makuta anyi tupitshisha kabondo bua bantu kuela makuta to. Kadi tutu tutumikila dîyi dia Yezu, dia ne: “Nuvua bapete tshianana, nufile tshianana.” (Mat. 10:8) Udi mua kumuambila kabidi ne: ki mmuenzejibue bua kuvuala bilamba bia mushinga mukole bua kubuelamu to. Nzambi utu utangila mu muoyo wetu, katu wimanyina pa tshimuenekelu tshietu to.​—1 Sam. 16:7.

¹⁰ Muntu au yeye mulue mu bisangilu, enza bua adiumvuamu bimpe. Mumanyisha kudi bakulu ne kudi bena Kristo bakuabu. Yeye mudiumvuamu bimpe, pamuapa nebimusankishe bua kuluamu kabidi. Yeye kayi ne Bible, badilayi mvese mu Bible webe wewe au ne umuambuluishe bua kumvua muyuki udibu benda benza ne dilonga dia Tshibumba tshia Nsentedi.

PAUDI UTUADIJA KULONGA BIBLE NE MUNTU

11. Mmunyi muudi mua kuleja ne: udi unemeka dîba dia muntu ne programe wa malu ende?

¹¹ Patudi tulonga Bible ne muntu mbimpe tunemeke dîba diende ne programe wa malu ende. Tshilejilu, nemeka dîba diuvua mumuambile bua kulua nansha biobi ne: bantu ba muaba unudi kabatu banemeka dîba. Bualu bukuabu, musangu wa kumpala uudi utuadija kulonga ne muntu, kuangatshi dîba dia bungi to. Bamue bamanyishi ba lumu luimpe bapiluke badi baleja ne: kuenza nanku nkuimpe nansha mulongi yeye musue kumanya bia bungi. Kuikadi wakula bia bungi to. Lekela mulongi atambe yeye kuakula.​—Nsu. 10:19.

12. Panutshidi ku ntuadijilu kua dilonga, ntshipatshila kayi tshiudi ne bua kuikala natshi?

¹² Anu panutshidi ku ntuadijilu kua dilonga, mbimpe wikale ne tshipatshila tshia kuambuluisha mulongi wa Bible bua amanye Yehowa ne Yezu ne abanange. Bua kutshikumbaja, ikala umuleja tshidi Bible wamba pamutu pa kumuambila biudi wewe mumanye. (Bien. 10:25, 26) Mupostolo Paulo uvua ulongesha bantu malu a Yezu Kristo. Tudi bafike ku dimanya Yehowa ne ku dimunanga ku diambuluisha dia Yezu. (1 Kol. 2:1, 2) Paulo uvua kabidi muleje ne: mbimpe kuambuluisha bena Kristo bapiabapia bua bapete ngikadilu mimpe itudi mua kufuanyikija ne or ne arjan ne mabue a mushinga mukole. (1 Kol. 3:11-15) Mu ngikadilu ayi mudi ditabuja, meji, dijingulula dia malu, ne ditshina dia Yehowa. (Mis. 19:9, 10; Nsu. 3:13-15; 1 Pet. 1:7) Idikija mushindu uvua Paulo ulongesha, mmumue ne: ambuluisha balongi bebe ba Bible bua bapete ditabuja dikole ne badie malanda makole ne Yehowa, Tatu wabu wa mu diulu udi mubanange.​—2 Kol. 1:24.

13. Mmunyi mutudi mua kuleja ne: tudi ne lutulu ne nkatshinkatshi patudi tuambuluisha bantu badi ne dijinga dia kulonga malu a Nzambi? (2 Kolinto 10:4, 5) (Tangila kabidi tshimfuanyi.)

¹³ Yezu uvua ne lutulu ne nkatshinkatshi pavuaye ulongesha, muidikija. Kuikadi wela mulongi nkonko idi mua kumupuekesha milongo to. Wewe mumone ne: mbimukolele bua kumvua bualu kampanda, anji pita, ulue kubupinganyina pashishe. Pamutu pa kumuenzeja anu bua kuitaba dilongesha kampanda, mbimpe kumupesha tshipolu bua elangane meji a dilongesha adi ne bua ashintulule ngelelu wende wa meji. (Yone 16:12; Kolos. 2:6, 7) Bible utu ufuanyikija malongesha a dishima ne bintu bidi biele miji bikole menemene bitudi ne bua kujomona. (Bala 2 Kolinto 10:4, 5.) Biobi bikolele mulongi webe bua kulekela dilongesha kampanda dikadiye mukuate kukadi bidimu bia bungi, anji muambuluisha bua eyemene Yehowa; dîba adi nebimuambuluishe bua kulekela dilongesha adi.​—Mis. 91:9.

PADI BANTU BAPIABAPIA BALUA MU BISANGILU

14. Padi bantu bapiabapia balua mu bisangilu, mmushindu kayi utudi mua kubenzela malu?

¹⁴ Yehowa mmusue bua tuenzele bantu bonso malu mimpe nansha bobu ba muaba kayi, ba bilele kayi, ne nansha bobu babanji anyi bapele. (Yak. 2:1-4, 9) Kadi mmunyi mutudi mua kuleja ne: tudi banange bantu badi balua mu bisangilu bua musangu wa kumpala?

15-16. Ntshinyi tshitudi mua kuenza bua bantu badi balue mu bisangilu bua musangu wa kumpala badiumvuamu bimpe?

¹⁵ Bamue batu balua mu bisangilu bietu bua kumona patupu mutubi bienzeka anyi pamuapa bualu mbabalombe bua kuluamu kudi muntu udi musombele muaba mukuabu. Bakidila ne musangelu, kadi kawupitshi bungi to. Mulomba bua nusombe nende kaba kamue. Mutekela Bible ne mikanda inudi nulonga bua nulondeshe nende bisangilu. Udi mene mua kumupesha wende Bible ne yende mikanda. Ela kabidi meji bua bualu bukuabu buudi mua kuenza bua adiumvuamu bimpe. Muntu mukuabu uvua mulue mu bisangilu bua musangu wa kumpala wakambila muanetu uvua mumuakidile ne: uvua mumvue bibi bua muvuaye mulue kayi muvuale bimpe. Kadi muanetu au wakenza bua adiumvue bimpe mu bisangilu ne wakamuleja ne: Bantemu ba Yehowa badi anu bu bantu bonso. Muntu au wakaya kumpala, kubatijibuaye; kadi utshidi anu muvuluke muvua muanetu au mumuakidile. Bualu bua kudimukila mbuobu ebu: Paudi uyukila ne bantu bapiabapia kumpala kua bisangilu kutuadija anyi padibi bijika, kubedi nkonko idi mua kubapuekesha milongo anyi ya malu adi abatangila anu bobu to.​—1 Pet. 4:15.

¹⁶ Bualu bukuabu butudi mua kuenza bua kudiumvuabu bimpe budi ne: tuikalayi ne kanemu patudi tuyukila nabu, patudi tuandamuna, ne padi bana betu benza midimu idi yakula bua bantu badi kabayi Bantemu anyi bua malongesha abu. Katuambi malu adi mua kubanyingalaja anyi adibu mua kuangata bu tshipendu to. (Tito 2:8; 3:2) Tshilejilu, katuakudi bibi bua malongesha abu to. (2 Kol. 6:3) Ke bualu kayi mbimpe bana betu badi benza miyuki ya patoke batambe kuikala ne budimu. Kuoku kuikale miaku idi bantu bapiabapia kabayi mua kumvua, mbimpe bayumvuije bua kuleja mudibu nabu mu meji.

17. Ntshipatshila kayi tshitudi natshi patudi tupeta bantu badi “bakaje muoyo wabu bimpe” mu buambi?

¹⁷ Mudimu wa divuija bantu bayidi mmulue mudimu udi ulomba kuwenza ne lukasa dituku dionso edi. Tudi tutungunuka ne kukeba bantu badi “bakaje muoyo wabu bimpe bua kupeta muoyo wa tshiendelele.” (Bien. 13:48) Nunku mbimpe tuikale tulomba bantu bua kulonga nabu Bible ne tuikale tubabikila mu bisangilu. Patudi tuenza nanku, tudi tubambuluisha bua kuasabu luendu mu ‘njila udi ufikisha ku muoyo.’​—Mat. 7:14.