1925​​—Kukadi bidimu lukama

BIVUA BIKENGELA BINDILE

Balongi ba Bible ba bungi bavua batekemene ne: buloba buvua ne bua kulua Mparadizu mu 1925. Bua tshinyi? Muanetu Albert Schroeder, wakamba ne: “Tuvua tuela meji ne: bela manyi bavua ne bua kuya mu diulu mu 1925, ne pashishe batendeledi ba Yehowa ba lulamatu bu mudi Abalahama, Davidi ne bakuabu bavua ne bua kubishibua ku lufu bua kukokesha buloba.” Muanetu Albert Schroeder wakalua kuenza mudimu mu Kasumbu kaludiki. Kadi pavua malu kaayi mende muvuabu batekemene, bamue bana betu bakabungama.​—Nsu. 13:12.

Nansha muvua bamue Balongi ba Bible babungame, ba bungi bakatungunuka ne kuyisha. Bakatuadija kumona ne: mudimu wa diyisha bantu malu a Yehowa ke mudimu uvua ne mushinga wa bungi uvuabu ne bua kuenza. Tshilejilu, tuakulayi bua mushindu uvuabu benze mudimu ne kadiomba bua kuyisha bantu ba bungi too ne bavua miaba ya kule.

BANTEMU BAKASA TUDIOMBA

Mu 1924, bantu ba bungi bavua balonda kadiomba ka WBBR. Kadi mu 1925, Balongi ba Bible bakasa kadiomba kakuabu kanene, bua musangu eu pabuipi ne tshimenga tshia Chicago, mu Illinois. Dîna dia kadiomba aku divua WORD. Ralph Leffler, umue wa ku bantu bavua bakuate mudimu wa kuasa kadiomba aku udi uvuluka wamba ne: “Dilolo pavua kuulu kutalale, bantu ba bungi too ne bavua miaba ya kule menemene bavua balonda kadiomba aku ku bisanji.” Tshilejilu, bena dîku kampanda bavua basombele mu ntanta wa kilometre mipite pa 5000, mu tshimenga tshia Pilot mu Alaska, kule menemene ne muaba uvua kadiomba aku, bavua balonde umue wa ku ndongamu ya ntuadijilu ituvua benzaku. Bobu bamane kulonda ndongamu au, bakafunda mukanda bua kuela bantu bavua benza mudimu ku kadiomba aku tuasakidila bua muvuabu babambuluishe bua kumanya malu a bungi a Nzambi ne malu a mu Bible.

Mu Tshibumba tshia Nsentedi tshia 1/12/1925 bavua baleje tshivua tshienze bua bantu ba bungi, too ne bavua miaba ya kule bikale ne mushindu wa kuteleja ndongamu ku kadiomba aku. Bavua bambamu ne: “Kadiomba ka WORD nkamue ka ku tudiomba tunene tua mu États-Unis. Bantu badi mua kukalonda ku est ne ku ouest kua États-Unis, nansha mu Cuba ne kule menemene ku nord kua Alaska. Bantu ba bungi bavua kabayi banji kupeta bulelela bua mu Bible, mbapete dijinga dia kumanya malu a bungi padibu bateleje kadiomba aka.”

Tshiotshi tshikondo atshi, Balongi ba Bible bavua benza kabidi muabu muonso bua kuyisha bantu lumu luimpe ku diambuluisha dia tudiomba mu Canada. Mu 1924, bakasa kadiomba ka CHUC mu tshimenga tshia Saskatoon, mu provense wa Saskatchewan. Kavua kamue ka ku tudiomba tua kumpala tua malu a Nzambi mu Canada amu. Mu 1925, bivua bikengela bakebe muaba munene uvuabu mua kuteka kadiomba aku. Nunku bulongolodi buakaya kukatekela mu nzubu kampanda munene uvuabu basumbe ne bakajilule anu bua kukatekelamu. Kumpala bantu bavua badisangishilamu bua kulonda manaya.

Ku diambuluisha dia kadiomba aku, bantu ba bungi bavua basombele mu tubimenga ne mu tumisoko tua mu provense wa Saskatchewan bakateleja lumu luimpe bua musangu wa kumpala. Tshilejilu, mamu mukuabu wa mu tshimenga tshia McKague, diende Graham, wakateleja malu ku kadiomba, pashishe kuluaye kubafundila bua bamutumine mukanda wa malu a mu Bible. Muanetu George Naish udi uvuluka wamba ne: “Tuakamona dilomba diende adi bu bualu butuvua ne bua kujikija ne lukasa, ke tuetu kumutumina volime yonso ya mukanda wa Études des Écritures.” Matuku makese pashishe, Graham wakatuadija kuambila too ne bantu ba miaba ya kule mukenji wa Bukalenge.

TUAKALONGA BUALU KAMPANDA BUA MUSHINGA

Mu Tshibumba tshia Nsentedi tshia 1/3/1925 muvua tshiena-bualu tshia mushinga mukole tshia ne: “Diledibua dia tshisamba.” Bua tshinyi tshivua ne mushinga? Kukavua matuku ndambu avua Balongi ba Bible balonge ne: Satana ke udi ulombola bademon, ulombola kabidi bamfumu ba bitendelelu bia dishima, bena tshididi ne malu a bungenda mushinga a panu. Kadi mu tshiena-bualu atshi, “mupika wa lulamatu udi mudimuke” wakambuluisha bana betu bua kumanya ne: batendeledi ba Yehowa mu diulu ne pa buloba badi bonso tshintu tshimue ne kabatu babuelakana mu malu a mu ndongoluelu wa Satana to. Batu benza mudimu mu buobumue bua kutua Yehowa mpanda ne kukandamena Satana ne bena diende. (Mat. 24:45) Mupika wakasakidila kabidi bualu bukuabu wamba ne: Bukalenge bua Nzambi buakaledibua mu 1914, ne anu mu tshidimu atshi, “mvita yakajuka mu diulu,” ke Satana ne bademon bende kuipatshibuabu mu diulu, kuedibuabu panshi pa buloba.​—Buak. 12:7-9.

Bamue balongi ba Bible kabakitaba ngumvuilu mupiamupia au to. Ke bualu kayi bakavua bambe mu tshiena-bualu atshi ne: “Kuoku kuikale babadi ba Tshibumba tshia Nsentedi badi babenga ngumvuilu mupiamupia eu, tudi tubalomba bua bikale ne lutulu, beyemene Yehowa ne batungunuke anu ne kumuenzela mudimu ne lulamatu.”

Tom Eyre, uvua kolportere (utudi tubikila lelu ne: mpanda-njila) mu Grande-Bretagne, wakaleja yeye muvua Balongi ba Bible ba bungi bumvue bua tshiena-bualu atshi, wamba ne: “Bana betu bakasanka bikole pavuabu babale ngumvuilu mupiamupia wa Buakabuluibua 12. Patuakamanya ne: Bukalenge bukavua bujadikibue mu diulu, tuvua tuzuka bua kuambila bakuabu bualu abu. Biakatusaka bua kuyisha kabidi bikole ne biakatuambuluisha bua kumona ne: Yehowa ukavua pa kuenza malu malenga a dikema.”

BALONGI BA BIBLE BAKAMANYA NE: BAVUA NE BUA KULUA BANTEMU BA YEHOWA

Lelu Bantemu ba Yehowa mbamanye bimpe mêyi adi mu Yeshaya 43:10 a ne: “‘Nudi bantemu banyi,’ ke mudi Yehowa wamba ‘Eyowa, muena mudimu wanyi undi musungule.’” Kadi mu bidimu bia kumpala kua 1925 kabavua batamba kuakuila mvese eu mu mikanda yetu to. Kadi malu akashintuluka. Mu tshidimu tshia 1925, kuvua biena-bualu bivua biakula bua Yeshaya 43:10, 12 mu bibejibeji 11 bia Tshibumba tshia Nsentedi.

Ku ndekelu kua ngondo wa 8/1925, Balongi ba Bible bakadisangisha mu tshimenga tshia Indianapolis, mu Indiana mu États-Unis bua kuenza mpungilu. Kuvua mêyi avua muanetu Joseph Rutherford mufunde bua kuakidila nawu bantu balua mu mpungilu, a ne: ‘Tudi balue mu mpungilu eu bua Mukalenge atupeshe bukole, bua tupingane ku mudimu wa diyisha bikale ne dijinga dikole dia kuikala bantemu bende.’ Mu matuku onso 8 a mpungilu au, bakakankamija bantu bavua babuelamu bua kulongesha bakuabu malu a Yehowa dîba dionso divua mpunga umueneka.

Mu disambombodia 29/8, muanetu Joseph Rutherford wakela muyuki uvua ne tshiena-bualu tshia ne: “Tuenzayi mudimu.” Mu muyuki wende au wakeleja muvua mudimu wa diyisha muikale ne mushinga wa bungi, wamba ne: “Yehowa wakambila batendeledi bende ne . . . : ‘Nuenu nudi bantemu banyi . . . ne meme ndi Nzambi.’ Pashishe wakabatumina dîyi kayi udia tshibanga wamba ne: ‘Imanyikayi tshimanyinu bua bukua bantu.’ Pa kumbusha bantu ba Nzambi, kakuena muntu mukuabu pa buloba apa udi mua kuambila bukua bantu malu a Yehowa to, bualu anu bobu ke badiye ulombola ne nyuma wende.”​—Yes 43:12; 62:10.

Muanetu Rutherford mumane kujikija muyuki wende, wakabala mukanda mukuabu uvua ne tshiena-bualu tshia ne: “Mukenji wa ditekemena.” Bantu bonso bavua mu mpungilu au bakitaba mukenji uvuamu wa ne: anu Bukalenge bua Nzambi ke buvua mua kutupetesha “mabenesha a bungi, bu mudi: ditalala, bubanji, makanda a mubidi, muoyo, budikadidi ne disanka dia tshiendelele.” Bakalua kukudimuna mukanda au mu miakulu ya bungi ne kuwupatulabu pa mabeji bua wikale trakte wa kuyisha nende. Bakabanya trakte ayi mitue ku miliyo 40.

Kuakapita bidimu bia bungi kumpala kua balongi ba Bible kuluabu kuangata dîna dia Bantemu ba Yehowa. Kadi bakatuadija kumvua bua tshinyi bivua ne mushinga bua bobu kuambila bantu malu a Yehowa.

DITUADIJA KUPINGANYINA BANTU

Bu muvua balongi ba Bible bavule bikole pa buloba bujima, bakabakankamija bua bikale bapinganyina bantu bavua baleja dijinga dia kumanya malu makuabu. Bobu bamane kujikija kampanye ka diambanyina bantu trakte uvua ne tshiena-bualu tshia ne: Mukenji wa ditekemena, bakamba mu broshire wa Bullletina ne: “Pinganyinayi bena ku mbanza inuvua babanye trakte wa Mukenji wa ditekemena.”

Mu ngondo wa 1/1925, bavua bakule mu broshire wa Bulletin bua tshivua Mulongi wa Bible mukuabu wa mu Plano, mu Texas muambe. Uvua muambe ne: “Bidi bitukemesha bikole bua kumona ne: tudi tupatula bipeta bimpe patudi tuyisha mu teritware itukavua bayishe kupita bitudi tupatula patudi tuyisha mu teritware mipiamipia. Kudi katshimenga kakuabu kakese mu teritware wetu mudibu bayishe misangu itanu mu bidimu 10 bishale ebi. . . . Matuku mashale aa muanetu wa bakaji Hendrix ne mamuanyi bavua baye kuyishamu kabidi, ne mbabanyamu mikanda ya bungi kupita ne kumpala.”

Kolportere kampanda wa mu ditunga dia Panama wakafunda wamba ne: “Bantu ba bungi bavua babenga kunteleja pamvua nya kubatangila bua musangu wa kumpala, bavua bitaba bua kunteleja pamvua mbapinganyina musangu muibidi anyi muisatu. Tshidimu tshishale etshi ndi muenze mêba a bungi mpinganyina bantu bankavua muyishe, ne kudi malu mimpe andi mupete kudi ba bungi ba kudibu.”

BATEKEMENE ANU MATUKU ATSHILUALUA

Ku ndekelu kua tshidimu tshia 1925, muanetu Rutherford wakafundila bampanda-njila mukanda, muvuaye muleje bipeta bia mudimu wa diyisha uvua muenzeke tshidimu atshi ne tshivua bampanda-njila ne bua kulua kuenza. Uvua muambe ne: “Tshidimu tshishale, nuvua ne diakalenga dia kusamba bantu ba bungi bavua babungame. Mudimu eu uvua munupeteshe disanka. . . . Tshidimu tshidi tshilua etshi, nenuikale ne mpunga ya bungi ya kuikala bantemu ba Nzambi ne ba bukalenge buende ne ya kulongesha bantu mikenji yende. . . . Tutungunukayi tuetu bonso ne kubandisha mêyi etu bua kutumbisha Nzambi wetu ne Mukalenge wetu.”

Lua ku ndekelu kua tshidimu tshia 1925, bakalongolola bua kudiundisha muaba wa Betele ku Brooklyn. Mu tshidimu tshia 1926 bavua ne bua kutuadija mudimu munene wa dibaka uvua bulongolodi buetu kabuyi buanji kuenza kumpala to.