Bana betu bapiabapia babidi ba mu Kasumbu kaludiki

MU DIA 5/10/2025, bakafila dimanyisha dia pa buadi mu tshisangilu tshia ku tshidimu, dia ne: muanetu Jody Jedele ne Jacob Rumph bavua balue bena mu Kasumbu kaludiki ka Bantemu ba Yehowa. Bana betu babidi aba badi benzela Yehowa mudimu ne lulamatu kukadi bidimu bia bungi.

Muanetu Jedele mmuledibue mu Missouri mu États-Unis ne mmukolele mu dîku dia Bantemu ba Yehowa. Dîku diabu divua disombele muaba uvua Bantemu ba Yehowa bakese. Nunku wakatuilangana ne bana betu ba bungi ba miaba mishilashilangane bavua baya kubambuluisha bua kuyisha lumu luimpe. Dinanga dia bana betu abu ne buobumue buabu biakalenga muanetu Jedele bikole. Wakabatijibua patshivuaye tshitende, mudia 15/10/1983. Uvua munange mudimu wa diyisha bikole; nunku pakajikijaye kalasa, wakatuadija mudimu wa bumpanda-njila bua pa tshibidilu mu ngondo wa 9/1989.

Patshivua muanetu Jedele muana, baledi bende bavua ne tshibidilu tshia kuya kuendakana nabu ku Betele, yeye ne muakunyende wa bakaji. Diya kuendakana adi diakabasaka yeye ne muakunyende bua kuenza mudimu ku Betele. Ke tshiakaluabu kuenza bobu bonso babidi. Bakabikila muanetu Jedele ku Betele wa Wallkill mu ngondo wa 9/1990. Bakanji kumutuma mu Tshibambalu tshia malu a disukula nzubu ne pashishe kuluabu kumutuma mu Tshibambalu tshia malu a luondapu.

Tshikondo atshi, bisumbu bia tshiena Espagne bivua pabuipi ne Betele apu bivua biende bidiunda, nunku bivua dijinga ne bana betu ba balume. Ke bualu kayi muanetu Jedele wakabuela mu tshimue tshia ku bisumbu abi, kutuadijaye kulonga muakulu au. Matuku makese pashishe, wakatuilangana ne muanetu wa bakaji mukuabu diende Damaris, uvua bampanda-njila anu mu tshijengu tshimue tshimue atshi. Bakalua kuselangana, pashishe kutuadijabu kuenza mudimu pamue ku Betele.

Mu 2005, bakumbuka ku Betele bua kuya kulama baledi babu bavua ne lulamatu. Tshikondo tshivuabu balama baledi babu atshi, bavua bampanda-njila ba pa tshibidilu. Muanetu Jedele, uvua ulongesha mu Tulasa tua bampanda-njila, wambuluisha mu Komite wa diumvuangana ne mpitadi ne mu Komite wa malu a luibaku lua mu ditunga.

Mu 2013, bakabikila kabidi muanetu Jedele ne mukajende ku Betele bua kuya kuenza mudimu wa luibaku lua nzubu yetu ku Warwick. Bavua benze kabidi mudimu ku Patterson ne ku Wallkill. Muanetu Jedele uvua muenze mudimu mu Tshibambalu tshia malu a luibaku ne mu Tshibambalu tshia malu a mpitadi. Mu 2023, bakamuteka muambuluishi mu Komite wa mudimu. Udi uvuluka midimu yonso ivuabu bamupesha ayi wamba ne: “Imue misangu, udi mua kumvua kabuôwa padibu bakupesha midimu mipiamipia. Kadi adi ke dîba dia wewe kueyemena Yehowa bualu yeye ke wakuambuluisha bua kuenza midimu yonso idibu bakupesha.”

Muanetu Rumph mmuledibue mu Californie, mu États-Unis. Pavuaye muana, mamuende uvua mulekele bisangilu ne kuyisha, kadi uvua wenza muende muonso bua kumulongesha bulelela bua mu Bible. Bualu bukuabu, Rumph uvua uya tshidimu tshionso bua kutangila kakuende wa bakaji uvua Ntemu wa lulamatu. Kakuende au wakamuambuluisha bua kunanga malu a mu Bible bikole; nunku Rumph wakalomba bua batuadije kumulongesha Bible pavuaye ne bidimu 13. Wakabatijibua mudia 27/9/1992, patshivuaye tshitende. Diakalenga, mamuende wakatuadijilula kabidi kubuela mu bisangilu ne kuyisha; tatuende ne bana babu bakatuadija pabu kuya kumpala ne bakalua kubatijibua.

Patshivua muanetu Rumph nsonga, uvua umona muvua bampanda-njila bikale ne disanka. Ke bualu kayi pakajikijaye kalasa, wakalua mpanda-njila mu ngondo wa 9/1995. Mu 2000, wakaya mu Équateur bua kuambuluisha muaba uvuabu dijinga ne bamanyisha ba bungi. Muomu amu wakatuilangana ne muanetu wa bakaji Inga wa mu Canada uvua mpanda-njila, bobu kulua kuselangana. Pashishe, bakaya kuenza mudimu mu tshimenga kampanda tshia mu Équateur amu, muvua kasumbu kakese ka bamanyishi. Lelu eu mu tshimenga atshi mukadi tshisumbu tshinene.

Pakapita matuku, bakateka muanetu Rumph ne mukajende bampanda-njila ba pa buabu ne pashishe bakalua kubatuma mu mudimu wa butangidi bua tshijengu. Mu 2011, bakababikila mu Kalasa ka Gilada ka 132. Bobu bamane kupeta diplome dia kalasa aku, bakenza mudimu mu matunga 5 mu midimu mishilashilangane bu mudi wa ku Betele, wa bumisionere, ne wa butangidi bua tshijengu. Muanetu Rumph uvua mupete kabidi diakalenga dia kulongesha mu Kalasa ka bamanyishi ba Bukalenge.

Mu tshikondo tshia tshipupu tshia korona, muanetu Rumph ne mukajende bakapingana mu États-Unis. Bavua bababikile ku Betele wa Wallkill, kuakayabu kulongesha muanetu Rumph mudimu wa mu Tshibambalu tshia mudimu. Bakalua kubapingaja kabidi ku Betele wa mu Équateur, kuakaya muanetu Rumph kuenza mudimu mu Komite wa Filiale. Mu 2023, bakabatuma ku betele wa Warwick. Mu ngondo wa 1/2024, bakateka muanetu Rumph muambuluishi mu Komite wa mudimu. Padiye wela meji bua midimu yonso idiye muenze ayi, udi wamba ne: “Tshidi tshivuija mudimu utudi tuenza wa pa buawu ki mmuaba utudi tuwenzela to, kadi mbantu batudi tuwenza nabu.”

Tudi ne dianyisha dia bungi bua mudimu mukole udi bana betu aba benza ne tudi ‘tutungunuka ne kuangata bantu ba mushindu eu ne mushinga wa bungi.’​—Filip. 2:29.