Bible ukavua mumanyishe tshinyi bua malu a dikanka dikole dia buloba?

Tshidimu tshionso etshi, dikanka dia buloba ditu dienzeka misangu binunu bia bungi. Misangu ya bungi kaditu dikole to. Kadi dia dikole diodi dienzeke didi mua kubutula bintu bibi menemene, kukebesha dikenga ne lufu nansha diodi dikese. Imue misangu ditu dikebesha dipasalala dia mâyi didi mua kunyangakaja bintu bibi menemene, ne kushipa bantu ba bungi ba muaba udidi dienzekele awu. Bible ukavuaku muakule bua dikanka dikole dia buloba edi anyi?

Mu tshiena-bualu etshi

Bible ukavua mumayishe bualu bua dikanka dia buloba anyi?

Bible mubulula. Ne panyima baleja bidi tshiamu tshia kupima natshi bukole bua dikanka dia buloba tshikuate.

Bible udi wakula bua dikanka dia buloba mu mêyi a buprofete avua Yezu muakule. Tudi mua kubala tshivuaye muambe bua bualu abu mu mikanda isatu ya mu Bible idi ilonda eyi:

“Tshisamba netshiluishe tshisamba tshikuabu, bukalenge nebuluishe bukalenge bukuabu, nekuikale biyole bia nzala, buloba nebukanke ku muaba ne ku muaba.”—Matayi 24:7.

“Tshisamba netshiluishe tshisamba tshikuabu, bukalenge nebuluishe bukalenge bukuabu; buloba nebukanke ku muaba ne ku muaba; nekuikale kabidi biyole bia nzala.”—Mâko 13:8.

“Buloba nebukanke bikole, ne biyole bia nzala ne bipupu bia masama nebienzeke ku muaba ne ku muaba.”—Luka 21:11.

Nunku Yezu ukavua mudianjile kuamba ne: “buloba nebukanke bikole ku muaba ne ku muaba” ne anu mu tshiotshi tshikondo atshi, mvita, biyole bia nzala, ne bipupu bia masama nebikale pabi bienda bienzeka. Penzeke malu onso aa, nebimueneke patoke ne: tukadi ku “nshikidilu wa ndongoluelu wa malu eu” anyi “matuku a ku nshikidilu.” (Matayi 24:3; 2 Timote 3:1) Bilondeshile dilondangana dia malu a mu Bible, “matuku a ku nshikidilu” avua matuadije mu 1914 ne ki mmanji kujika to.

Dikanka dia buloba didi dienzeka matuku etu aa didi dikumbaja tshikavua Bible muambe anyi?

Karte ka buloba mudibu baleje miaba idi dikanka dia buloba dienzeka.

Eyowa. Mêyi a buprofete avua Yezu muambe, kusangisha ne a dikanka dia buloba, adi apetangana ne malu adi enda enzeka matuku etu aa. Katshia ku 1914 dikanka dia buloba dikadi dienzeke misangu mipite pa 1950, ne ndishipe bantu bapite pa miliyo ibidi.a Mona bimue bilejilu bia mu bidimu lukama ebi.

2004, Océan Indien. Dikanka dikole dia buloba diakakebesha dipasalala dia mâyi mu matunga matue ku dikumi ne bia mu njila ne diakashipa bantu batue ku 225 000.

2008, Chine. Dikanka dikole dia buloba diakanyangakaja bimenga ne misoko, ne badi batshinka ne: divua dishipe bantu 90000, ne bantu bakuabu 375 000 batapike; ne diakashiya bantu miliyo ya bungi kabayi muaba wa kulala.

2010, Haïti. Dikanka dikole dia buloba dia kenzeka, ne panyima padi buloba buakashala bukanka misangu ya bungi ne diakashipa bantu bapite pa 300 000 ne diakashiya bantu miliyo ya bungi kabayi ne nzubu to.

2011, Japon. Dikanka dikole dia buloba ne dipasalala dia mâyi biakenzeka, kushipabi bantu batue ku 18 500 ne bantu binunu nkama ya bungi bakamuangala. Tshiapu tshia nzembu tshia mu Fukushima tshia kanyanguka, kukebeshatshi njiwu mibi mitambe. Panyima pa bidimu dikumi, bantu batue ku 40 000 kabavua ne mushindu wa kualukila ku mbanza yabu pabuipi ne muaba uvua tshiapu atshi to bualu pavua njiwu minene ya kupeta masama.

Mêyi a buprofete a mu Bible adi akula bua dikanka dia buloba adi ne diumvuija kayi buetu tuetu?

Mulume ne mukaji bakuatangane ku tshianza, baya batangile ku matuku atshilualua mimpe.

Mêyi a buprofete adi adi akula bua dikanka dia buloba adi atudimuija bua tshialu kuenzeka mu katupa kîpi emu. Yezu wakamba ne: “Panudi numona malu aa enzeka, numanye ne: Bukalenge bua Nzambi budi pabuipi.”—Luka 21:31.

Bible udi uleja ne: Bukalenge bua Nzambi mbulamatadi mulelela udi mu diulu, ne Yezu Kristo ke Mukalenge. Bukalenge ebu ke buvua Yezu muambile bayidi bende bua basambile bua bualu buabu.—Matayi 6:10.

Patuadija Bukalenge bua Nzambi kukokesha pa buloba, Nzambi neapangishe dikanka dia buloba ne bikumina bikuabu bua kabienzedi kabidi bantu bibi to. (Yeshaya 32:18) Ne pakumbusha atshi, neajikije bisama bionso bia ku mubidi ne bia mu lungenyi bikebesha kudi dikanka dia buloba didi dienzeka matuku etu aa. (Yeshaya 65:17; Buakabuluibua 21:3, 4) Bua kumanya malu a bungi, bala tshiena-bualu tshia ne: “Bukalenge bua Nzambi nebuenze tshinyi?”

a Bungi ebu mbuagatshila mu liste wa Global Significant Earthquake Database, utubu bakajilulula pa tshibidilu kudi bena centre américain de données géophysiques (United States National Geophysical Data Center).

Mudi bamue babuejakaja mêyi a buprofete a mu Bible ne dikanka dia buloba

Mudi bamue babuejakaja: Tshikondo tshitudi etshi ki ntshia pabuatshi to, bualu dikanka dia buloba ki mbualu buenyi to.

Bulelela bua bualu: Pa kumbusha dikanka dia buloba, Bible uvua muakule bua malu makuabu a bungi avua ne bua kuenzeka anu mu tshikondo tshimue tshimue, aleja patoke ne: tudi mu matuku a kunshikidilu. Bua kumanya malu a bungi tangila tshiena-bualu tshia ne “Tshimanyinu tshia ‘matuku a ku nshikidilu’ anyi ‘bikondo bia ku nshikidilu’ ntshinyi?”

Mudi bamue babuejakaja: Dikanka dia buloba didi dienzeka lelu edi, ndinyoka dia kudi Nzambi.

Bulelela bua bualu: Dikanka dia buloba ditu dienzeka kakuyi kansungansunga, ditu dishipa bantu bimpe ne bantu babi. Ne misangu ya bungi badi bafua, badi bafue bualu bavua muaba mubi, mu tshikondo tshibi. (Muambi 9:11) Bua kumanya bua tshinyi tudi batuishibue ne: bikumina ki ndinyoka dia kudi Nzambi tangila tshiena-bualu tshia ne: “Ntshinyi tshidi Bible wamba bua bipupu?”

Mudi bamue babuejakaja: Mukanda wa Buakabuluibua udi umanyisha ne: dikanka dia buloba diena dîna edi nedibutule buloba bujima.

Bulelela bua bualu: Mukanda wa Buakabuluibua udi wakula bua dikanka dia buloba mu mvese idi ilonda eyi: Buakabuluibua 6:12; 8:5; 11:13, 19; 16:18. Kadi mêyi a buprofete adi mu mukanda eu bavua baafunde “mu bimanyinu,” nunku dikanka dia buloba edi ndia mu tshimfuanyi ki ndiena dîna edi to. (Buakabuluibua 1:1) Bua kumanya malu makuabu, tangila tshiena-bualu tshia ne: “Mukanda wa Buakabuluibua udi ne diumvuija kayi?”