Makuta adibu batule bua basalayi pa buloba bujima mmapite pa ndola miliyare binunu 2​—Ntshinyi tshidi Bible wamba?

Mu 2022, makuta adibu batule bua basalayi pa buloba bujima mmafike ku ndola miliyare binunu bibidi nkama ibidi ne makumi anayi. Kuonso eku kabatu banji kutula makuta bungi nanku bua basalayi to. Mbaatule nangananga bua muvua tshiluilu tshia Russie tshibuele mu Ukraine. Bilondeshile luapolo luvuabu bapatule mu ngondo 4 wa 2023 kudi bena Tshisumbu tshia dikeba ditalala pa buloba bujima tshia mu Stockholm, mu 2022:

• Ku Mputu bavua batule makuta “a bungi 13% bua basalayi. Katshia mvita ya muinshimuinshi yajika, kabatu banji kutula makuta bungi nanku bua basalayi ku tshidimu to.”

• “Badi batshinka ne: bena mu Russie mbatule makuta 9,2%. Mbumbuke pa muaba muitanu balue bisatu, babuele mu mulongo wa matunga adi atamba kutula makuta bikole bua bia mvita pa buloba bujima.”

• Bena mu États-Unis badi anu pa muaba wa kumpala, “bualu mu makuta onso adibu batule bua basalayi pa buloba bujima, bobu mbatule 39%.”

Nan Tian (mulongeshi wa malu a mpetu) uvua muambuluishe pende bua kufunda luapolo lua bena Tshisumbu tshia dikeba ditalala pa buloba bujima mmuambe ne: “Mushindu udi mbulamatadi itungunuka ne kutula makuta bua basalayi pa buloba bujima bidimu bishale ebi, udi uleja ne: tudi mu bulongolodi budi kabuyi mu bukubi to.”

Bible ukavua mumanyishe ne: matuku etu aa, bimvundu bivua ne bua kuvulangana pankatshi pa makokeshi a bukole a pa buloba bujima, ne udi uleja bukokeshi buikala mua kufila ditalala dilelela.

Divulangana dia mvita ya basalayi dikavua dimanyisha

• Bible udi ubikila tshikondo tshitudi etshi ne: “tshikondo . . . tshia ku nshikidilu.”​—Danyele 8:19.

• Mukanda wa Danyele ukavua muleje ne: tshikondo atshi, makokeshi a bukole a pa buloba bujima avua ne bua kutembangana bua kulejangana mudiwu ne bukole. Makokeshi au avua ne bua kusakilangana anyi kuluangana mvita bua kukeba muaba wa kumpala. Mu diluangana dia mvita adi mudi ditula dia “biuma bia bungi” anyi bintu bia bungi.​—Danyele 11:40, 42, 43.

Bua kumanya malu makuabu adi atangila mulayi muimpe menemene wa buprofete wa mu Bible eu, tangila filme wa Mêyi a buprofete a mu Danyele 11 akadi makumbane.

Muabuela ditalala dilelela

• Bible udi uleja ne: Nzambi neumbushe mbulamantadi ya bantu. “Neajadike bukalenge bukuabu buikala kabuyi mua kubutudibua nansha kakese. Bukalenge ebu kabuakuya kudi tshisamba tshikuabu to. Nebuzaze makalenge aa onso ne nebuatuishe ku ndekelu, ne buobu nkayabu nebushalaku kashidi.”​—Danyele 2:44.

• Mu matuku makese emu, Yehowaa Nzambi neenze tshidi bantu kabayi bakokeshe bua kuenza to, mmumue ne: neapeshe bantu ditalala dilelela diashala kashidi. Mmushindu kayi wenzaye nanku? Bukalenge buende bua mu diulu nebusunsule bia mvita bionso ne nebujikije malu onso a tshikisu.​—Misambu 46:8, 9.

Bua kumanya malu makuabu enza Bukalenge bua Nzambi, bala tshiena-bualu tshia “Mu Bukalenge bua Nzambi ‘ditalala nedivulangane.’”