Luka
11 Jino lwola lumwe, Yesu apwile kuchihela chimwe nakulomba. Kahomu akumishile, umwe hali tumbaji twenyi ambile kuli ikiye ngwenyi: “Ove Mwata, tunangule mwakulombela nge muze Yowano nawa anangwile tumbaji twenyi.”
2 Jino ambile kuli vakiko ngwenyi: “Omu namulombanga, hanjikenunga ngwenu: ‘Ove Setu, lijina lyove lipwenga lyajila.*+ Wangana wove wizenga.+ 3 Tuhane kulya chetu chize chasakiwa hakumbi hakumbi.+ 4 Kaha tukonekele jishili jetu,+ mwomwo nayetu nawa tweji kukonekelanga weshowo ali namukuli* kuli etu.+ Kanda nautwingisa muchesekoko.’”+
5 Kaha ambile kuli vakiko ngwenyi: “Ngachilihi nge mutu umwe hali enu ali nasepa lyenyi, kaha mwaya kuli uze sepa lyenyi mukachi kaufuku nakwamba kuli ikiye ngwenyi, ‘Ove sepa lyami, ngulevanyiseko jimbolo jitatu, 6 mwomwo sepa lyami neza ali haungeji wenyi, kaha kangweshi nakulya chakumuzumbulako.’ 7 Oloze uze sepa lyenyi muzuvo himwamukumbulula ngwenyi: ‘Kanda kunguyanjisako. Kuchikolo kwakusoka lyehi, kaha ami navana vami vavandende tuli lyehi mukahela. Kangweshi kuhinduka nakukuhana vimweko.’ 8 Nangumilweza ngwami, numba mwakana kuhinduka nakumuhana vimwe hakupwa sepa lyenyi, oloze mwomwo yaluzema lwenyi,+ mwahinduka nakumuhana vyeshovyo nasake. 9 Ngocho nangwamba kuli enu ngwami, lombenunga lika,+ kaha navakamihana. Tondenunga lika, kaha namukawana. Ngongomwezenunga lika, kaha navakamisokolwela.+ 10 Mwomwo weshowo mwalombanga mwatambula,+ kaha weshowo mwatondanga mwawana, kaha weshowo mwangongomwezanga navamusokolwela. 11 Chikupu vene, chisemi muka hali enu, nge mwanenyi mwamulomba ishi, kaha himwamuhana linoka mukutela kumuhana ishi?+ 12 Mokomoko nge mwalomba liulu, kaha himwamuhana kavwanda? 13 Shikaho kachi nge enu, numba tuhu mwapwa muvakuhuka, oloze munatachikiza mwakuhanyina mawana amwaza kuli vana venu, kahanyi Senu wamwilu mwahambakanamo chikuma kuhana shipilitu yajila kuli vaze navamulombayo.”+
14 Halwola lweka nawa alowele ndemone waumama.+ Kahomu alingile uze ndemone nalovoka lyehi, uze kamama ahanjikile. Kaha aze mayongomena alikomokelele.+ 15 Oloze vamwe vambile ngwavo: “Ou mutu eji kulovolanga vandemone nangolo jaMbelezembule,* muka-kuyula vandemone.”+ 16 Oloze veka hakusaka ngwavo vamweseke, vasakile avasolwele chinjikizo+ chakufuma mwilu. 17 Hakutachikiza vishinganyeka vyavo,+ ambile kuli vakiko ngwenyi: “Weshowo wangana naulimbalaka uvene weji kunonganga, kaha zuvo nayilimbalaka ivene yeji kushiukanga. 18 Chochimwe nawa, kachi nge Satana nalifumbukila ivene, kahaze wangana wenyi nauzama ngachilihi? Mwomwo enu mweji kwambanga ngwenu ngweji kulovolanga vandemone nangolo jaMbelezembule. 19 Kachi nge ami ngweji kulovolanga vandemone nangolo jaMbelezembule, nyi vana venu veji kulovolanga vandemone nangolo jeya? Shikaho vana venu navakapwila vaka-kumisopesa. 20 Oloze nge ami ngweji kulovolanga vandemone namunwe waKalunga,+ kaha Wangana waKalunga uneza chikupu chakuzeneka enu kutachikiza.+ 21 Nge mutu wangolo nalizange navitwa nakulama zuvo yenyi, vyuma vyenyi navipwanga vyape. 22 Oloze omu nakwiza mutu weka wakumuhambakana ikiye ngolo nakumufungulula, mwamunyanga vitwa vyenyi vyosena vize afwelelanga, nakumbata vikumba vyenyi nakuvipangila vakwavo. 23 Weshowo keshi kuli amiko napu muka-kole wami, kaha weshowo keshi kukungulwila hamwe nayamiko eji kumwanganga.+
24 “Omu shipilitu wamupi eji kulovokanga muli mutu, eji kuhitangana muvihela vyakuzeneka meya nakutonda chihela chakunokela. Oloze omu mwawana chauchi, eji kwambanga ngwenyi, ‘Nangukinduluka cheka muzuvo yami muze ngwalovokanga.’+ 25 Jino hakuheta kuze eji kuwananga muzuvo mwakukomba, mwakuwahisa kanawa. 26 Kaha eji kuyanga nakumbata vashipilitu veka 7 vakumuhambakana ikiye kuhuka. Kahomu veji kwingilanga muli mutu, veji kutwamanga vene muze. Ngocho katwamino kamutu kana keji kupihyanga chikuma kuhambakana kaze kakulivanga.”
27 Jino omu apwile nakuhanjika vyumevi, pwevo umwe haze haliyongomena atambakanyine kuli ikiye ngwenyi: “Lyawahilila lijimo lize lyakwimichile, namavele aze wamwine.”+ 28 Oloze ikiye ambile ngwenyi: “Nduma, vawahilila shina vaze veji kwivwililanga mazu aKalunga nakuwalamanga.”+
29 Omu mayongomena apwile nakulihomena hamwe, ikiye aputukile kwamba ngwenyi: “Chisemunwino chino chapwa chisemunwino chakuhuka, cheji kusakanga kumona chinjikizo. Oloze kaveshi kuchisolwela chinjikizo chekako, shina chinjikizo chaYona kaha.+ 30 Mwomwo nge muze Yona+ apwile chinjikizo kuli vaka-Nyineve, mukiko nawa naMwanamutu mwakapwa chinjikizo kuchisemunwino chino. 31 Mwangana wapwevo wakusulo+ navakamusangula mulwola lwakusopesa hohamwe navatu vamuchisemunwino chino, kaha mwakavapayisa mwomwo ikiye afumine kujisongo jamavu nakwiza nakwivwilila mangana aSolomone. Oloze hano hali ou ahambakana Solomone.+ 32 Vatu vakuNyineve navakasanguka mulwola lwakusopesa hohamwe nachisemunwino chino, kaha navakachipayisa mwomwo vakiko vapihililile nakwalumuka omu Yona avambulilile.+ Oloze hano hali ou ahambakana Yona. 33 Mutu nge nawiki linongo, keshi kulihaka muchihela chakuswama, chipwe kulifwikilila mumbangoko,* oloze eji kulihakanga hachitumbikilo chalyo,+ mangana vaze navengilamo vamone kumunyika chalyo. 34 Linongo lyamujimba likiko liso lyove. Nge liso lyove linatale mumwe kaha,* namujimba wove wosena naumunyika zwalala. Oloze nge nalipwa lyalushiushiu,* kaha namujimba wove wosena nawa nawilava wi.+ 35 Shikaho, zangama kuchina kumunyika chize chili muli ove nachipwa milima. 36 Ngocho, kachi nge mujimba wove wosena unamunyika zwalala chakuzeneka numba hamwe hanelava, kaha mujimba wosena unamunyika zwalala nganomu linongo lyeji kukumunyikilanga.”
37 Omu alingile hanahanjika lyehi vyumevi, kaFwaliseu umwe amulanyine alyenga nenyi vyakulya. Ngocho engilile mukachi nakusendavala kumesa. 38 Oloze uze kaFwaliseu alikomokelele hakumona Yesu mwalya kulya chahamulungu chakuzeneka kusana kumavoko.*+ 39 Oloze Mwata ambile kuli ikiye ngwenyi: “Jino enu vaFwaliseu, enu mweji kutomesanga kuweluka walupasa nalilonga, oloze mujitulo jenu munazale chipululu navilinga vyakuhuka.+ 40 Enu vatu vakuhona mangana! Ou atengele kuweluka keshi ikiye atengele namutuloko nyi? 41 Ngocho hanenu vyuma vize vili mutulo kupwa mawana akutetela,* kaha vyuma vyosena navipwa vitoma kutalisa kuli enu. 42 Oloze lamba kuli enu vaFwaliseu, mwomwo mweji kuhananga chakusokesa mulikumi chalwenyi, napenganone,+ navisakwola vyeka vinuka vyosena, oloze mweji kuleununanga chiyulo chakwoloka nazangi yaKalunga! Vyuma kanevi mwatela kuvilinga vene, oloze navyevi vikwavo nawa kamwatela kuvileununako.+ 43 Lamba kuli enu vaFwaliseu, mwomwo mwazanga vitwamo vyakulutwe* mujisunangonga, nakumimenejeka kuvilanjilo!+ 44 Lamba kuli enu, mwomwo mwapwa nge muvimbumbe* vize kavyeshi nakusolokako,*+ ngocho vatu navahitaho chakuhona kutachikiza.”
45 Kaha umwe hali vaze vatachikijile chikuma Jishimbi akumbulwile ngwenyi: “Ove Muka-kunangula, hakuhanjika vyuma kanevi uli nakutusawila kumwe nayetu nawa.” 46 Jino ikiye ambile ngwenyi: “Lamba nakuli enu nawa mwatachikiza chikuma Jishimbi, mwomwo mweji kutwikanga vatu viteli vyavilemu, oloze enu vavene kamweshi kukwata kuviteli kana numba namunwe wenu umweko!+
47 “Lamba kuli enu, mwomwo mweji kutunganga vimbumbe* vyavapolofweto, oloze vakakuluka jenu vakiko vavajihile!+ 48 Pundu vene munapu muvinjiho kuvilinga vyavakakuluka jenu, kaha muli nakuvakundwiza nawa, mwomwo vakiko vajihile vapolofweto,+ kahenu muli nakutunga vimbumbe vyavo. 49 Shikaho namangana aKalunga nawa ambile ngwawo: ‘Nangukavatumina vapolofweto navaposetolo, kaha navakavajihajiha nakukayanjisa vamwe, 50 mangana manyinga avapolofweto vosena vanamwangenga kufuma kukwala chihela chakaye vakawehule kuvatu vamuchisemunwino chino,+ 51 kufuma vene kumanyinga aAvele+ nakuheta kumanyinga aZekaliya uze vajihilile mukachi kalijiko lyakulumbila nazuvo.’*+ Chikupu vene nangumilweza ngwami, manyinga osena navakawehula kuvatu vamuchisemunwino chino.
52 “Lamba kuli enu mwatachikiza chikuma Jishimbi, mwomwo mwafumishileko sapi yachinyingi. Enu vavene kamwengililemoko, kaha nawa vaze vasakile kwingilamo mwavajikililile.”+
53 Ngocho omu alovokele, vaka-kusoneka navaFwaliseu vaputukile kumushinyinyika chikuma nakumwihwojola vihula vyavivulu, 54 nakumuta likazo mangana vamuwanyine katenga kumazu mwahanjika.+