Wavaka-Efwesu
5 Shikaho londezezenunga Kalunga,+ hakupwa muvana venyi azanga, 2 kaha tambukenunga lika muzangi+ nge muze nawa Kulishitu atuzangile*+ nakulyecha ivene hali etu* kupwa wana nakupwa chimuna wakuvatula walivumba lyalupengopengo kuli Kalunga.+
3 Ujila,* namajilo osena, nachipululu, kanda vavivulukila muli enuko,+ mwomwo evi kavyatela vaka-kujilako,+ 4 chipwe vilinga vyakwivwisa sonyi, chipwe hanjikiso yauleya, chipwe kuseseka chakasautu,+ evi hivyuma vize kavyatelako, oloze sakwililenunga Kalunga.+ 5 Mwomwo enu munatachikiza chumechi nakwijiva kanawa ngwenu, kakweshi muka-ujila,*+ chipwe muka-majilo, chipwe muka-chipululu,+ kulumbununa nge muka-kulemesa makombelo, ali nauswana muWangana waKulishitu nawou waKalungako.+
6 Kanda nakupwa mutu umwe mwamitangisa namazu amokomokoko, mwomwo havyumevi hakiko vene nawijila utenu waKalunga hali vana vakulikanga. 7 Shikaho kanda namulikatanga navoko, 8 mwomwo kunyima enu mwapwilenga milima, oloze munapu lyehi kumunyika+ hakulikata naMwata.+ Tambukenunga lika nge vana vakumunyika, 9 mwomwo kumunyika cheji kulovolanga kuwaha chosena, nakwoloka, namuchano.+ 10 Twalenuho lika kukekesanga mumone vyuma vize etavila+ Mwata. 11 Kaha litwaminenu kwazananga mumilimo yakumilima+ yakuzeneka kwima mihako, oloze vasopololenu omu vapwa. 12 Mwomwo vyuma vize veji kulinganga kupenge vinapu vyasonyi numba vene kuvivuluka. 13 Jino vyuma vyosena vize vanasopolola,* kumunyika chikiko chinavisolola, mwomwo vyosena vize vanasolola vinapu kumunyika. 14 Shikaho vamba ngwavo: “Tona, ove muka-kusavala tulo, sanguka kuvafu,+ kaha Kulishitu mwakumunyikila.”+
15 Ngocho nyingililenu ngwenu kutambuka mweji kutambukanga, kamweshi nakutambuka nge vaka-kuhona manganako, oloze nge vaka-mangana, 16 zachisenunga kanawa lwola lwenu,*+ mwomwo makumbi ano anapu amapi. 17 Shikaho litwaminenu kukaluhwisanga michima yenu, oloze tachikizenunga mwaya muchima waYehova.*+ 18 Kaha nawa kanda namupendanga vinyoko,+ mwomwo navimilingisa mulinge vilinga vyakuhuka, olozenyi zalenunga lika nashipilitu. 19 Lihanjikisenunga navakwenu* najisamu, namyaso yakwalisa Kalunga, namyaso yakushipilitu, nakwimbanga+ myaso+ najimbendo mumichima yenu kuli Yehova,*+ 20 nakumusakwililanga+ Kalunga, Setu, shimbu yosena havyuma vyosena, mulijina lyaMwata wetu Yesu Kulishitu.+
21 Liluulenunga kuli vakwenu+ mwomwo yakwivwa woma Kulishitu. 22 Mapwevo valiluulenga kuli malunga javo+ nge kuli Mwata, 23 mwomwo lunga apwa mutwe wapwevo+ nganomu nawa Kulishitu apwa mutwe wachikungulwilo,+ hakupwa ikiye muka-kulwila mujimba kanou. 24 Mwomwo nganomu chikungulwilo chaliluula kuli Kulishitu, namapwevo nawa vatela kuliluula kuli malunga javo muvyuma vyosena. 25 Enu malunga, twalenuho lika kuzanganga mapwevo jenu,+ nganomu Kulishitu nawa azangile chikungulwilo nakulyecha ivene hachikiko,+ 26 mangana ngwenyi achilingise kupwa chajila nakuchitomesa hakuchisanyisa nameya amazu aKalunga,+ 27 mangana chikungulwilo achimike kumeso enyi ivene chaupahu, chakuzeneka lipenga chipwe mukonya chipwe chuma cheka changocho,+ oloze chipwenga chajila chakuzeneka katenga.+
28 Ngocho namalunga nawa vatela kuzanganga mapwevo javo nganomu vazanga mijimba yavo. Lunga uze azanga pwevo lyenyi alizanga ivene, 29 mwomwo kakweshi mutu ahunga mujimba wenyiko, oloze eji kuulisanga nakuuzakamanga, nganomu Kulishitu nawa eji kulinganga nachikungulwilo, 30 mwomwo etu tunapu tuvilyo vyamujimba wenyi.+ 31 “Shikaho lunga mwakaseza ise nanaye nakukalipanjika* napwevo lyenyi, kaha ava vavali navakapwanga mujimba umwe.”+ 32 Evi vyuma vyajila vyakusweka+ vinapu vyavilemu. Jino ami nguli nakuhanjika vyaKulishitu nachikungulwilo.+ 33 Chipwe ngocho, enu nawa mutu himutu azangenga pwevo+ lyenyi nganomu alizanga ivene. Kaha nawa pwevo atela kupwa nakalemesa chikuma kuli lunga+ lyenyi.