Isaya
48 Ivwenu chumechi enu vakuzuvo yaYakova,
Enu mweji kulivulukanga lijina lyaIsalele,+
Enu munafumu kumeya* aYuta,
Enu mweji kulishinganga lijina lyaYehova+
Enu mweji kusanyikanga Kalunga kaIsalele,
Oloze keshi mumuchano namukwolokako.+
2 Mwomwo mweji kulivulukanga ngwenu muvakunganda yajila,+
Kaha mwapendamina hali Kalunga kaIsalele amikafwe,+
Ukwechi lijina lyenyi ikiye Yehova wamayongomena.
3 “Vyuma vyakunyima* ngwamilwezelevyo lyehi kushikulu.
Vyuma kana vyalovokele mukanwa kami,
Kaha ngwavyambulwile.+
Ngwavilingile mukapyapya kakandende, kaha vyazachiwile.+
4 Ngwatachikijile ngwami mwapwa muvakukakama michima,
Ngwami jishingo jenu jakukola nge vikungo, kaha jiholo jenu nawa jakukola nge fwelu.+
5 Shikaho ngwamilwezelevyo kushikulu.
Ngwamilwezelevyo shimbu kanda visoloke,
Kuchina namwamba ngwenu, ‘Makombelo etu akiko anavilingi.
Makombelo etu akusonga nawawa akuzuzulula akiko anavihanjika.’
6 Munevu nakumona vyuma vyosenevi.
Uno kamweshi kuvyambululako nyi?+
Kufuma oholili jino nangumijimbwila vyuma vyavihya,+
Vyuma vyakusweka vize munazeneka kutachikiza.
7 Vyuma kana nguli nakuvilinga oholili, kunyima kavyapwilekoko,
Kaha kanda muvivwengaho lyehi,
Mangana muzeneke kwamba ngwenu, ‘Twavitachikiza lyehi.’
8 Vyuma kana kanda muvivwengaho lyehi+ chipwe kuvitachikizako,
Kushikulu matwitwi enu kawajikukileko.
Mwomwo ngwatachikiza ngwami mwapwa muvaka-kumbembejeka,+
Mwapwa muvaka-kuzombwojoka jishimbi kufuma kukusemuka chenu.+
9 Oloze nangutulisa matoto ami mwomwo yalijina lyami.+
Kangweshi kumizangamisako,
Chipwe kuminongesako mangana vangwalisenga.+
10 Talenu! Ngunamitomesa, oloze keshi nge omu navatomesa palatako,+
11 Nanguchilinga chikupu mwomwo yalijina lyami,+
Kangweshi kwitavila lijina lyami valijilululeko.+
Kangweshi kuhana upahu wami kuli mutu wekako.*
12 Ove Yakova, ove Isalele, ove ngunasanyika, ngwivwilile.
Ami kangwalumukako.+ Yami wakulivanga, yami nawa wakukuminyina.+
13 Ngwalile chihela chamavu nalivoko lyami,+
Ngwatanduwile melu nalivoko lyami lyachilyo.+
Kahomu ngweji kuvisanyikanga, vyeji kwimananga.
14 Likungululenu muvosena mangana mungwivwilile.
Iya hakachi kavo navilika vyumevi?
Ou vanazange kuli Yehova,+
Mwakalinga vyuma nasake hali Mbavilone,+
Kaha livoko lyenyi nalikazangamisa vaKalateya.+
16 Pandamenu kuli ami mwivwenga chumechi.
Kufuma vene kukuputuka kangwahanjikile vyuma mukuswekako.+
Kufuma vene halwola luze vyasolokele kungwapwile.”
Ngocho jino Mwata Wakulitulaho Yehova natumu ami nashipilitu yenyi.
17 Yehova, ou Muka-kumisokola, ou Wajila waIsalele+ nambe ngwenyi:
“Ami Yehova yami Kalunga kenu,
Ou eji kuminangulanga mangana munganyale,*+
Ou eji kumitwaminyinanga mujila yize mwatela kuya.+
18 Kachi nge namwivwililanga jishimbi jami+
Kaha kuunda chenu nachipwanga nge kalwiji,+
Kwoloka chenu nachipwanga nge makimba akalungalwiji.+
19 Vana* venu navakavula kwijiva nge usekeseke.
Kaha vaka-tanga yenu navakavula nge maundu ausekeseke.+
Majina avo kaveshi kukawajimbangana chipwe kuwafumisa kumeso amiko.”
20 Fumenu muMbavilone!+
Chinenu muli vaKalateya!
Ambululenu chuma chino nakuwahilila. Chivilikenu.+
Chambululenu nakujisongosongo jamavu,+
Ngwenu: “Yehova nasokola ngamba yenyi Yakova.+
21 Omu avatwaminyinyine muvihela vyaumu, kavafwile lipwilako.+
Avalowelele meya kulilolwa.
Apulile lilolwa, kaha meya ambwambumukile.”+
22 Yehova nambe ngwenyi: “Vaka-kuhuka+ kavatwama mukuundako.”