Wavaka-Efwesu

1 Ami Paulu, kaposetolo kaKulishitu Yesu nge mwaya muchima waKalunga, nguli nakumisonekela enu vaka-kujila muli muEfwesu,+ enu mwashishika hakulikata naKulishitu Yesu:

2 Likoji lyalinene nakuunda vyakuli Kalunga Setu naMwata Yesu Kulishitu vipwenga nayenu.

3 Vamwalisenga Kalunga, Ise yaMwata wetu Yesu Kulishitu, mwomwo natukisula najikisu jakushipilitu josena muvihela vyamwilu hakulikata naKulishitu,+ 4 omu atusakwile tukalikate naikiye shimbu kanda valenga chihela chakaye, mangana ngwenyi tukapwenga vajila, vakuzeneka katenga+ kumeso enyi muzangi. 5 Mwomwo atutongwelele chimweza+ mangana ngwenyi akatwitavile kupwa tuvana venyi+ kuhichila muli Yesu Kulishitu, nge omu evwililile kuwaha nomu mwaya muchima wenyi,+ 6 mangana vamwalisenga halikoji lyenyi lyalinene+ lize atusolwelele hawana wakanyombo kuhichila muli ou azanga.+ 7 Muli ikiye mukiko vanatusokwela nandando yakusokola kuhichila mumanyinga enyi,+ chikiko vene kutukonekela vilinga vyetu vyakuhenga,+ kweseka naluheto lwalikoji lyenyi lyalinene.

8 Eli likoji lyalinene atuvulishililelyo mumangana osena namukunangakana chosena, 9 hakutujimbwila vyuma vyajila vyakusweka+ vyomu mwaya muchima wenyi. Kweseka nomu evwililile kuwaha, ajinyine 10 jila yakuyulilamo vyuma* omu nalukatamo lwola vatongola, mangana akakungulwile vyuma vyosena hamwe muli Kulishitu, vyuma vyamumelu navyuma vyahamavu.+ Muli ikiye 11 mukiko tunalikachila nenyi, kaha vatusakwile kupwa tuvaswana+ mwomwo vatutongwele chimweza kweseka nakujina chayauze eji kutesangamo vyuma vyosena nganomu mwaya muchima wenyi, 12 mangana kuhichila muli etu twalivangile kutalilila muli Kulishitu, Kalunga vamwalise nakumutohwesa. 13 Oloze nayenu nawa mwatalililile muli ikiye omu mwalingile himunevu lyehi mazu amuchano, akiko vene mujimbu wamwaza waulwilo wenu. Omu mwetavile, vamihakile katachikijilo+ kuhichila muli ikiye nashipilitu yajila yize vashikile, 14 yize yinapu chijikilo chauswana+ wetu wakulutwe, mangana luheto lwaKalunga+ vakalusokole nandando yakusokola,+ nakwalisa upahu wenyi.

15 Shikaho nayami nawa, hakuwana nge ngunevu lyehi lufwelelo muli nalwo muli Mwata Yesu, nazangi yize munasolola kuli vaka-kujila vosena, 16 kangwalitwamina kusakwilila Kalunga hali enuko. Kaha ami ngweji kumivulukanga lika mukulomba chami, 17 mangana ngwami Kalunga kaMwata wetu Yesu Kulishitu, Setu waupahu, amihane shipilitu yamangana nayeyi yakusolola vyuma vyakutalisa kuchinyingi chakwoloka chakumutachikiza ikiye.+ 18 Ikiye natonesa meso amichima yenu, mangana muhase kutachikiza lutalililo luze vamisanyikililile, naluheto lwaupahu wenyi vize alama kupwa uswana wavaka-kujila,+ 19 nomu jatohwa ngolo jenyi jajinene asolola kuli etu vaka-kwitava.+ Kaha kutohwa chajo chasoloka mumulimo wangolo jenyi jaundume, 20 mulimo uze azachile omu asangwile Kulishitu kuvafu nakumutwamisa kulivoko lyenyi lyachilyo+ muvihela vyamwilu, 21 vihela vyakuhambakana chikuma jifulumende josena, namawata osena, nangolo josena, nautwamina wosena, namajina osena aze valuka,+ keshi nge mukatwamino kamyaka yino* kahako, oloze namuli kaze kali nakwiza nawa. 22 Kaha nawa aluwile vyuma vyosena mwishi yavilyachilo vyenyi,+ kaha amulingishile kupwa mutwe havyuma vyosena kutalisa kuchikungulwilo,+ 23 chikiko vene mujimba+ wenyi, chize chazalilila naikiye, uze eji kuzalisanga vyuma vyosena mwosena.