Wavaka-Efwesu
4 Shikaho ami funge+ muli Mwata, ngunamilembelela mutambukenga nganomu mwatela+ kusanyika kana chize vamisanyikile, 2 nakulinyisa+ chosena, nakuvova, nakutalilila chikoki,+ nakuliula tutenga twavakwenu muzangi,+ 3 nakufwilanga kulama kulinunga chenu hamwe mushipilitu chize cheji kuminunganga hamwe mukuunda.+ 4 Kuli mujimba umwe,+ nashipilitu yimwe,+ nge muze vamisanyikilile kulutalililo lumwe+ luze vamisanyika. 5 Kuli Mwata umwe,+ nalufwelelo lumwe, nalumbapachiso lumwe, 6 naKalunga umwe, Sevo yavatu vosena ou ali helu lyavosena, azata muli vosena, atwama muli vosena.
7 Jino etu tuvosena vatusolwelele likoji lyalinene kweseka nomu Kulishitu apangilile wana kanou wakanyombo.+ 8 Mwomwo vamba ngwavo: “Omu akandukile mwilu atambwile vafunge, ahanyine malunga kupwa wana.”+ 9 Jino hakwamba ngwavo “akandukile,” kumana kachalumbununa nge avangilile kushikumuka mwishi, hamavuko nyi? 10 Shikaho uze ashikumukile, ikiye vene uze akandukile+ chikuma nakuhambakana melu osena,+ mangana akahase kuzalisa vyuma vyosena.
11 Kaha ahanyine vamwe kupwa vaposetolo,+ vamwe kupwa vapolofweto,+ vamwe kupwa vaka-kwambulula* mujimbu wamwaza,+ vamwe kupwa tufunga navaka-kunangula,+ 12 mangana vahase kwolola* vaka-kujila, vazatenga mulimo wakuzachila vatu, vatungenga mujimba waKulishitu,+ 13 palanga nomu tuvosena natukapwa vakulinunga hamwe mulufwelelo, namuchinyingi chakwoloka chakutachikiza MwanaKalunga, nakuheta kuseteko yalunga wakukola lyehi,+ nakuheta kuseteko yachivuvu chakuzala chize aheteleho Kulishitu. 14 Ngocho katwatela kupwa cheka tuvana vavandendeko, nakuhungwomwoka noku noku kwijiva nge namakimba, nakupekwomwoka noku noku napeho yakunangula yosena,+ natufuta twavatu, nakulunguluka chamakuli akuhungumwisa vatu. 15 Oloze tuhanjikenunga muchano nakukula muvyuma vyosena muzangi muli ikiye ou apwa mutwe, ivene Kulishitu.+ 16 Kuli ikiye kukiko vanungilila hamwe vilyo vyamujimba vyosena,+ nakuvilingisa vilikwatasane hamwe kuhichila mulinungililo hilinungililo lize lyeji kuzatanga mulimo walyo. Kachi nge chilyo hichilyo nachizata kanawa, kahechi cheji kukafwanga mujimba ukole omu uli nakulitunga uvene muzangi.+
17 Shikaho nangwamba kuli enu nakumihuhumuna muli Mwata ngwami, kanda namutambukanga cheka nganomu veji kutambukanga vaka-mafuchi+ muvishinganyeka vyavo vyaufwefweleketeko.*+ 18 Vakiko vali mumilima kuvishinganyeka vyavo, vanahandunuka kukuyoya chakuli Kalunga, mwomwo yakuhona chavo kutachikiza, mwomwo yakukakama* chamichima yavo. 19 Hakuwana nge vivezu vyavo vinambumbula lyehi, ngocho vanalihane vavene kuvilinga vyakuzunguma*+ mangana vazatenga vyuma vyamajilo vyeka navyeka nakupwa nachipululu.
20 Oloze enu Kulishitu kamwalinangwileyo kupwa ngochoko, 21 kachi nge mwamwivwile chikupu, kaha nawa vaminangwile kuli ikiye, nge omu mwaya muchano uze watwama muli Yesu. 22 Vaminangwile muzule mutu wamwaka+ wakuya mwaya twamiso yenu yamwaka, uze vali nakulumbula nge omu mwaya kufwila chawo chakutangisa.+ 23 Kaha pwenunga lika muvavahya muvishinganyeka vyamichima yenu,*+ 24 kaha nawa vwalenu mutu wamuhya+ uze vatengele kweseka nomu mwaya muchima waKalunga namukwoloka chamuchano namukushishika.
25 Shikaho, hakuwana nge munaseze jino makuli, mutu himutu ahanjikenga muchano namukwavo,+ mwomwo tunapu tuvilyo vanungila hamwe navakwetu.+ 26 Kwatenu utenu, oloze kanda namulinga shiliko.+ Kanda namutokesa likumbi oku hanga munapihililako.+ 27 Kanda namusela Liyavolo kengililoko.*+ 28 Uze eji kwivanga kanda mweva chekako, oloze akilikitenga, azatenga milimo yamwaza namavoko enyi,+ mangana apwenga navyuma vyakuhanako uze nakalikiza.+ 29 Mutunwa twenu kanda namulovoka mazu akupolako,+ oloze shina aze amwaza kaha, akutunga vakwenu halwola navasakiwa kuvakafwa, mangana ahase kunganyalisa vaka-kwivwilila.+ 30 Kaha nawa, kanda namunyengetesanga* shipilitu yajila yaKalungako,+ yize vamihaka lyehi enu kupwa katachikijilo+ kahalikumbi lyakumisokola nandando yakusokola.+
31 Mbilenu koko yosena,+ namatoto, nautenu, nakukalwomwoka, nahanjikiso yakasautu,+ navyuma vyavipi vyosena.+ 32 Pwenunga valikoji kuli vakwenu, nakulivwilanga keke,+ nakulikonekelanga navakwenu namuchima wakusuuluka nganomu Kalunga amikonekelele+ enu namuchima wakusuuluka kuhichila muli Kulishitu.