22 Akakuhemba kuchiisu ejima atondeliwu kulonda ahembeña hamawiñililu adiña 212. Adiña nakushakama munyikala yawu kwesekeja nachayisonekeliwu mundonda yachisaka chawu.+ Ayitondeli kudi Davidi niSamweli mukakumona jakumbidi+ nakuyinka mudimu wakuzata antu akuhwelelawu. 23 Wena hamu nianyanawu awamayala ayinkeli mudimu wakuhemba kuyiisu yetala daYehova,+ itala detenti. 24 Akakuhemba kuchiisu adiña kutubadi tuwana, kumusela, kumujika, kukabeta kakuchidiilu nikukabeta kakuchimunswa.+ 25 Mumpinji-mumpinji, amanakwawu enjileña kufuma munyikala yawu hadi mafuku 7 nakukalakela hamu nawu. 26 Mumudimu wakuzata antu akuhwelelawu, mwadiña akulumpi* awana akakuhemba kuchiisu. Adiña aLevi nawa adiña namudimu wakutala tupeka* niyisweku yayuma yalema yamwitala daNzambi walala.+ 27 Adiña nakuchiisha wufuku wejima saña emenawu hamaluña awu kunyeñumuka itala daNzambi walala dejima, muloña azatileña mudimu wakuhemba nawa diwu ahembeleña nsapi* nikwenzununa yiisu yakwitala ntetemena-hintetemena.