• Isamu 53:mutu-6
    Bayibolu yaNsona jaKaayi Kakaha

    • Kudi mukulumpi wawañimbi; mumutapu waMahalati.* Masikilu.* DaDavidi.

      53 Chisupi* wahoshaña mumuchima windi nindi:

      “Yehova wekalaku wanyi.”+

      Yilwilu yawu yabula kuloña yatama nawa yawuzondu;

      Kwosi niwumu wunakwila chachiwahiku.+

       2 Ilaña Nzambi watalaña heseki hadi anyana kawantu iku wudi mwiwulu+

      Kulonda amoni neyi hadihu wudi nakashinshi, neyi hadihu wunakumukeñakeña Yehova.+

       3 Ejima wawu anasenuki dehi;

      Ejima wawu adi nayilwilu yatama.

      Kwosi niwumu wunakwila chachiwahiku,

      Kwosi niwumuku.+

       4 Komana antu atama eluka wanyi?

      Adaña antu jami neyi kwiji anakuda dinkendi.

      Hiyamutambikaña Yehovaku.+

       5 Ilaña akatiya woma chikupu,

      Woma wakwila kanda awutiyeñahu dehi,*

      Muloña Nzambi wakapalañesha mafwaha anowu anakukulukuka.*

      Eyi wakayitiyisha nsonyi, muloña Yehova nayikaani.

       6 Yayo-o, wamwinu waIsarela wadi kufuma muZiyona!+

      Neyi Yehova napompeshi dehi antu jindi kufuma muwunkoli,

      Yakoba atiyi kuwaha, Isarela azañalali.