6 Mwanta waBabiloni wajahili anyana kaZedekiya kuRibila iku yena nakutalaku, nawa mwanta waBabiloni wajahili antu ejima alema amuYuda.+ 7 Dichi waputishili mesu aZedekiya, kufumahu wamuhatili mumpompa jawuneñu nakumutwala kuBabiloni.+

24 Mukulumpi wawatulama wasendeli niSeraya+ kapristu muneni, Zefwaniya+ kapristu wamuchiyedi niakakuhemba kuchiisu asatu.+ 25 Nawa wasendeli chilolu wamuchota wumu mumusumba owu wadiña mukulumpi wamashidika. Wasendeli niamabwambu jamwanta chikupu 7 awaniniwu mumusumba, kushilahu ninsoneki yamukulumpi wanjita owu wapompesheleña hamu antu amwituña niamayala 60 afumini hakachi kawantu abula kulema amwituña awaniniwu mumusumba. 26 Nebuzaradani mukulumpi wawatulama wayisendeli nakuyileta kudi mwanta wakuBabiloni kuRibila. 27 Mwanta wakuBabiloni wayitapili nawa wayijahilili kuRibila+ mumpata yaHamati. Dichi Yuda wafumini mwituña dindi nakuya muwunkoli.+