Matewu
23 Kuhiñahu Yesu walejeli mazaza awantu niatumbanji twindi nindi: 2 “Ansoneki nawaFwarisi anadiswanyiki awenawu hachifulu chaMosi. 3 Dichi, yuma yejima yayilejañawu, yilenuña nikuyihemba, ilaña bayi mwila neyi chelañawu wenaku, muloña akuminaña dakuhosha hohu, ilaña hiyelaña muyahoshañawuku. 4 Akasaña yiteli yalema nakuyisha hamafwiji awantu, ilaña wena hiyatweshaña nikuyiswija oyu yiteli namunu wawuku. 5 Nyidimu yejima yazatañawu, ayizataña kulonda antu ayimoneña, muloña atoheshaña tuyikasha twansona twavwalañawu twakudikiña nachu nawa aleheshaña nzombu* jakuyakuvwala yawu. 6 Akeñaña kushakama mumaluña alema hakuda yakuda yamelela, mumasinagogi nimwena akeñaña kushakama hayitwamu yakumbidi* 7 nawa akeñaña nawu ayimusheña muyisankanu nikuyitena nawu Rabi.* 8 Ilaña enu, bayi ayitena kudi antu nawu Rabiku, muloña Ntañishi yenu wumu hohu nawa wejima wenu mudi amanakwamuntu. 9 Cheñi nawa, bayi mutena muntu wejima hanu hamaseki nenu tata yenuku, muloña Tata yenu wumu hohu, Yowu wekala mwiwulu. 10 Nawa bayi ayitena nawu anlomboliku, muloña Nlomboli yenu wumu hohu, yowu Kristu. 11 Dichi, wabadika hakachi kenu watela kwikala mukwakuyizatila. 12 Muntu wejima waditoheshaña, akamukehesha, nawa muntu wejima wadikeheshaña, akamutohesha.
13 “Oyihuñu yimwakamona enu ansoneki nawaFwarisi, anfwikiji! muloña mwakiyaña* kuyiisu yakuWanta wamwiwulu kulonda antu akañanyi kwiñilamu; muloña enu aweni himweñilaña mwokuku nawa himwetejaña antu anakukeña kwiñilamuku. 14 —hs-1—
15 “Oyihuñu yimwakamona enu ansoneki nawaFwarisi, anfwikiji! muloña mwazambukaña kaluñalwiji nikuhita mumaluña oma kulonda mubalumuni muntu wumu yekali kaYudeya nawa neyi nekali dehi kaYudeya, mwamwilishaña kwikala watama nankashi neyi enu kulonda yekali watelela kuya muGehena.*
16 “Oyihuñu yimwakamona enu anlomboli amputamesu, mwahoshaña nenu, ‘Neyi muntu yasanyika nakutena tembeli, kukala kwosi; ilaña neyi muntu yasanyika nakutena wuru yamutembeli, watela kwila munasanyikiyi.’ 17 Enu mwabula maana nawa amputamesu! Komana chuma chimu chidihi chabadika, wuru tahindi tembeli yinaleñeli wuru yiikali yajila? 18 Kubombelahu, mwahoshaña cheñi nenu, ‘Neyi muntu yasanyika nakutena kameña, kukala kwosi, ilaña neyi muntu yasanyika nakutena chawaana chidi hakameña, watela kwila munasanyikiyi.’ 19 Enu amputamesu! Komana chuma chimu chidihi chabadika, chawaana tahindi kameña kaleñelaña chawaana chiikali chajila? 20 Dichi, muntu wejima wukusanyika nakutena kameña, dikwila nawu nasanyikili kumu niyuma yejima yidihu; 21 nawa muntu wejima wukusanyika nakutena tembeli, dikwila nawu nasanyikili kumu Niwashakamahu; 22 cheñi muntu wejima wukusanyika nakutena mwiwulu, dikwila nawu nasanyikili kumu niitanda daNzambi Niwashakamahu.
23 “Oyihuñu yimwakamona enu ansoneki nawaFwarisi, anfwikiji! muloña mwahanaña yamwikumi yaminti, dilu nikasakwa,* ilaña mwadiwulaña iyi nsañu yalema yekala muNshimbi, wuñanji, luwi nikashinshi. Yumiyi mwateleleli kuyihana, ilaña himwateleleli kudiwula wuñanji, luwi nikashinshiku. 24 Enu anlomboli amputamesu, mwakelulaña ñweneni, ilaña ngameli mwamuminyaña!
25 “Oyihuñu yimwakamona enu ansoneki nawaFwarisi, anfwikiji! muloña mwatookeshaña hanji yakaapu* nicheña, ilaña mukachi mwenzala ntuuya* nikubula kudiyuula. 26 Eyi kaFwarisi mputamesu, sambilaku kutookesha mukachi kakaapu* nicheña, kulonda hanji nihena hatooki.
27 “Oyihuñu yimwakamona enu ansoneki nawaFwarisi, anfwikiji! muloña mudi neyi majamu akushiñwila nampemba, amwekanaña chiwahi hanji ilaña mukachi mwenzala mafwaha awafu niyuma yeñi-nayeñi yazonda. 28 Ninenu nawa dichi mudi, muloña hanji mwamwekanaña kuloña kudi antu, ilaña munyichima yenu mwenzala wunfwikiji nikukoña yakuluwalala.
29 “Oyihuñu yimwakamona enu ansoneki nawaFwarisi, anfwikiji! muloña mwatuñaña majamu awatuprofwetu nikuwahisha majamu* awantu aloña, 30 nawa mwahoshaña nenu, ‘Neyi twadiñaku mumafuku awankakulula jetu, hitwadi kutiyashana nawu nakupwekesha mashi awatuprofwetuku.’ 31 Dichi, munakudilumbulula enu aweni nenu mudi anyana kawantu ajahili atuprofwetu. 32 Dichi, manishenu nyidimu yejima yatachikiliwu ankakulula jenu.
33 “Enu tupela, anyana katubandayula, mukapuluka ñahi kukuyisompesha kwakuyinatila muGehena?* 34 Hamuloña wachumichi, inakuyitemeshela atuprofwetu, akwamaana niantañishi. Hakachi kawu, amu mwakayijaha, amu nawa mwakayijahila hanyitondu, amakwawu niwena mwakayivupolela mumasinagogi enu, amakwawu nawa mwakayikabisha mumusumba nimusumba, 35 kulonda mashi ejima awantu aloña imwapwekesheli hamaseki ekali hadi enu, kutachika namashi amuntu waloña Abeli kushika nikumashi aZekariya mwana kaBarakiya imwajahilili hakachi kamwiluña dajila nakameña hakwochela insensi. 36 Inakuyileja chalala nami, yuma yejimiyi yakamwekena idi ikiñu.
37 “Eyi Yerusalema, eyi Yerusalema, mukwakujaha atuprofwetu nawa mukwakwasa malola antu anamutemesheliwu! Owu mapampa kuvula inakeñeleña kukuñwija anyaneyi hamu neyi chakuñwijañayi chaadi anyanindi mumpuula jindi! Ilaña enu himwakeñeleñaku. 38 Talenu! Itala denu anayishilidu.* 39 Inakuyileja nami, himwamba kammonahu cheñiku sampu nichimwakahosha nenu, ‘Wakiswilewa yowu muntu wenjilaña mwijina daYehova!’”