Maku
3 Cheñi, weñilili musinagogi nawa mwenomu mwadiña iyala walepa chikasa. 2 Dichi aFwarisi adiña nakumutala chikupu amoni neyi wukumuuka owu iyala haSabata kulonda amwinki muloña. 3 Wamwilili owu iyala walepa chikasa nindi: “Nyamukaku winzi hakachi.” 4 Kuhiñahu wayihwili nindi: “Komana nshimbi yeteja kwila chuma chachiwahi haSabata tahindi kwila chuma chatama, kwamwina wumi tahindi kuwujaha?” Ilaña wena amweneni kwanzo-o. 5 Hanyima yakuyitala nakuhila, nakutama kwatiyiliyi nankashi hamuloña wakuchinchika kwanyichima yawu, wamulejeli owu iyala nindi: “Ololaku chikasa cheyi.” Dichi wacholweli nawa chikasa chindi chakoleli nakwikala neyi chichadiña. 6 Hamuloña wachumichi, aFwarisi edikili nakuya nakumushakamina hampuña hamu nawakwakumulondela Herodi kulonda amujahi.
7 Ilaña Yesu niatumbanji twindi ayili kukaluñalwiji nawa mazaza awantu afuminini kuÑaliliya nikuYudeya amulondeleli. 8 Nimazaza awantu afumini kuYerusalema, kuIdumiya, kwishinadi daYodana, kuTira nikuSidoni, enjili kudi yena chatiyiliwu yuma yayivulu yakoñeleñayi. 9 Dichi walejeli atumbanji twindi amuleteli watu wanyanya yakandamimu kulonda izaza dawantu dibuli kumuhwila. 10 Chelili wokili antu amavulu, antu ejima adiña nanyisoñu yamaneni apompeleña kwadiñayi kulonda amukwati. 11 Andemoni niwena elileña chamumonawu kudi kwejima, adibukileña heseki kudi yena nakubidika nikuhosha nawu: “Eyi wudi Mwana kaNzambi.” 12 Ilaña kakavulu wayikonkomweneneña chikupu nindi bayi amushimuna kudi antuku.
13 Dichi wayili hampidi nawa watambikili antu akeñeleñayi, niwena ayili kudi yena. 14 Kuhiñahu watondeli izanvu dawantu 12 atumbiliyi cheñi nindi apostolu, endeleñayi nawu hamu, owu akatemeshayi kuya nakushimwina 15 nikuyinka wuswa wakufumisha andemoni.
16 Munidi izanvu dawantu 12 atondeliyi, mwadiña Shimona owu watumbiliyi ijina cheñi nindi Petulu, 17 niYakoba mwana kaZebedewu niYowanu mana kwaYakoba (wayitumbili cheñi ijina nindi aBowaneji, daya mukwila nawu, “Anyana kaKudidima”), 18 niAnderi, niFwilipu, niBatolomewu, niMatewu, niTomasi, niYakoba mwana kaAlafwewu, niTadewu, niShimona kaKenani,* 19 niYudasi Isakaroti owu wamufukejeleli Yesu.
Kuhiñahu weñilili mwitala, 20 cheñi izaza dawantu dapompeli chakwila Yesu niatumbanji twindi akañenyi nikuda yakuda. 21 Ilaña antaña jindi chatiyiliwu chumichi, ayili nakumukwata, muloña ahosheleña nawu: “Nazaluki.”* 22 Ansoneki afumini kuYerusalema niwena ahosheleña nawu: “Wudi naBelezebuli,* nawa wafumishaña andemoni nañovu yakufuma kudi nyuuli wawandemoni.” 23 Dichi chayitambikiliyi nindi enzi kudi yena, wahosheli nawena kuzatisha yakutalilahu nindi: “Indi Satana nateli kufumisha ñahi Satana? 24 Neyi wanta wudaambula waweni, owu wanta kwila wukola nehi; 25 nawa neyi itala didaambula dadeni, odu itala dakolaña wanyi. 26 Satana niyena neyi yadilukuka yomweni nawa yadaambula, hanateli kukolaku, ilaña dikukuma kwindi. 27 Kafwampi, kwosi muntu walukukaña itala damuntu wukweti ñovu nakwiya maheta indi chakadi kusambila kumukasa yeniwu muntu wukweti ñovuku. Neyi namukasi dehi, dihanateliyi dinu kubuwa* mwitala dindi. 28 Inakuyileja chalala nami, antu akayanakena nshidi jawu jejima jakoñañawu nimazu akasawuntu ahoshañawu. 29 Ilaña muntu wejima wasawulaña spiritu yajila, Nzambi hamba kamwanakenaku, wakekala namuloña wahaya nyaaka.” 30 Yesu wahosheli mwenimu muloña ahosheleña nawu: “Wukweti ndemoni.”
31 Dichi mama yindi nianakwindi enjili nawa emeni hanji, atumini muntu kuya mukachi nakumutambika. 32 Izaza dawantu dashakamini nawa damunyeñumukili, damulejeli nawu: “Talaña! Mama yeyi nianakweyi adi hanji anakukukeña.” 33 Yena wayakwili nindi: “Indi mama yami nianakwami hiyanyi?” 34 Kuhiñahu, watalili antu ashakamini nawa amunyeñumukili nakuhosha nindi: “Talenu, mama yami nianakwami! 35 Muntu wejima welaña nkeñelu yaNzambi, yenowu diyi manakwami, diyi muhelami nawa diyi mama yami.”