Matewu
3 Mumafuku wenowu, Yowanu Mupapatishi wenjili nakushimwina mwisaña damuYudeya, 2 nindi: “Balumukenu munyichima, muloña Wanta wamwiwulu wunaswini dehi kwakwihi.” 3 Yeniwu, diyi ashimwiniwu kuhitila mudi kaprofwetu Isaya munawa mazu nawu: “Kudi muntu wunakubidika mwisaña nindi: ‘Loñeshenu njila yaYehova! Ololenu njila jindi.’” 4 Yowanu wavwalileña yakuvwala yamavuji angameli nimushipi wachitembi mumbunda yindi. Wadiileña tubola niwuchi wamwisaña. 5 Antu amuYerusalema niamuYudeya ejima niamumaluña ejima amukamwihi naYodana, ayileña kudi yena, 6 wayipapatishileña* muKaloña Yodana nawa adiña nakushimuna nshidi jawu hatooka.
7 Chamweniyi aFwarisi nawaSadusi amavulu hiyakwinza kwadiña nakupapatishilayi, wayilili nindi: “Enu anyana katubandayula, hinyi wunayisoñamishi nindi mutemuki kuzuwa kunakwinza? 8 Dichi, soñenu nyikabu yinakumwekesha nawu munabalumuki munyichima. 9 Bayi mutoñojoka nakuhosha nenu, ‘Tukweti tata yetu Abarahamaku.’ Muloña inakuyileja nami Nzambi nateli kubalumuna awa malola kwikala anyana kaAbarahama. 10 Chizembi chidi dehi kunyiji yanyitondu. Dichi, mutondu wejima wabulaña kusoña nyikabu yayiwahi akuwutema nakuwunatila mukesi. 11 Ami nayipapatishaña mumenji hamuloña wakubalumuka munyichima yenu, ilaña owu wunakwinza hanyima yami wambadika ñovu nawa hinukutwesha kumusubula nkwabilu jindiku. Yena wakayipapatisha naspiritu yajila nikesi. 12 Fosholu yindi yakupepa nachu* yidi muchikasa chindi, wakatookesha chikupu heluña hakuhulila nawa wakapompesha tidiku yindi munkalaña, ilaña muzuñu wakawocha nakesi kabulaña kujimawu.”
13 Dichi Yesu wafumini kuÑaliliya nakuya kuYodana kwadiñayi Yowanu kulonda amupapatishi. 14 Ilaña Yowanu wesekeli kumukaanisha, nindi: “Yeyi watela kumpapatisha ami, hanu eyi winzi kudi ami?” 15 Yesu wamwakwili nindi: “Bayi wunkaanishaku, muloña dichuma chitwatela kwila kulonda tuzati yuma yejima yaloña.” Dichi walekeli kumukaanisha. 16 Chamupapatishiliwu, hohenohu Yesu wafumini mumenji; mwiwulu mwenzunukili nawa wamweni spiritu yaNzambi yamwekeneña neyi kapompa* yenjileña nakuwila hadi yena. 17 Cheñi nawa, mwiwulu mwafumini izu nadu: “Iwu diyi Mwanami, inakeña, inatiyaña kuwaha.”